INNGAIHTLAWMNA NUN

Inngaihtlawmna han tih hian ringtu nun leh rawngbawlnaah a pawi­mawhin ringtu nun ze ropui tak a ni a. Inngaihtlawmna ṭawngkam hi Kristiante phuahchhuah a ni an ti a. Lal Isua lo kal hma kha chuan he thu hi ala awm ngai lo nia sawi a ni.

Isua lokal hma kha chuan mi inngaitlawm chu – mi hnuaihnung, dawihzep, mi rethei leh mi hnuaihnung anga ngaih an nih ṭhin avangin an ngaisang ngai lo. Lal Isua lokal hnuah erawh chuan inngaihtlawmna chu Lal Isua nun enin dah chungnun a ni ta a, ringtu nun ze pawimawh ber nia ngaih a ni ta a ni.

Ringtu nun leh inngaih­tlawmna: Isua kha a nun a tlawm ralṭhak a ni. Amahah khan chapona hmuh tur a awm lo. Theologian ropui Augustina chuan, “Sakhaw nuna pawimawh ber engnge ni? tia min zawt a nih chuan pakhatna chu inngaihtlawmna ka ti ang. A pahnihnaah pawh inngaihtlawmna tih thovin ka chang ang," a ti.

Lal Isua kan en chuan a tlawmna nun kha a chakna thuruk a ni tih kan hmu. Chutiangin keini ringtute pawh hian mite nena kan nunhonaah te he inngaihtlawmna nun hi kan nunah miin an hmuh chuan anmahni hnehin a awm zawk dawn a ni. Khawvel leh van zawng zawnga lal ropui ber Isua in inngaihtlawmna nun kha a rawn chawilar a. A nunah kha nun kha kan hmu a nih chuan ringtu nun chu tlawmna nun nen ava inhmeh dawn em! chu chu kan chakna leh hnehna a ni si a.

Kan mamawh In­ngaih­tlawm theihna nun: Mahni lian tawk intih hi a awl khawp mai. Rawng­bawlnaah pawh hian ropui taka inngaih mai hi awl tak a ni. Pathian ringtute tana hlauhawm leh ṭha lo ber chu chapona hi a ni bawk. Khawvela mi ropui ber kan tite pawh hi mi inngaitlawm tak an ni ṭhin.

Nelson Mandela te pawh kha khawvel mi inngaitlawm ber a ni ang tih hial a ni ṭhin. Abraham Lincoln te, George Washington te pawh khan Pathian ropuina hmaah an tlawmzia an hmu a, an ṭhingṭhi ṭhin. Kha tak kha an ropuina chu a ni lawi si a ni. Pathian ropuina hmaah hian kan tlawmzia kan inhriat a, a hmaa kan ṭhingṭhit ṭhin hi a pawimawh hle. Kan ram hruaitute, kan awfisar lian tak takte an han inngaitlawm dup mai ṭhin te pawh hian a ti zahawm a, mipuite thinlung a hneh ṭhin.

Mi talent nei tak te, lehkha thiam leh mi ropui nia kan hriat te, an han inngaitlawm em em mai ṭhin te hian an ropuina a ti zual ṭhin. Chutih laiin vawi khat kan han lar ve deuh a, kan han chapo nghal awr erawh hi chuan mi te thinlung a ti thlep zawk ṭhin. Thiam nei mang lo, nitina ei ve ṭawk ṭawkte kan han chapo viau mai te hian kan atzia a tilang zawk a ni.

Inngaihtlawmna nun hi finna a ni. Mifing takte mi chapo tak an awm ngai lo tluk a ni. Inngaihtlawmna nun hi ringtu nun chang lo, nitina kan nun hrim hrimah pawh kan chakna leh ropuina a ni zawk tih hi i hre thar ang u.

Khawvelah hian hotu ber leh lal ber a nih theih hauh loh, keini aia lal zawk hi an lo awm zel a, Lalber chu Isua a ni. Isua Lalber a dahtute chuan ram hruaina kawngah te, hnathawhna engkimah hlawhtlinna an hmu ṭhin. Rawngbawlna kawngah pawh hian tlawmna hian thil a ti thei a, hnehna a ni. Rawngbawltute ngei pawh hi chapo a awl khawp mai. Rawngbawltu chapo takte chu an rawngbawlna a tlo ngai lo.

Inngaitlawmte chan tur: Lal Isua’n “Tu pawh inngaihlu apiang an tlawm ang a, tu pawh inngaitlawm apiang chawimawiin an awm ang” (Mt. 23:12) ah a ti. Pathian hian inngaitlawmte chu lawmman a pe dawn a, he leiah leh vanah pawh lawmman hlu tak a siamsak dawn a ni. (Matt. 25:31-46) He khawvelah ngei pawh mi inngaitlawmte chuan chawimawi an hlawh ṭhin a, mi chapote erawh chuan nuihzabur an hlawh ṭhin. Lal Isua hian engkim a rawn thlakthleng a, Thuthlung Hluia “Ha aiah ha” tih chu ngaihdamna leh tlawmna nunin a rawn thlakthleng ta daih a ni.

Mi hausa leh ropui tak takte pawh hi an nun a tlawm poh leh an ropuina a zual ṭhin. He mihring nihna aia Lalpa chhuang zawktute nunah chuan, miten ropuina leh hnehna an hmu ṭhin a ni.

- Reuben Lalnunthara Hnamte