Misual tlêm leh mi ṭha tam tak!
Krismas a ni leh dawn a, veng tinin mahni vêng chhung a lo thianghlim theih nan hma kan la ṭan a, duty dan tur pawh kan tichhuak leh ṭan ta. Hetih mek lai hian kan ram hotupa ber mai chuan minister 12-te tihṭhat loh hi pastor sang rualin an siam ṭha thei tih a sawi a, kan ram pastor-te chu an thawh suau suau a ngai dawn a nih hi!
Vêng chhunga kan duty a, mi awm ṭha duh lo kan vên ṭhin hi an tlem khawp mai a, mahse an thil tihchhiat leh pawi an khawih erawh a lian thei hle. Misual pakhatin TV cable hrui a lo rûk hlauh chuan vêng pumin TV kan en thei lo dual mai. Mi ṭha tam takin thil ṭha tam tak an tih ai hian misual pakhatin thil ṭha lo pakhat lek a tih hi a langsar a, pawi a khawih nasa a, thil ṭha tam tak a hliah nghal ṭhin.
Mizoram veng leh khaw hrang hranga kan duty ṭhin nachhan chu misual awm ṭha duh lo tlêm tê an ni. Heng mi tlêm tête pawi khawih hian a nghawng lian hle a, ram puma vên hut hut tham a tling. Police-in an vêng a, an vêng hneh tâwk lo a, khawtlang ṭangrualin hma an la bawk a, chuti chung pawhin kan invêng hneh tak tak hlei thei lo chu a ni. Hetiang tak hian sual vên hi a harsa a, thil ṭha tih hi a langsar lo hle.
Mi pakhat, vêng chhunga pawimawhna em em nei lo, thuneihna pawh nei hauh loin pawi a khawih nasat theihzia ngaihtuah hian kan Chief Minister thusawi aṭang khan kan ram chu tihngaihna thlawt a awm dawn lo a nih hi tih ngaihtuah mai awl tak a ni.
Thuneihna nei miah lo, sum leh pai pawh nei bawk hek lo mi pahnih khat tihchhiat hi khawtlangin a tuar a, chhungkaw tam tak tana mut titui lotu a tling a, kan minister 12-te thil tih chhiat phei chu nasa tak a ni dawn a, Mizoram pum tan hian mut tui lohna tham a nih mai bakah, siam ṭha tur lek phei chuan a ngaihna a awm dawn em ni aw tih mai tur a ni.
Minister chuan thuneihna a nei a, sum leh pai a nei a, ho tam tak a nei bawk. Mi pakhat chauh pawhin a tihchhiat hi a nasa hle dawn tih a lang reng a, mi 12-te tihchhiat phei chu a ngaihna a awm lo hle zawk. Hetiang minister, kan pastor rualten an tihchhiat an siam ṭhatsak beiseia tichhe ṭhin hlir kan nei a nih ngat chuan Mizoram tan hian hmasawnna a beisei ngam loh a, dikna a beisei ngam loh a, intluktlanna phei chu mumang lamah pawh mang lo tur law lawa kan inngaih hial a ṭhain ka hria.
Minister-te ho khawm a, an tihchhiatah pawh zilh theitu bera kan ngaih Chief Minister ber pawhin ama tih turah a dah tawh lo a nih hmel a, chuti a nih chuan heng minister-te lakah hian kan Chief Minister meuh pawh a beidawng tawh hle tihna a ni thei. Chief Minister hian a rilru tak tak a sawi a nih hmel a, chuti a nih chuan a minister, an tihchhiat pawh a siam ṭhat theih tawh loh, tihngaihna a hriat tawh lohte hi pastor-te hnenah a refer a ni ber tawh em? Chuti a nih chuan tuna kan minister-te hi an rintlak tawh loh hle tihna a ni bawk. CM hian minister-te hi an tichhe ṭhin tih a hre reng tih a lang a, a hlauh avangin a bân ngam tawh bawk si lo tihna a ni a, kan CM hi a khawngaihthlak hle a ni.
Thuneihna leh sum leh pai pawh nei miah lo misual tlahlang pakhat pawh khaw pumin kan chhiat phah a, kan manganpui a nih si chuan sum leh pai nei, thuneihna nei bawk kan minister-te pastor sang rual vel lek tan chuan a huphurhawm ka ti hle. Khawtlang hruaitutena an tih ṭhin dan angin, heng minister, thil tichhe ṭhinte hi man a, an ṭhat theih nan jail lamah thawn mai hi kei chuan ṭha ka ti a, kan ram tan pawn a hlawk zawkin ka ring.
- Rochungnunga