Nakkum mai hi inthlan a ni ta

Kan thupuia luh hmain 'nakum' tia ṭhangthar tam takin an ziah hi 'nakkum' tih tur a ni a, kum 2023 hi Mizoramin roreltu tura kan duh ber kan thlan kum a lo ni leh dâwn ta.

Kum nga chhung roreltu tur hi tumahin min thlan sak dâwn lo. Kan thlan fuh leh kan hlim ang a, kan thlan fuh loh leh kan âng kan âng leh dâwn a, tun hi bengsika kan ngaihtuah hun a ni e.

Chhei le tunah hian kan ram hruaitu tur thlang hian vote hi han thlak thut mai ila, tunge tlinga i rin ve le ka ṭhian? Tunah hian vote hi thlak dâwn ni ta ila party pahnih hian 50-50 chance an nei anga ka chhut ve mai mai a. Keia chhut hi chuan mithiam chhutna a dâl lo bawk a, ka hmuh danah MNF leh ZPM hian 50% chance ve ve ang tlin theihna an nei. Hei hi tun aṭanga thlà 12 boruakah hian a danglam duai thei tih erawh politics lam ngaihven lem lo pawhin kan hriat chian sa a ni.

MNF hian fakna tur thil tih an ngah lova, mahsela an chhuanlam 'Covid vangin sum a harsa' tih hi thingtlang lamah keia rin ai daih hian mipui hian an lo pawm a lo ni reng a. MMF sorkar chu hnathawhna tur sum neih loh vanga hnathawk thei lo angin an ngai a, an lo ngaidam khawp mai. Covid avanga central aṭanga sum kan hmuh hnem dan leh mipuiin maktadûai tel kan thawh te, kohhran leh khawtlangin kan building, hmunhma leh sum kan thawh dante en chuan Covid lamah khan sorkar hi a hlawk zawka ngaihna a awm asin. Kha Covid hunlai khan sorkar hian a sum sen tamna tam takah a seng lo asin. Motor kawng siam leh laih hi pawisa hman tamna a ni a, kawngpui zawhtu awm mang lo chu a tlo em em a, sorkar a che mang lo, thil dang pawh sorkar pawisa senna ṭhin hman ngai ta lo a tam hle.

Covid lai tho khan Kamrula leh tu tute firm emaw chuan a vaibelchhe tel telin hna an thawk a, MNF worker thingtlang lam pawisa dawn ve loh chhanah Covid an sawi mam a, a takah chuan Covid laiin hna lian zawng zawng an insem si a ni. Chutih lai chuan sorkar hnathawkte hlawh hrensak an ni a, an hlawh lâk ve theih hunlai lah chu thlà chanve hnu lam a ni asin.

Engpawhnise MNF hian Minister lansarh chak uchuak te pawh a nei a, Minister beisei phak lo tak takte a nei bawk a ni. Kuhva smuggling chungchangah a hming chhe chung hian, MNF ruhkawl hi an tam sa hrim hrim a, inthlan dawna sum nei ber tur an ni bawk nen 50% chance an la nei ka ti a ni.

ZPM hi party naupang leh structure pawh la mumal ve lo an ni a, ka rin ai daihin heti chung chung hian mipuiin an lo ngaizawng daih mai. Kan fate ang rual vote thlak ve tur (first time voter) hian kan Chief Minister neih mêk ang chi hi an vote châk lo a, hming chhiatna la nei lem lo (sorkarna a la chelh ve loh vang mai mai a ni thei bawk) ZPM lam hi an awm deuh tituai a ni.

ZPM hian tun aia in zawrh an thiam phei chuan tling ve thei an ni tlata hriatna ka nei. Aizawl lamah hian seat 8-10 la thei niin an solid ve thut thei bawk si a, hmun danga an mamawh hi a tam tawh lo riau a, mahse Aizawl hi solid tur chuan candidate lamah an ṭan a ngai dawn. MLA ṭang lai pawh ni se an siksawi ngam a pawimawh dâwn a, MLA candidate ṭhalai viak ṭha leh mi thiam lam han thlur se a danglamna an hmù ang (kum 2008 khan Congress President Pu Lalthanhawla khan candidate thar leh ṭha zawk lâk khawm hi a lo chak pui tawh a ni).

Congress hi chu an tlakna a la rei lo a, mipui hian rorel turin an la tar chhuakin a rinawm lo a ni.

Kum 2023 aṭanga kum nga chhung roreltu tur hi mipui kutah a awm leh ta a ni.

- Vanlalauva