Krismas-ah i zai zel ang u

Mihringte hian Pathian faka kan chawimawi theihna sang ber chu Amah faka zai hi a ni ang. Pathian pawh hian fak a duh a, Amah kan fakna tur chuan 'hla' hi a thlang bik em ni tih mai turin Bible-ah pawh hian Amah fakna leh chawimawina hla awmna 'Sam' hi a lian ber a, bung 150 zet a awm a nih hi. Sermon tam tak aiin Pathian hla pakhatin kan nun hi a khawih zawk chang a awm fo a nih hi.

Pathianin mi­hringte hnena a thil­pek hlu ber chu a fapa Lal Isua a ni. Lal Isua kan tana a lo pianchampha chu khawvela mi tam berin December ni 25 ah kan lawm ṭhin a. Lal Isua lo pian dawn leh pian lai vela thil lo lang chiang em em chu - Lal Isua lo pian thu hi hla hmanga puanchhuah a ni.

Chanchin Ṭha Luka ziak kan en chuan Lal Isua nu Mari chuan Pathian a fak a. (Lk 1:46-55) He fakna hla Bible mithiamte'n an sawi zui dan leh a hun lai boruak vel chu sawi lo ila. Heta thil lo lang chiang em em chu Lal Isua kan tana a lo piang (tur) hi Pathian hnena lawmthu sawia hlim tak maia zai mawlh mawlh tur kan lo nihzia a lang

chiang hle.

Tin, Luka ziakah bawk hian Baptis-tu Johan-a pa Zakaria Pathian fakna hla kan hmu bawk. (Lk 1:67-79) A hla thu hi kan chhiar chuan Lal Isua lo pian tur thu leh a fapa Johna'n a kawng a lo sial sak dawn thu kan hmu. Heta

ṭanga lo lang chiang leh em em chu Lal Isua lo pianna hi fak hla saa lawm tur kan ni. Krismas-ah hian zaikhawm tluk tluk tur kan lo ni, chu chu Pathian thu pawh a ni.

Hetah mai hian a la tawp lo. Berampute'n beram an ven lai khan vantirkoh an hmaah lo dingin Lal Isua lo pian thu kha a hrilh a. Chumi a hrilh zawh chiah chuan vantirhkoh kiangah van mipuite lo awm khawmin Pathian an fak a:

"Chungnung berah Pathian ropui takin awm rawh se

Lei chunga a lawm em em

Mihringte hnenah remthu leng rawh se" (Lk 2:14)

Chuti ang chuan Vana mipuite pawhin Lal Isua lo piang hi an lawm em em a, Pathian an fak thu hi Bible-ah chiang takin kan hmu. Chuvangin, keini mihring te phei hi chuan Lal Isua min pek avang hian Pathian hnena lawmthu sawia faka zai tur kan nihzia hi i hre nawn ang u.

Mizote phei hi zai ngaina hnam kan ni a. Kan kohhran hi thlarau lama a nun leh nun loh teh fung taka kan hman ber pawh kan zai tui leh tui lohah, kan lam nasat leh nasat lohah te kan teh fo ṭhin. Krismas a zaikhawm Pathian fak hi Pathian thu a ni a. Zaikhawm hi ning lo a uar sauh sauh tur kan ni.

- Rinfela Zadeng