MNF leh kawngpui

Congress sorkar lai khan MNF party au hla ber pakhat chu kawng chhe chungchang a ni awm e. An rawn sorkar leh theih chhan zinga pakhat pawh a nih a rinawm. 

MNF-in sorkarna an han chang a, hun reilote chhungin Chief Minister-in kawng chhiatna hmun tlawhin, kawng siam hna pawh thawh chhoh nghal a ni. Kan kawngpuiin hma a sawn a, MNF sorkar pawhin fak a hlawh chho hle.

Mah se, fur an ni chho a, kan chak lakluhna ber kawng chu lirthei tlan hleih theih a ni tawh lo. Lirthei an tang a, ṭhenkhat an lo tlu thul. MNF hian an beisei angin kawngpui an siam ṭha thei bik dawn lo em ni? 

Kan CM-in kawng siamṭhat loh chhanah Covid-19 a puh a, kei chuan ka pawm ve lo. Covid-19 vangin lirthei veivak a tlem a, inkharkhip ṭan chho thla hnih vel kha chu lirthei a veivak mang lo. Kawng siamna atan hun duhawm tak a ni. 

Hnathawk tur hmuh loh tihvel hi chhuanlam tlingah kei chuan ka ngai ve lo a, inkharkhip avanga mipui kan harsat lai, hnathawh tur awm loh lai khan Mizo zingah ngei hnathawh tur duh an tam viauin ka ring.

Kawng chungchang hi MNF khan an aupui ring bawk a, mipuiin kawng an enkawl dan kan thlir reng dawn a ni. Eptu an nih laia an aupui anga kawng hi an siam ṭha thei a nih chuan an sorkar leh phah thei. Chutihrualin, kawng hi an tlakpui ve leh thei a ni. 

Hun rei tak chhung Mizoramah hian kawng hi political party-te'n inbeihna atan an hmang tawh a, engtikah tak kawng ṭha taka siam a nih ve ang tih hi mipuiin kan thlir ṭhup a ni.