Sorkarin sipaite vil uluk se

Mizoramah Covid-19 vei (positive) mek mi chuang hret (July 16, 2020 record angin) an awm a, a tam zawk - mi 80 chuang chu sipai mi leh sate an ni a, Mizo zinga vei chu mi tlemtê chauh an ni tawh.

Sipaite hi hmun (camp) bik neia awm ni mah se, mipui vantlang zingah an kal a ngai ve fo a, an kal ve ṭhin bawk a. Tun dinhmuna Mizorama Covid-19 vei mek zingah sipai an tam tâk viau avangin, Mizoram sorkar hian tun aia uluk leh khauh zawkin Mizorama hman tura dan (dan hrang hrang leh inkaihhruainate) a siam leh tihchhuahte ṭha taka an zawm ve a ṭul tak meuh mai.

Sorkar thupuangtu - IPR department thuchhuahah, Aizawl, Lunglei leh Serchhip district-a sipai zinga Covid-19 vei hmuh tawh zinga a tam zawk chu tun hnaia state páwn aṭanga rawn lêt/lût an nih thu leh khung hran (quarantine) lai an nih thu kan hmu tel ṭhin. Chutih laiin, hripui vei hmuh chhuah zingah state páwn aṭanga rawn lut thar ni lo, Mizorama awm sa rengte pawh an tel ve tâk nual avangin, state páwn aṭanga rawn lut tharte an khung hran danah felhlel tak a awm ngei tih a hriat theih. Chu tak chu Mizoram sorkarin a enfiah ṭul em em lai chu a ni. July 15, Nilainia hripui vei hmuh chhuah, sipai mi leh sate bik zingah pawh mi pasarih lai chu 'positive contact' aṭanga kai a nih thute kan hre leh zel a!

State páwn aṭanga sipai rawn lut tharte chu an camp chhunga quarantine facility an siamah an khung hrang ve ngei a nih pawhin, state páwn aṭanga rawn lût thar ni lo, camp-a awm sate nen an inkalpawh ṭhin ngei a nih hmel a. Inkalpawh lo se, Mizorama awm sa rengte'n an kai ve ngawt chhan tur a awm lo.

Hman ní deuh khan Kolasib DC hmalaknain medical team chuan Counter Insurgency and Jungle Warfare School (CIJWS), Vairengte chu a hmun ngeiah uluk takin Covid-19 laka invènna tura an hmalak dan leh quarantine an kalpui dante an endik a; Vairengte mai ni lo, Lailapur-a CIJWS quarantine facility thlengin an endik a nih kha. Medical team report-a a lan danin, CIJWS-te'n hripui laka invènna an kalpui dan leh an fimkhur dante kha a ṭha tâwk hlein a hriat a, a lawmawm tak zet.

Kolasib DC hmalakna anga medical team-in an district-a sipai hmun an endik hi a lawmawm tak zet a, sipai awmna district dangte pawhin entawnin, hma la ve thei se, kan ram tan a va ṭha dawn em. Bawrhsap kaihhruai District Task Force thuneihna hmangin district mal angin hmalak theih a ni tih a chiang tawh tho si. District malin hma an lâk mai loh pawhin, state sorkar (State Task Force) aṭangin ti tura hriattir theih a ni ang chu.

Sipaite zingah chawlh làa an khaw lama haw te, chawlh hmang zoa Mizorama rawn lêt lehte an inpèl ve zut tih a hriat a. State ramri pèla lût-chhuak an nih avang hian, anmahni'n an remchan dan anga Covid-19 laka invènna tura hma an lâkna ring tâwk mai lo leh, an hotute sawipui ringawt loin, Mizoram sorkar hian tun aia a ngaihven lehzual a, an hmunah ngeia endik a ngai a ni. Anmahni'n inkaihhruaina leh tih dan tur bik hranpa an nei a nih pawhin, Mizoram sorkarin inkaihhruaina anga an kal ve tho a ṭul ang - Mizoram chhunga awm an nih miau avangin.

Sawi tawh angin, sipai, state páwn aṭanga rawn lût thar ni lo, Mizorama awm sa reng zingah Covid-19 vei hmuh chhuah an nih nual avangin, rawn lut tharte an khung hran danah felhlel, ṭha tâwk lo a awm ngei tih a chiang a; Lunglei leh Lungverh lamah phei chuan nasa takin mipui an tithlabâr a, an tibuai tawh a ni. July 15-a Health Minister hoa thuneitu ṭhenkhatin sipai hmun ṭhenkhata quarantine facility an tlawh kha a lawmawm em em a; mahse, a la tâwk zo lo. Quarantine facility chu engtiang chiahin nge an kalpui, chaw (ei leh in) an inpek dan, mi dang lak aṭanga an intihhran dan takte enfiah a ṭul tak zet.

Chuvangin, Mizoram sorkar hian Mizo mipui (civil mite)-ah na taka hma a lâk a, hmùi-hmai tuam lote pawisa chawitir tur zawnga a veha a veh mek rual hian, Covid-19 kaihhnawihah sipaite chungchangah hian nasa zawk leh khauh zawkin hma la se, Mizoram mipuite kan lâwm tlang ngawt ang le.