TUNLAI ZORAM KHAWVEL BORUAK HI!

Khua a chhe deuh reng a, lirnghing thawm hriat tur a khat ta thung a, a lawmpui awm hle. Lir an nghin mawlh mawlh lai kha chuan Tuipuiral lam an khawngaihthlak a, a hmun ngeia kan thuhril mite han kal khan awmzia a nei a nia nge tih turin boruak a ziaawm ta. Pathian nung betu nih man a awm e. 

Coronavirus erawh a leng mek a, mi tam tak nunna a suat a. Ram ropui USA-te hlei hlei a tuar nasa an ni ta. Mizoramah kan la vannei a, tun thlengin vantlang inkai darh kan tih ang hi a la thleng lo a ni. 

He hripuiin India ram a lo thlen tirh aṭangin ‘mihring aṭanga mihringa inkai chhawn chi a ni’ tih an sawi aṭangin ‘inkharkhip’ lock down neih nghal a ni a. Khaw tinah Village Level Task Force din a ni a. VLTF te lah hi an han inpe zo em em bawk a! Kan VLTF te hi khaw khata pa fing leh rawn kai pawh an ni chuang lo; ṭhenkhat hi chuan an hripui ven ber hming pawh an lam thiam mang hlawm lo a, “19 Corina” lo ti ta mai tawkte an awm a! 

An tih tur erawh tlin takin an thawk a, mipui lahin thu kan awi a. "Tak Fawr’ te an inti a, mahse hetianga lam chite hlei hlei hi an duty-na hre chiang leh duty a rinawm hlei hlei zuk ni tlat si a! Kan thuawihna leh ram kan hmangaihna hi chu a va ropuiin a va hlu tak em. 

Hei mai hi a ni lo, ram hmawr tawnga awmte hlei hlei hi an fakawm. Mahni in lum pawh luah hman lovin, Zoramin hripui an kai ang tih hlauvin, ram ri, rampalailengah a thla a thla zuk duty a mawle! A va ropui tak em.

Mahni inhlanin, an unau Zoram mipuite hmakhua ngaiin heti khawp hian an inpe a. A ṭhen te phei chuan sikserh veiin, an nunna an hlan hial a nih kha. A va ropuiin, ram leh hnam an hmangaihna hi ava nasa tak em! Heng mite ngei hi a ni dawn lawm ni 'nopui' dawmtu tur chu? Ram ka hmangaih tia au au ṭhin mi tam tak aiin anni hian ram an hmangaih zawk a, ram tan an martar hial asin. 

Mahse in ti teh ang, tunah hei ram dang leh state dang aṭanga kan mi leh sate an lo hawng a, hri an han kai hawng a, enkawl zel an ni. Hetiang dinhmuna kan din lai hian kan VLTF, kan lo chhuan em em ṭhinte lah kha an duty hmel hmuh tur a awm ta mang lova, an thawm a reh ta riau mai. 

Mipui lam lah hian hriin min han hnaih tak hnu hian a hma aiin kan hlau nep ta deuh zawk emaw tih tur a ni a. In san mar a, in khuahkhirh nasat zual hun lai ni awm takah kan zelthel leh ta riauin a lang. Mi ram vei nasa ho an thawven hun lam tawhah hian kan tlai lam umpawng par vak mai ang tih a hlauhawm. 

Kan sorkar, kan VLTF-te kha lo insang phek leh deuh teh u. Kan hripui ven hi ṭha tak leh fel takin a hmawr i bawk teh ang u.