Kan rilru mil tawk Pathianin ram hruaitu min pe ṭhin

Kan hmalawkah Mizoram chuan inthlanpui kan hmachhawn leh mai dawn a, hemi atan hian kan political party hrang hrangte chuan tun aṭangin tlin tumin theih tawp an chhuak mek a, MLA tura inringte chuan an bial tur an vil ṭan chho mek.

Zoram mipui zinga vote nei, vote thlak ṭhin zingah hian party tuipui lem lo, party ṭan lam nei hran lo kha a tam zawk an nih leh ngei a rinawm a, chung ho vawt vote tling khawm chu vote hlu tak a ni ngei bawk ang. A zawmzia chu mipui nawlpuiin an vote kha, a tling turte an ni leh dawn tho tho tihna a ni. Chumi anih tak siah chuan mipui nawlpui rilru put hmang kha ram rorelna fung chelhtu thlannaah nghawng a nei pha tihna a ni bawk.

Ramhruaitu ṭha thlang tura pawimawh mawh berte zinga mi chu mipui nawlpui ten rilru (moral) dik an put hi a ni a, mipui nawlpui rilru adik chuan ramin hruaitu ṭha a neih phah ṭhin. A nih lo erawh a, mipui nawlpui rilru dazat tak nei an tam chuan ramhruaitu ṭha neih a hrasa hle ṭhin a ni. A zawmzia chu ramhruaitu ṭha nei tur chuan mipui nawlpui rilru kha a taka dikna leh rinawmna te ngaisangtu a ni tur a ni a, eirukna leh hlemletna chu ram hmelma an ni tih te thlengin a hmu thiam tur a ni. Chuvang chuan mipui rilru mil pui tawk Pathianin ram hruaitu min pe leh ang.

Inthlanah hian vote hmu hnem berte MLA atan an tling ṭhin a, vote thlaktu te an pawimawh hle tihna a ni. Vote thlaktute chu mipuite an ni a, mipuite chuan ramhruaitu an thlang chhuak ṭhin. Chung vote thlaktute zinga mi chu sawi tawh angin, a tam zawk chu neutral, party tuipui lem lo, party ṭan lam nei hran lo, India khua leh tui nihna avanga vote thlak te kha an ni leh fur dawn. Khang ho vote kha a hlu em em a, khang ho rilru (moral) put hmang kha ram tan a hlu hle bawk. Chung hlu takte ho chu political party mi leh sa ten lei tumin an hel leh ngei bawk a nga, chumi hunah chuan mimal tinte kan inzawh ṭeuh atan, rilru dik ka put hmangin vote ka thlak dawn nge, sum leh pai a lei ka nihna aṭangin?

Party ṭan lam nei tam tak an awm leh ngei ngei dawn bawk a, anni pawhin party mi leh sa an nih avang ngawta an ṭanlama vote thlak mai loin, tu nge kan ram hruaitu tur atan ṭha ang, tu hi nge kan veng chhung, kan khuaah hmasawnna tak tak rawn thlen thei tur, tu hi nge ram hmangaih tak tak, corruption a fihlim. Ani ka vote chuan kan nawmsak phah sawt ang, tih ang chi zawng zawng aia pawimawh chu, vote nei zawng zawng tan, rilru dik (moral value) put hi a ni mai awm e.

- Crpuitea