Smuggling leh CYMA

A hun leh ni ka hre tawh loa Central YMA in Myanmar aṭanga dan loa kuhva rah tawlh ruk tihtawp a nih theihna turin February, 2022 ral hma ngaia checkgate rintlak siam turin Mizoram sorkar a ngen tih kha kan chhiar a, kan hmuh tel chu, "Hun tiam chhunga checkgate siam a nih loh chuan YMA-in a thiam danin hma a la dawn. CYMA chuan YMA hruaitute leh member-te chu dan loa sumdawnnaah inhnamhnawih lo turin an ngen nawn leh a, dan loa sumdawnna chuan nghawng ṭha lo tam tak a neih avangin an do zel dawn," tih kha kan hmu zui a ni.

CYMA meuhin kuhva smuggling an beih tak chat chinah hi chuan a tawp ngei rinna a lian. CYMA chu pawl lian a ni a, sorkar leh dan phal loh thil ti tawp turin an rawn pen chhuak a, smuggling hi a tawp ngei rin a ni. Sorkar pawh a che zui nghal zat a, February thla ral hma ngei chuan Sihhmui-Sairang Zero Point bul leh Serchhip Sailiamkawn lamah check gate chu a siam ta chuk chuk mai a, kuhva tawlh chu a reh ta hmak chuang lem hlei loa!

Police-in check gate an siam zawha kan hmuh chu, "Rang taka an ngenna an tih hlawhtlin vat avangin Mizoram Sawrkar hotute chunga an läwm thu a sawi a. Mizoram Police-te chu YMA ten he sumdawnna dik lo tak tih tawpna kawngah hian theih tawpa hma an lak pui tlat tur thu Central YMA Gen. Secretary..... chuan a sawi bawk a ni," tih a ni ta.

CYMA hian check gate siam hi an lawm tawk a nih chuan a mawiah smuggling hi an vei ve mai mai a ang zo ta a ni.

Tunah hian Vaireng­te chhehvela kudam khu zuk check kual se, Smugg­ling an vei a nih chuan. Hman deuh khan DC khan ṭhiahna thupek a chhuah kha thuneitu sang ngam loh vang nge kudam hlirin Vairengte dai a khat, an check uluk na ber Hachhek bialah pawh kuhva hi an phurh luh ngam chuan rel-a thawn leh Vairengte gate lama kal hi a awm loh a rinawm lo e.

Bairabi godown lama man sa pawh a riral theih avang hian CYMA hian smuggling chung­changah dinna nghet nei ngam se. Hlem­hletna do an tum thu General Confe­rence a pass hma khan smuggling (hlemhletna chi khat) hi check gate pahnih siam hmanga doah an lo duhtawk tawh a ni.

- Vanlalhruaia Pachuau