BUKLUNG

Tehna hrang hrang hmangin 'buklung' kan khai ve teh ang. 

Ram pawna awm kan ṭhalaite thlurbingin 'tehna' buklung khai ve dawn teh ang. Teh an dawl leh dawl loh vang lam ni loin ram dang tana kan ram hmel lanna hmasa an ni. 

Eizawnna ṭha zawk zawngin a hmei a pain state pawn leh foreign thleng kan tei chhuak a, hmasawn an tumna hi fak loh rual a ni lo. Chhungkaw tana thlamuanpui tham, hmeichhia ni sia patling title pek phu, rilru nghet leh nun thlahdah ngai reng reng lote hi a tam zawk an nih a rinawm.

Chutiang chu a nih rual chuan, mahni zahawmna leh hlutna pawh ngaihtuah hleithei miah lo khawpa pawlawh kan awm leh zauh ṭhin hian ka hmel a timawk ṭhin thung. 

A bikin, tun hnai tê hian hmeichhe lam, sawi hat tur kan awm leh zauh ṭhin hi a pawi a. Mipa mualpho lohnaa kumkhaw daih mualpho mai ṭhin hmeichhia kan ni asin! Mahni future ngaihtuah map loa tun hun chiah thlira kan sapatal hian ramin a rah chhuah eia tiṭawih raltu ngetlung ang kan ni mai ṭhin. 

Thawh chhuah mila khawsa thiam tura min fuihtute leh zilhhauna tiang lektute kan ṭingmit a, ar pan chuk tui loa chhuahin its my life kan ti thul. 

Zalenna kan hmang sual fo a, kan khaw hmuh tifiah turin tarmit power dik lo kan la vuah zui. Rilru ṭhuanawp pua gold digger nih tumna rilru te kan put chuan, sum hlutna a hniam ang a, kan mamawhna a sang zel thung ang. Awlsam taka sum lak luh duhnain kan rilru a ei chhia ang a, pawn lam nalh loh hlauh vangin chhungril ngetlung kan khertir ang a. Chu chuan kan hlutna thlenga hralh duhna rilru min puttir ang a, mualphona tlang kan dak ziai ziai mai dawn a ni. 

State pawn a ni emaw, ram dang kan awm avanga thiang zau ta lutuk te hi a pawi hle. Khuahkhirhna hnuaia awm thei lo, zalenna hmang thiam si lo nih hi a zahthlak!

Mahni hlutna hralha hnam dang sum chawk luh ai chuan, ' ka kut te hi mawiin no nalh lo mah se, hna a thawk thei a ni' tih kan nunpui thiam hun hunah ram hmel mawina kan lo ni ang a. 'Buklung' khaitu tehna pawh kan tan a dik tawh ang.