Aizawla two wheeler khalhtute hi

Aizawl khawpuiah tun hnai mai aṭang khan a maka maka tam two wheeler a pung a, a lei thei dek dek chuan an lei a, an khalh mai zel a. Mahse khawpui chep leh kawngpui zimah a khalhtu tam takte hi polite lo leh dan bawhchhia-in double overtaking ching hian min ti chhangchhe ta khawp mai.

Traffic a jam a, lirthei ke pali nei an in din zawm put a, chutihlai chuan two wheeler pawh ke pali nei sirah an intlar fe chang a awm ṭhin. Chunga line khata lo intlarte tlan pelh ṭalh tum an awm fo. Hei hi double overtaking chu a ni a, hei hi dan phalh loh a ni. Heng mahni hmaa mite tlan pelh tum ṭalh ho avang hian a line-a lo dingte tan pawh a hlauhawm viau ṭhin.

A thu hrimah he­tianga lirthei tam karah hian tow wheeler khalhtu ṭhenkhat hi an in enfiah deuh a, an hawihhawm a ngai ta khawp mai. Polite takin traffic jam-ah lo intlarin an ding a, zahngai lo leh hawihhawmna awm miah loa hmaa mite dan khalha an tlan pel fo mai hi sim se a ṭha khawp mai. A bikin Dawrpui phei te, Canteen kual tawntirh aṭanga Bazar Bungkawn inkarah hian hetianga traffic jam vanga in line mekte tlan pelh fua fua a tam bik.

Kan traffic police pawh hian two wheeler khalhtute pawh hi control deuh se a ṭha khawp mai. Khatla kawn thlen hma kawng chho-ah pawh intlan pelh phal a ni lo a, intlan pel tur pawhin kawng a zim hle. Hetiang ang deuh hian Canteen kual leh Bazar Bungkawn inkar te, Bara Bazar phei angah te hian duty indah se, a line-a tlan ho zak miah lo leh dan kalha double overtake ching hi man hmiah hmiah tawh se a ṭha awm e.

Tin, two wheeler khalhtu ṭhenkhat hi chuan licence an nei ve ringawt a, traffic rules hre lem loa khalh ve tawp an tam khawp mai. Hnung lam

aṭanga ding lama min pel lo a, vei lama min rawn pel ta fua fua pawh an awm nawk mai. Hengte thleng hian kan traffic police te hian min vil sak thei se a lawmawm ngawt ang.

Traffic police kan pun ta sa sa, tun hnai deuh aṭang khan fak an hlawh ta ngawt mai. Mihring chu a enkawltu a zir zel kan ni a, an hotu ber kha vin khu khu se, an naute hrawk vak vak ṭhin ta se chu an duty-naah a lang ta ṭhin a. Zaidam taka enkawl an nih vang pawh a ni ang e, an polite hlawm viau mai.

Hei hi chhawm nung zel thei se a duhawm khawp mai. Aizawl khawpui hmel chhiat leh ṭhatah pawh mawhphurtu an nih ve nalai a awm tlat si a.

- Mama