Mau/ Rua bawk hi

Kan CM Pu Zorama Flagship Programme Mau/Rua an sawi a hi, hmun dang aṭanga a chah luh Brandisii leh Latiforus a ni a. Mahse, ZPM Leader Serchhip Bialtu MLA Zahawm tak Pu Lalduhawma chuan "Bradasii hi Mau duap, natna ngah tak, sawngbawl loh chuan kum khat pawh daih lo," a ti a. Latiforus mau pawh mau duap tho, natna ngah, sawngbawl loh chuan kum khat pawh a daih lo a, khawi company-ah mah thil siam nan an hmang lo tih ni 23.10.2019 Vanglaini chhuak phek hnihnaah khan a sawi a. A sawi ang tak tak a nih si chuan kan pu ber CM leh a thawhpui zahawm takte hian tum dan nen a inang lo deuh dawn niin a lang tlat.

Kan Ruling lam MLA zahawm tak pakhat chu ti hian ka zawt a, "Sir, kan CM hian tinge Mizorama mau awm te hi hman sen loh a awm lai a, hmun danga mi kher chin a tum mai le?" tiin ka zawt a, ani'n chhanna min pek chu "E, Mizorama mau kan neihte pawh ṭangkai takin kan la hmang zel dawn alawm. Chutih lai erawh chuan tuna kan mau chin tum hi chu mau lian chi leh tha chi a ni a, a puitling thei a nih chuan a ṭangkai hle dawn a ni. A hmanna tur pawh na mai lo tak a ni. 

Thing a vang zel a, thingzai te pawh a to tawh hle. Thingzai aiah heng maute hi a hman theih dawn a, insaknaah kan hmang nasa dawn a ni. Chubakah, hetiang ang mau hi India ramah hian demand a sang a, engzata tam pawh nei ila a hralhnaah leh thawn chhuahnaah a lungngaihthlak dawn lo" tiin min chhang. 

Chutih lai erawh chuan Official taka public hmaah erawh tuna kan pu berin mau a chah luh hi a hmanna tur a sawi ka la hre fuh chiah lo a, a sawi lo nge a sawia ka lo hre fuh lo zawk! 

Ka ngaihtuahna lo lang chu, Pu Duhawma thusawi anga mau hi a ṭha vak lo tak tak a nih chuan kan CM mau chah luh hi an sawi ang ngawt chuan kan hmang ṭangkai dawn lo tawp tihna a ni. Pu Duhawma sawi ang ni loa a lo ṭhat phian erawh chuan Zoram hian kan va vanneih pui dawn em! 

Kan MLA zahawm tak pakhatin a sawi ang tak taka hman tangkai theih a nih a, kan tharchhuah ang ang hralhnaah buai loa thawn chhuahna kan hmuh zel theih dawn phawt chuan IAS meuh pawh a hna bansanin  mau hi a buaipui lo ang tih sawi a har dawn! 

Mahse kan ti leh ṭalh te ang - Brandisii leh Latiforus lo ching tawhte aṭanga thlir chuan IAS bansanna tur em chuan a hlawk lo te pawh a ni mahna - tumahin IAS bansanin mau a buaipui tih thawm a awm lo. 

North East state tho Manipur-ah pawh Meitei hovin an ching a, North East Manipur hel tam tak khian an helna bansanin mau an buaipui lem lo. Tunah pawh hian hel pawl hrang tam tak hi Manipur, Nagaland Assam leh Tripura-ah te hian an awm mek a ni.