DIKNA CHANVO PEK A HUN
Pasalṭha sa pela ram chhuakte chuan hnungzuitu an nei ṭhin a, sa an kah chuan an sa kah sa an chan chu a hnungzuitute chan tur an chhep hrang thliah ṭhin. Ram vaka sa pel chu thil harsa tak a ni a, kham chhengchhiaah te, zum leh hriam karah, thosi leh vangvat karah te an kal a ngai ṭhin.
Dikna leh rinawmna pawh hi awlsam taka neih theih a ni lo. Ṭhenkhat chu mi hmaah dik leh rinawm taka lang, mahse mite hmuh loah amah leh a chhungteah rinwm lo leh dik lo takin thil an ti leh tlat ṭhin. Ṭhenkhat leh thung chu rinawmna leh dikna sawi mawi thiam tak, an thusawi anga awm leh chuang si lo an ni.
Miin dikna leh rinawmna a nunah a lak luh hnu chuan rinawm tak leh dik taka thiltih zel a duh a, thil tih dik loh a hlau ṭhin. Mite thiltih dik lo a hmuh chuan a rilru a tina ṭhin. Mi dik chuan a ngaihtuahnaah chuan mite angin ti ve duh ila chuan in ṭha pui pui leh motor changkang ka nei ve tawh tur a ni a tih chang a awm ṭhin.
A chhungte pawhin mite tih ang chu ti ve mai turin an nawr ṭhin. Mahse dikna leh rinawmna chu a nunah a lo lakluh ngheh tawh avangin rinawm takin a tuar a, in chhete ah an chhungkuain zahawmna nen an la khawsa mai a ni.
Ram sa peltu kalkawng ang maiin dikna leh rinawmna vuan nghet tlattu kalna kawng chu a bumboh a. Kawng zim tak, a diptu hnim leh hling tamna hmuna kal ang a ni. Tunlai khawvel sualnain ro a relna hmun, dikna phatsantute awmna hmun, mahni hmasialna leh duhawmna ten ro an relna hmunah hian mi dik leh rinawm chu a kal ve zel a. Hriat leh biak a hlawh lova, miten an ngaisang ve lo, kawngsirah a kal zel ṭhin. Khawhar taka a kal ni a tam ṭhin. Mahse engkim min petu Lalpa chuan chumi chu a hmuh ṭhelh hauh lo mai.
A lungngaihna chu a zuk tuam dam ta zawk a, a thiltihte a in enlet a, a lung a awi em em a, lungmuang takin a khum laizawlah a muhil siai siai ṭhin. Rinawmna leh dikna a nuna a vawn ngheh tlatna tluka hlu leh a nun tinuamtu thildang an awm lo tih a hriat tlat avangin a nitin nun chu lungawi takin a hmang chho ta zel a ni.
Tlawmngaihna leh huaisenna kan ramin kan chawivul lai hian rinawmna leh dikna hi a sirah namtlukin a awm mek a. Kan ram tana pawimawh ber chu dikna leh rinawmna hi a ni zawk si.
Mi dik leh rinawmte chu zawng chhuak ila, chawimawi ila, an chanvo tur kan chheh hran hi a hun ta. Dikna chanvo chu chawimawina te, rinawmna te, hmingṭhatna te a ni si a.
- H.Neihchungnunga, Durtlang North