Pawisa nawi thir (coin) hi
Pawisa thir nawi chung chang nitin chanchinbuah kan hmu zauh zauhva. Dawrah an la hreh a, a dawngtu lam hian an dawng hreh tlangpui mai tih kan chhiar zauh zauh bakah sawi thawm te ka hre ṭhin. Kei tak chuan ka la tawng ve lo. Ni 26.10.2017 tlai dar 3.30 khan buzar bus stand aṭanga chhim lam kal tur city bus-ah ka chuang ve chu, cheng 10 thir (coin) pek ka tum a, bus conductor chuan coin chu la duh lovin cheng 10 note min dil kher a nih chu. Amah lah chuan pawisa nawi thir a kir ve tho bawk sia. Coin chu a dawng duh lo tih a sawi! Chumi tlai la la chuan document pawimawh dawrah ka xerox tir a, dawr neitu chuan coin pe lo hram ila a duh thu leh, coin dawn ai chuan Rs. 6 aiah Rs 5 note dawn pawh a duh zawk thu a sawi a. Hetiang boruak hi ka tawn vawi khatna a ni a. Engtizia nge hetianga coin hi kan hmuh le, a ṭha lo hle mai.
Kum 1972 vel, Emergency hun lai, Pi Indira Gandhi rorel lai khan Guwahati-ah pawisa nawi a vang tlat mai a, khawl ṭhin an awm niin an ngai a, chanchinbuah pawh dah bo lo tura ngenna an ziak fo a ni. Bank ho pawh, RBI chawpin bazara hman tur coin lachhuak tura mipuiin chanchinbu kaltlang tein ngen an ni. Chutiang deuh tho chuan kum 1990 leh kum 2000 inkar vel kha ni tain ka hria, Aizawlah coin a vang tlat mai a. Mipui mangang chuan Bank ho, a bikin SBI kha coin lachhuak turin chanchinbuah te ngen an ni.
SBI tan hian pawisa thir lakchhuah hi a chakawm vak lo ang. A chhan chu tangka thir chu a rit a, a rih ang huin a amount a tlem si a, chhiar leh vek tur phei chuan Bank-a thawktuten hun an nei lo. Khawih loh theih chu an duh ber. Bank tan chuan tangka thir khawih chet vel hi a chakawm loh em em a ni. Mahse, market/ bazar-ah a tel lo chuan lei leh hralhah buaina a awm. Rs. 8 man thil lei duh ila, Rs. 10 note kan pekin Rs. 2 aiah sweet min pe mai. Rethei tan chuan Rs. 2 kha ‘lek’ a ni lo khawp mai. Rs. 2 ai hetianga a kal zel khan Rs. tam man sweet kan kawl mai a ni.
Lengpui Airport building chhungah Frooty ka lei dawn a, a man Rs. 15 an ti a. Rs 20 ka pe a, Rs. 5 min kir tur a neih loh avangin a aiah hmawmsawm ‘Madly Twists’ min pe a. Kei khan duh ta lo ila, ka lei lo a ni mai a, dawr neitu pawh khan a bungrua zawrh a hralh dawn lo a ni mai. Rs. 5/- aia hmawmsawm pakhat ka lak khan ka hlawk miah lo, kha hmawmsawm kha ka ei chak bawk lova, midang pek mai mai tur a ni. Ka thil leiah chuan ka lawm lo a ni. Pawisa nawi remchan loh vang hian Aizawl khaw chhungah hian nikhatah khatiang kha engzat nge thleng ang, mi engzatnge an thil leiah lawm lo ang a, Rs nuai engzat nge a kaihhnawih ang le? ‘Customer’s satisfaction is our motto’ tih ziak dawr chhunga tar nen phei chuan a inhmeh lo khawp mai.
Lunghnur (unsatisfy) deuh hlek chung chuan hmawmsawm fun nen khan Frooty chu ka la ta bawk a, zuartu chu a tum aiin a hlawk ta a ni mai a. Rs. 5 nawi min kir tur a neih loh avang khan la/ lei duh ta lo ila, a sumdawnna a sukuk dawn. A dawr level han en khan Frooty-a ka hlep chu a te tham em tia ngaihthah ngawt chi a ni lo. Khatiang kha Aizawl khawpuiah hian nikhatah engzatnge awm/ thleng ang a, sum angzat nge a kaihhnawih ang a, sumdawngten Rs. eng zat nge an chan ang le?
Pawisa nawi awm lo chuan mipui vantlang min nghawng a, harsatna min siam a ni. Pawisa nawi thir tualleng tlem vanga harsatna sukiang tur chuan bank chuan tangka thir chu a la chhuak ta ngei a, bazarah pawh kan awlsam phah ta a ni. A tak takah chuan thil a man zat ang taka kan hralh or lei theih nan bazar-a leng vel reng tura coin hi mamawh kan ni. Dan chu ni lo mah se coin hi bank-a a hlawm hlawma dah let leh atana lakchhuah a ni lo; bazara kan awlsam tlanna tur atana tih a ni.
Hmanni lawk khan nitin chanchinbu pakhatah coin dawn duh loh ngawtin nghawng ṭha lo a neih theih kan hmu. Emergency lai pawh khan coin dawn duh loh chu India sorkar hmuhsitna, lungin tan thlenga nghawng thei tih te a riin ka hria. India mi leh India ram chhunga hman tur chuan coin dawn loh ngawt hi a fel lovin nghawng ṭha lo tak a nei thei tih hre teh ang u.
- Ropiangliana