Inchi 1 pawh hloh lo turin hma kan la

Champhai - Zotlang-a YMA khawnpuiah CM zahawm tak Pu Hawla khan thil tam tak a sawi zingah kan ram inchi khat pawh hloh lo turin hma kan la tih a sawi kha han belhchhah ve hlek ka duh a. State hotu berin khatia ṭhalai rual zinga thu a han sawi kha a ngaihthlak a hahdam hle a, chutih rual chuan engtin tak nge hma an lak chu kan lo hre ve mai lova.

Chemphai lam Cachar ramri velah chuan Assam Police te, Forest Deptt. te an rawn huangtau fo ṭhin a nih kha. Kan UT ramri hrim hrima hi tu sorkhar pawh khan an tawlh sawn lo chu niin a lang a. Chutih rual chuan Mizoram sq.m 500 zet royalty chu UT kan nih chhoh aṭang khan nge Assam sorkhar-in a la la chhunzawm ta zel a. MNF kum 10 an sorkhar tawh a, Congress kum 20 zet an sorkhar tawh bawk.

Zofa Welfare Asso­ciation chuan tuna kan CM Pu Hawla sor­khar lai ngei hian Assam-in kan rama chhiah (ti mai ila) an lak hi chhuh tawh turin lehkha an thehlut a. Document pawimawh zawng zawng an thil tel a, mah se vawiin thlengin he chhiah hi chhuh tumna ala awm reng reng lo. UT aṭangin kum 46 a liam tawh a.

Kan ram inchi khat pawh la hloh lo tehreng ila, a ram hlutna chhiah ber kan chuh ngam si loh chuan kan ram kan hloh tluk hialin a pawi a ni. Chuvangin, kan CM zahawm tak hian vawiin aṭangin kan ram sq.m 500 zet chhiah hi Assam sorkhar lak tir tawh lo sela, an lo lak tawh pawh thing chhuak vek sela, a lawmawm, ngawt ang chu.

Kum 40 chhung chhiah chu kan kum khat budget chanve te chu a ni hial tawh lo'ng maw? Helai thu hi chu Vanlalngaia, Lalbiaktluanga, Ngur­biaka te leh Robert Hrangdawla ten an hre chiang ngawt ang. Thla khat chhung han ngaichang ila enge kan an dawn le? Chhiah kan hloh chuan ram hloh nen thuhmun deuh rengah a ngaih theih ang. Hma kan la ngam lo a nih chuan kumkhua atan kan pe tihna em ni ang?

Kan Politician ten an chen tak tak lem lohna te hi min hrilh fo mai te hi a ni ang e. Chakma Autonomous District Council pek remti a hming ziaktute pawh Politician dam an la awm a. F. Hmingthanga lehkha­bu-ah a chian vek kha. CYMA pawhin thur chhuak a, eng vanga lo remti nge an nih tih te zawh chian a hun khawp mai. Tin, kan ram khawthlang lama Mizoram hung pawna an dah nalai hi Km engzah nge ṭhiat leh a nih tawh? Hriat chian a chakawm khawp mai bawk.

Kan ram luikam ram ṭha lai zawng zawng Central Forest-in kan ta an ti bawk si a. Hemi mipui tana la let leh turin kan Politician ten eng chen nge hma an lak tawh tih te pawh hriat a chakawm.

Kan ram hruaitute chet vel dan en hian kan ram hi a neitu inti ten kan hmang thei lo tial tial mai dawn a ang viau a ni.

- Rualkhuma Hmar