The politics of LSC & Election affidavit

Kolkata-a Pu Lal Thanhawla in hmun 300 square metre zatve a zau hi in hmun ka lei ve a, chumi hnuah ka In hmun ramri chiaha mi, a hmaa ka lei aia zau hret chu ka lei belh leh a; he ka In hmun pahnih lei hi a hma chuan LSC pakhat niin 318 sq. m a zau a ni a. Tichuan, a vaia belhkhawm chuan Kolkata-a Pu Lal Thanhawla In hmun aia zau hret a ni ta a nih chu. LSC pahnih chhungah hian chhungkaw member 7 chenna tur tawk In pakhat chu a sak theih a, chumi hisapa sorkar pawhin plot len zawng pawh a ram ṭhenawma mi te nena intiat tlang taka siam chu a ni reng a.

Ram kan inleisak hian a neitu hmasate nen a hmingin plain paper-ah man inhlanna kan siam a, hriatpuitute nen hming kan sign thlap tlangpui a. Mahse, LSC neitu hming thlak (mutation) dawn chuan a hranin Non-Judicial Stamp paper-ah Sale Deed siam tir thlap a ngai a. Chutah chuan ram inleina man zat, a neitu hmasa, a leitute chungchang ziakin a tawpah a hralhtu leh a leitute bakah hriatpuituten hming an ziah hnan leh thlap ṭhin, Sub-District Registrar pawhin a sign hnan thlap a ngai lehzel a. A ram neitu hmasa leh a neitu thar passport thlalak pawh Non-Judicial Stamp phek tawp lamah bel a ni. Sale Deed a ram inlei ni anga ziah leh Indian Registration Act, 1908 in a phut anga District Registrar, Aizawl District hnuaia Sale Deed ziah luh ni (Registration tihfel ni) hi a inang kher lo thei; a chhan chu Sale Deed hi LSC neitu hmasa leh hriatpuitute sign thlap a ngaih avangin a hmunah an rawn kal ve kher loh chuan an signature la tura In lama hawn a ṭul ṭhin vang a ni.

Sale Deed siam rual hian Revenue Deptt Staff ten ram hlut zawng aṭanga min chhutsak Registration Fee pawh SBI (Aizawl) ah Challan hmanga pek a ṭul a, kum tina Land Revenue kan chawi tur zat pawh min chhut chhuah sak vek hnuah LSC neitu hming thlakna turin file a kal chhuak thei chauh a ni. Hming thlak tur hian Settlement Officer hmaah voter’s ID kengin LSC neitu hmasa leh a neitu tharte an inlan a ṭul, hei hi pumpelh theih a ni lo, tih ngei ngei ngai a ni. LSC neitu hming thlak hi Aizawlah chuan a buaipuitute remhriat leh file an umzui peih leh peih loh a zirin a reiin a rei lo thei. Ka hmelhriat pakhat chu amahin a buaipui hman loh avangin thla ruk hnuah a LSC thar, ama hming chuanna ngei a hmu thei ve chauh. Buaipuitu awmah erawh kar khat chhung lekin an tifel thei mai thung.

Kolkata lam ve thung: Keini’n helaia Sale Deed kan tih hi Pu Lal Thanhawla In hmun neihna Non-judicial Stamp-ah chuan Deed of Conveyance an lo ti a. A lei tirtu hi West Bengal sorkar hnuaia Corporation pakhat Housing Infrastructure Development Corporation Ltd (HIDCO) niin Feb., 21, 2011 daih tawh khan HIDCO Joint Managing Director hian Pu Lal Thanhawla hnenah In hmun (plot) a dilna anga Plot No AI-178 (Jyoti Basu Nagar chhunga Action Area-IA) chu HIDCO Chairman-in a ngaihtuah thu leh cheng nuai sawm paruk, sangkhat leh zaruk (Rs. 16,01,600) pek a ngaih thu lehkhain a hrilh a. Lehkhaah hian HIDCO hnuaia In hmun (Plot) hi Application Form hmanga dil tur a nih thu leh Application Fee pawh Rs. 1,60,160 (cheng nuai khat, sing ruk, za leh sawmruk) a nih thu pawh lehkhaah hian tarlan a ni bawk. HIDCO Ltd duhdan ang thlapa application fee pe a dilna an thehluh chu Chairman Discretionary quota (HIDCO Chairman quota liau liau) hmangin pawm a nih thu (offer of allotment) chu April 13, 2011 khan Pu Lal Thanhawla hi lehkhain hrilh a ni. Tichuan, HIDCO leh Pu Lal Thanhawla te hian Deed of Conveyance chu Aug., 30, 2013 ah an ziak a, Registration pawh hemi ni vek hian an tifel thei nghal a; mahse a ram neitu nihna tak tak, HIDCO Ltd-in ‘Allottee’ tia an vuah nihna (keini LSC tlukpui) erawh Pu Lal Thanhawla hmingin New Town Kolkata Development Authority hnuaiah la siam tur a ni thung.

