Kan ramin Nationalism nge Patriotism kan mamawh?

Kan thupui a kan luh hmain thil tlem han sawi hmasak ila. Mizote hi a huhoa huaisen tak, a mimal chuan eng ni leh vak lawi si lo kan ni a, mahse huho a huai viau ni mah ila hruaitu ṭha neih chuan thuawih tak kan ni. Kan rilru hi a puitling lo nge a nghet lo em em a, mi thusawi hnuhnung apiang awih mai zel kan nih bakah mahni a thil ngaihtuah chhuah aiin mi tih dan copy/ intih hmuh zung zung chi kan ni.

Sumdawng zingah pawh mahni a thil thar hmuchhuak a hlawhtling (entrepreneur) kan nei mang lo. Chuvangin, hemi kawng te ram hmangaih kawng­ah te hian ṭan kan lak a ngai a, kan ram ṭhanna tur a ni bawk.

A hamsain nationlist/ na­tionalism chu hnam tana ṭha­hnemngamtu leh hmangaih­tu a ni a, Patriot or Patriotism chu ram hmangaihtu leh ram tana inpe tihna a ni. American author leh jouernalist ropui Synney J harris a chuan, ‘Nationlism chu Patriotism nen hian thliarhrang tur a ni a, ram zalenna bulpui innghahna leh hmangaihna vanga zalenna dawng tur chuan an nun hial pawh an hlan ngam a ni. An pahnih hian thil inzawm hnaivai tak mahse inhlat tak an ni lawi si. Nationalism chuan ngaihdan pakhat hnam dangte aiin kan chung zawk a, hnam dang aiin kan sang zawk a ni tih rilru an pu a, chu chuan intih buai leh indo bak a thlen lo a ni.’

Patriot kan han ti chuan a pianna ram tan hian thil tih sak ve hi ba neia in hria a, chuvangin a ram ṭhatna tur chuan engkim tih huamin lu chhum ban chhum leh a nunna hial pawh chan a ngam ṭhin. Chungtiang mi chu kan ram pawh hian kan lo nei ve nual tawh. An ngaihsan awm a, kan ṭhangtharten kan theihnghilh mai tur a ni lo. Chu mai bakah kan hmanlai lalte pawhin an lal ram zauh nan theih pa tawp an lo chhuah ṭhin a ni.

Kan ramah hian Political party an lo awm nual tawh a, chu chu Nationalist party deuh vek an la ni awm e. ‘Ram hmangaihtu tak taktu politician leh ram hruaitu kan nei lo’ tih pawh hi mipui vantlang ṭawngkam a nihna a rei tawh hle. Hei pawh hi eng dang vang a ni lo, Nationalism hian ram hi a siamṭhat theih loh vang a ni. Scholar pakhat chuan ram hmangaihtu chuan a ramin a thil tih chu a chuang a, hnam hmangaihtu chuan a ramin a thiltih apiang a chhuang a ti ve thung.

Ngaihtuah peih chuan a dik khawp mai. Nationlism hian ram inpumkhatna te chu dah lian ve viau mahse ram hi a siam ṭha tak tak thung em tih kan ngaihtuah a pawimawh khawp mai.

Nationalism hi kan sawi chhe reng reng lo a, kan neih ngei pawh a ṭha a, amaherawhchu ram tan infrastruc­ture leh economy siamṭhat chuan a hman tlak lo. A dik a dik chuan Nationalism hian a huam ber kan NGO thil tih (YMA, MHIP, MUP) chu hnam humhalh leh hnam inneih te, hnam tihdan phung (culture leh tradition), ṭawng leh thu leh hlate vawn nun hi a ni. Chu chu ram hmasawnna a siam si lova. Chuvang chuan patriot (ram hmangaihtu leh veitu) tak kan mamawhzia a tichiang ta a ni.

Kan ram hruaitu tam zawk hi chuan mahni leh vua leh vang an ngai pawimwh zawk a ang khawp mai. Khawvel history kan en chuan ram hmangaihtu tam tak an awm tawh a, an ram an hmangaih avangin an mimal thil tam tak an chan a, chutih rual chuan nationlism hnam intih bikna (fascist) chuan indopui 2 na a chhawk chhuak hial a. Tunlai Chakma te nena kan dinhmun pawh hi kan buaina chu eng pawh ni se, nationalist rilru vang a ni. Hei hian ram hmasawnna leh ram ṭhan aiin intihbuaina, indona leh harsatna hrang hrang bak min siam lo a ni. Nationlist-ah buai loh tur ka tihna ni lovin ram hmasawnna hi i ngai pawimawh zawk ang u.

- K.Zoremtluanga Mission Vengthlang