THIANGHLIMNA LEH MEDIA
Media hi kan inbiak pawh tawnna hmanraw ṭangkai tak niin mi tam takin a ruala kan dawn theih leh kan hman ṭangkai em em hi mass media an ti. Keimahni ngeiin kan awka leh chetzia a thu awmze neia kan entir reng reng hi media chuan a huap vek a, hei hi presentational media an ti.
Khawvel ṭhang zel hian mihring nun hi a khawih danglam nasa a, a ṭangkaina sawi tur tam tak a awm laiin a ṭha lo zawnga hman theih tam tak a awm bawk. Khawtlangah leh Kohhranah hian media hman ṭangkai dan hi tun aia nasa hian in zirtir ila, hemi aṭang hian hmasawnna pawimawh tak kan lo nei dawn tihna a lo ni. Kan hriat hauh loh laia min zirtir rengtu chu kan thil hmuh leh hriat hi a ni ṭhin a, heng te hi mass media hian a huam tel vek a ni.
Tunlai sualna langsar zual, mipat hmeichhiatna hman dik loh hlemhletna hrang hrang zu leh damdawi hman khawloh dan bawhchhiatna tharum thawh leh tualthah thleng hian mass media chuan a huam a. Thil ṭha lo tam tak karah hian mihringte thianghlimna hi a bo zo vek ṭhin. Heng thil te hian a hranpa in sualna lam ti turin min fuih hauh lova, kan rilru lamah nasa takin min kai peng ṭhin a ni. Kan lehkhabu chhiar duh aṭang leh flim kan en duh zawng aṭang te hian kan khaw hawi kan tih zauh viau laiin a ṭha lo lamah pawh min zirtir tel a hauhawm khawp mai. A tira sual anga lang lem lo pawm zam hian keimahniah sualin hmun a khuar zui duh viau a ni.
Tunlai a hmanraw ṭangkai taka kan neih computer te hi telephone a thlun zawmin internet aṭang hian kan thil hriat duh engkim awlsam takin a hmeh chhuah zung zung theih a. Heng thil hmang tangkai duh tan chuan thil ṭha tak a ni awm e. Internet aṭang hian sakhaw duk dak lo thil tam tak min zirtir mek bawk. USA rama sakhaw kal sual an sawi ṭhin, HEAVEN S GATE an tih ho pawh khan internet-a webside hmangin an thurin an vawrh darh ṭhin a nih kha. Thil ṭha lo tam tak hi hmuh tur leh hriat tur a tam a, chuvangin media lama hma kan sawn zel lai hian heng kan hmasawnna te hian kan nun a tibawlhhlawh thei em tih in zawt ṭhin ila. Thianghlimna kawng ata min hruai peng ṭhin em tih in zawtin fimkhur tak leh uluk taka media hi kan hman thiam ṭangkai a hun e.
- George L.Ralte