LSC hming thlak tura Mizoram Land Revenue & Settlement Deptt a Settlement Officer hmaa inlan hun hi a ram hralhtu leh leitu remchan hun hun a nih laiin West Bengal-ah chuan inlan hi ‘Hearing’ an lo ti a, a hun tur ni an siam (fix) thlap a ni maithei, Pu Lal Thanhawla pawh a ram neitu a nihna angin July 4,2014 ah amah emaw amahin a aiawh tura a ruatte inlan turin New Town Kolkata Development Authority chuan April 22, 2014 khan lehkha a tichhuak a. Chumi hnu fe July 25, 2014 ah Pu Lal Thanhawla hmingin New Town Kolkata Development Authority hnuaiah ram neitu nihna kimchang ‘Record of Title of Land’ (keini LSC tlukpui) chu tihfel a ni ta chauh a ni.

Qualification: Kolkata khawpui tawt lutuk tihzauhna atana khawper an din mek New Town Kolkata-a In hmun nei hmasa zinga tel thei turin milar leh thiltithei nih a ngai. HIDCO Ltd hnuaiah hian tumhma aṭanga an lo chin ṭhin ni maw, Chairman Discretionary quota-in a market value aia hniam daihin In hmun neih theih a ni

ṭhin a. Chumi chang tur chuan milar leh thiltithei nih a ngai khawp ang, vanneih hle pawh a ṭul ngei ang; application form pawh heng mite tan hian a hran siam bik a ni nghe nghe. Tichuan, milar leh thiltithei engemaw zatin New Town Kolkata-a In hmun an neih hnu chuan chulai hmun hlutna pawh a lo sang chho ta dawrh mai dawn a, sumdawnna strategy theuneu lo tak a ni. Pu Lal Thanhawla pawh milar leh thiltithei dangte ang thoin Plot No. AI-178 lei tir a ni ve ta a; HIDCO Ltd lamin a ram an leitir phalna zat (offer price) Rs. 16,01,600 (cheng nuai sawm paruk, sangkhat leh zaruk) bakah Application Fee atan ram an lei tirna 10% (Rs.1,60,160 ) chawi bawkin, a vaiin Rs.17,61,760 (cheng nuai sawm pasarih, sing ruk, sangkhat, zasarih leh sawmruk) pein ram neitu nihna tur atana loh theih loha siam ngai Deed of Conveyance chu HIDCO Ltd nen 30th Aug, 2013 khan an siam thei ta a ni.

Deed of Conveyance (Sale Deed) hi Pu Lal Thanhawla leh a ram leitirtu HIDCO Ltd te inkar mai a la ni rih. A ram neitu thar hian Registration Fee leh thil dang engemaw zat, cheng nuai khat dawn a pek a la ngai. Thil tihfel ngai zawng zawng an tihfel hnuah New Town Kolkata Development Authority hnuaiah Danin a phut angin Plot No.AI-178 chu Pu Lal Thanhawla hmingin ziahluh (record) ve tur a lo ni ta. Hei hi July 25, 2014 khan ti felin, keini’n helama LSC kan tih nen a intluk.

Mahni sum tel loin In: Khutiang hmuna In hmun (plot) neih harsat turzia leh mi vanneih bik nih a ngaih chu thuhran, kan Bible pawhin ‘a nei chu pek belhchhahin an awm’ a tih ang deuhin In satu company (private developer/ company) te nena inremsiamin mahni sum seng miah lo pawhin khutiang hmunah khuan In ṭha tak a neih theih. Nakinah a luah man aṭanga senso in rul zel tur pawhin inremna an siampui fo. Mizoramah pawh In hmun awmna a zirin hetiang kalphung hi kan ching ve ṭan. In luah duhtu an awm reng dawn avangin a tlo thei ang ber tura sak kha a neitu leh a satu tan a hlawk.

Election Affidavit: 2013 Mizoram State Legislative Assembly Inthlanpui atana affidavit a thehluhah Pu Lal Thanhawla hian Immovable Property a neih list-ah huan (agriculture land) leh In hmun (non-agriculture land) a neihna LSC number leh a hmun awmna a ziak thlap thlap.

Non-judicial paper a Sale Deed/ Deed of Conveyance ringawt kha ram neitu nihna tak tak a la tling lova, Mizoramah pawh LSC dik tak a lo chhuah hma chuan mahni In hmun ngei atana kan lei chhungah pawh In kan sa ringawt thei lo ang tho hian Pu Lal Thanhawla pawh hian document kimchang a mamawh a, chu a mamawh chu New Town Development Authority hnuaiah a ram (plot) ziahluh/ chhinchhiah a nih fel chauhin a In hmun chhungah kut a thlak thei ta chauh reng a ni. Sale Deed/ Deed of Conveyance hmang ringawt khan In sak tum se dan bawhchhia a ni ang. Chuvangin, helama LSC kan tih ang document kimchang a neih hma chuan Nov. 8, 2013 a Election Affidavit-ah Kolkata-a a In hmun khu ziahlan tur a la nei lo a ni.

Tlangkawmna: Social media-ah Politics indona a thlen mek lai hian mipuite pawh kan fimkhur tulh tulh a ṭul khawp mai. Social media-ah chuan miin eng thu pawh an sawi thei, an thusawi tiawihawm turin eng document emaw an la rawn chhawp chhuak fovang. Mahse, mipuite hian thil chik ila, social media hi thu inthawn nan te, thuthar thehdarh nan te a ṭangkai em em rualin thu puarpawleng hmanga mahni inhampuar theihna hmun a ni tih i hre kiau ang u.

- Lallianchhunga, Mizoram University