A KHAWBUNG LEH TA

He thupui hmanga Vanglaini-a ka thuziak chhuak kha kan Khawbung unau ṭhenkhatten an lo hrethiam lo deuh a. Thil awmdan ka han sawi chiang dawn a ni.

Hun vawn dik thu-ah te, chanchinthar puan thu-ah te, Zonet, DDK, All India Radio ten belhchian an dawl loh thu ka ziak ṭhin a. Belhchian dawl lo lehzuala thu an rawn puan chang hian, ‘Khawbung a ti ta deuh deuh’ tih thupuia hmangin thu ka chhuah ṭhin. Tunhnaia kan Chief Minister thusawi belhchian dawl lo tak tak chungchang ka ziak ṭum khan, ‘Khawbung a ti ta deuh deuh’ tih thupui hmanga ka thuziak lo chhiar ṭhinte tan chuan danglamna vak a awm lovang tiin, a tawi zawngin ‘A Khawbung leh ta’ ka rawn ti ta kha a ni a.

Hei hi hetiang thupui ka rawn hman dan a nih avangin kan Khawbung unaute tan hriatthiam loh tur awmin ka hre lo va. Hrethiam lo deuh te an lo awm palh hlauh a nih pawhin ka tih chhan leh ka tihdan chu lo hrethiam turin ka beisei a ni.

Kristian kan nih hma, kan pi leh pute huna Hnam Rinawm, Hnam taima, Hnam tlawmngai, Hnam huaisen ni-a Zonunmawi par vul lai kha kan Mizo hnam ngaihsanawm leh zahawm a nih lai hun a ni a.

Tun hnu-a heti taka kan lo tluchhe ta hi, Politics leh Kohhrana inkaihhruaina ṭha kan neih loh vang niin ka hria. In siamṭhatna kawng ṭha leh awm chhun chu pi leh pute huna an nunphung tharthawh leh kha niin ka hria a. Chutiang atan chuan kum hnih chhung vel pi leh pute sulhnu chhuiin Khuangchawi ‘program’ te hmun hrang hrangah ka hman pui a.

Chutiang ka tihna lamah chuan Khawbung leh a chhevel khuate hi Zonunmawi la vawnṭhatna ni-a ka hriat avangin Khawbung khua hi bulṭan nan ka hmang a. Pahote nen zanlai pel rak khawpa sawihona te pawh kan nei ṭhin a ni.

Vaphai, Sialsuk, Hnahlan te-a Khuangchawi ‘program’ ka neihpui hnu-ah, vawi thum khuangchawi chuan Zau a dawh thei tih chang­chawiin, kum 2002 tir lam khan Zaudawh program Khawbung khua-ah hian kan hmang a. Kan thiltumah pawh hlawhltling kan inti viau.

Heng aṭang pawh hian a deusawh zawng emawa Khawbung khaw chanchin sawi mi ka ni lo tih chu a chiang tawk hlein ka hria.

Engpawh nise, kan Chief Minister thusawi belhchian dawl lo lutuk sawi chian nana, a thupuia ‘A Khawbung leh ta’ ka tih chhan hrethiam lova, kan Khawbung unaute zingah ngaih loh lama lo ngai an awm chuan hei hi an ngaihdam ka dilnaah min lo pawmsak turin ka rawn ngen a ni e.

- M. Lalmanzuala