Natna hrik versus faina

Thlasik a inṭan dawn ta a, khua a rovin a vawt ṭan a, boruak a bawlhhlawhin vaivut khu a tam a, hetiangah hian hrileng awmna, hritlang leh khawsikte a leng ṭhin.

In kai darh a awl em em bawk. Mihring hian khaw lum leh boruak bawlhhlawh kan zo lo a, natna hrikte an lo inthlah pung a, mihring an bei chiam ṭhin. Hetiang laka invenna ṭha ber chu ‘faina’ hi a ni.

Fai hi natna hrik dona te, hriselna te, hmelṭhatna te, dam reina te a ni. Natna hrikte hian hmun bal leh ṭawp an bawh a, damdawi ei mah ila taksa a balh tlat chuan dam chian a har ṭhin. Damdawi ei lo mah ila taksa kan tihfai chuan natnain min kiansan chang a tam ṭhin.

Tho hian hmun hnawng, ṭawp leh rim chhiaah ei tur zawngin an fu kual ṭhin a, an ke a bawlh­hlawh kaite an thingthla a, natna hrik an pu darh ṭhin. Hmun faiah chuan bawm tur an hmu lova, tho pawh an vang bik a ni. Kan in leh a vel te, kan kawng dungte kan vawn fai chuan hrilengte a lo tlemin keimahni pawh hrileng kan kai lo bik deuh ngei ang.

Natna hrikte pu darhtu pakhat chu tho an ni a, taksa bal laiah awmhmun an khuar a, chuta ṭang chuan natna hrik chi hrang hrang an kai a, kan taksa chhungah lutin natna an thlen ṭhin. Kan taksate kan vawn fai reng theih chuan natna tam tak kan pumpelh ang a, kan lo hrisel zawk ngei ang.

Kan kut tin te kan hlep mam ṭha tur a ni, thil kan ei dawnin kan kut kan sil fai ṭha hle tur a ni.

Kut bal chunga thil kan ei chuan kan kuta natna hrik tam tak awmte kha kan ei tel a, chu chuan pum na, kawṭhalo, santen leh natna dangte a awmtir ṭhin. Natna hrikte hi hmuh tham an ni lo, mah se thihna thlentu an ni si a, an awmna a tet em avangin kan silfai emaw kan tihte hi a lo fai tawk ṭhin lova, chung aṭangte chuan natna kan kai ta ṭhin a ni. Chuvang chuan kan thil silte chu a fai hle tur a ni.

Kan ran vulhte in chhunga lakluh a, chenho phei chu a ṭha lo hle mai. Rante hian mihring tana ṭha lo natna hrik hlauhawm takte an kawl ru reng ṭhin. An rim a chhiain in chhung an tiṭawp a, inlengte hmuhah inchhung an ti zahawm lo fo ṭhin.

Khawvelah hian khawilai hmuhah pawh natna hrikte hian min chang reng a, kan taksa chauh hun te, kan taksa leh thawmhnaw balh hunah te mi beih tumin an lo awm reng a, mahse kan taksa leh thawmhnawte a fai ṭhat reng chuan natna hrikin min bei dawn mah se ṭanhmun siamna an nei ṭhin lo. Chuvangin, kan taksa leh thawmhnawte a fai ṭha hle reng tur a ni. Japan mite khi an intihfai peih reng avangin kum 100 dam an tam hle a ni an ti.

- H. Neihchungnunga, Durtlang North