TRIBAL SUPER STAR

Mahni nihna hriatchian tluka hlu hi a awm lo va, chu kan nihna chuan chapona tlangah te min hruai thleng thei a ni tih hriat tel erawh a ṭha khawp mai. Tin, kan nihna baka nun kan tumna hi túr hlauhawm tak min tichhe thei khawpa hlauhawm ang hi a ni, kan nun a nih avanga hleihluak taka khawsak kher hi he khawvela kan awm chhan pawh a ni hek lo. Chhia leh ṭha hre rual kan nih chuan kan nun dan tur awm tawk pawh hre tura ngaih kan ni.

Hnam tam takte zinga tribal ti-tribal-tu ve mai kan nihna pawh hriat reng tur a ni a, tribal nih avanga ṭhing uchuak leh khawvel changkanna pawh ûm zo lo khawpa khawsak tum kher pawh a ṭûl àwm lo ve. A âwm leh a mawi hriat hi kan tihtur a ni. Thawmhnaw dawra thawmhnaw tam tak an zawrh kara kan inhmeh tur leh mawi, kan tana ṭha tur thawmhnaw kan lei theih laiin kan nunah hian a ṭha leh ṭha lo duhthlan awlsam tak karah a ṭha zawk thlan harsa kan ti fo ṭhin te pawh ngaihtuahna luah ve thei tak a ni awm e.

Khawvel changkanna kan hmachhawn dan hi han thlir ila, thil tam tak a lo inherchhuak a, a ṭha leh ṭha lo te, a mawi leh mawi lote thlengin thlan fuh leh thlan thiam pawh a har chang a awm mai thei e. Mahse, fimkhur taka he changkanna leh hmasawnna thilte hi hmachhawna hman thiam hi kan tih tur a ni. Nang leh kei hi kan duhna lam lama thle kual vel hman pawh kan ni lo, ram dang leh hnam dangte ngaihtuahin kan ram hian harsatna kan hmachhawn mek a, hmasawn záwng chuan kan kal na meuh mai, hmasawnna tluantling; mite hriat tlaka kan hmasawnna erawh a ṭuan a ṭhu deuh em?

Kan tapchhak zawl aṭangin Korean leh Turkey nula leh tlangvalte eizawnna film siamte kan lo tuipui pawh a àwm viau rualin kan nunah hian thu a sawi ta mah mah deuh em? Kan nulate'n Mizo tlangval pasalṭha (hero) an hmuh thiam loh laiin khawchhak tlangval zingah an tribal thinlung sak tak zawr hnâwp khawpa chiah thei an hmu ta! Social media-ah hian Mizo nula thawmhnaw hak tur pawh nei mumal lote hian an thlalak an upload ngam ve ang em tih pawh kan ngaihtuah ngai loh kha tunah chuan kan hai peih athu a ni ta, hmuh tur a awm tam ta hle mai. Mahni veng leh khuaah pawh mite ngaihsan leh entawn ni ngai lem lo khan, social media-ah chuan tribal super star nih tum ni awm takin nuam kan chen a, hetiang thilah hi chuan tribal nih leh super star nih tum chu thil inhmeh a ni dawn em ni?

In vengah khan tlangval sek deuh deuh eitur tui ṭha ṭha ei ṭhin, nitina inhlawhfa eng zat nge awm? A sek leh a tha ṭha apiangte an inkhêk khal a, eng tikah tak lo che chhuak ve ang che u maw? Lock down leh hripui avangin hnamdangte'n duh angin kan ram min tlawhpawh thei lo, kan ramah hnathawh tur duh tan nitina inhlawhna tur a va tam si em! Mi nuna buai lo tur ni chung si a, kan buai tlat ṭhinte hi ṭhahnemngaihna awka vang a ni tih hriat a va hun tawh em.

Nula vawkchaw khawn nih leh tlangval ration buhfai la nihte hi thil zahthlak a ni lo, mahni lakluh (income) nena inphu lo branded thawmhnaw hâkte hi a zahthlak zawk. Tribal nih leh tuibur hmuam chunga super star nih tum tlat te, sahdah hmuam a, zozial pet kawh vu vu chunga a fing ber leh a hre ber nih tlum tlatna khawvel aṭang hian duplicate super star bak kan nih theih hi a rinawm loh chuvangin zuk leh hmuam lamah te pawh insumtheihna nun neih hi a va hlu em. 

Bawkbawn leh Behlawi bai hmeh chunga kan mi hmasa, central service-a tling theite kha super star dik takte an va ni chiang em. Khatiang dinhmun thleng thei tura an thawhrimmna leh harsatna an paltlang zozai kha tunlai ṭhangtharte chuan a ngaihtuah pawh kan ngaihtuah thiam pha meuh lo a ni. Siliper nena sang tak an thlen theih lai leh zirna mumal lo chung pawh a, mi tam tak zinga mi bîk an nih theih chuan keini ṭhangthar zawkte Adidas leh Puma rap hrual chung leh, World class education hmachhawn mekte hi chuan kan mi hmasate hnung hi kan zui zo tur a ni ringawt mai. Chutiang tur pawha kan inbuatsaih a hun tawh hle mai. Thawnchhuah aia lakluh a tam lutukte hi ṭhalaite hian zak ila, a tihbo dan kawng dap ila, hmathlir fel tak neiin, taimakna leh tumruhna hmachhuanin hma lam pan ila, social media-ah chauh hian tribal super star nih tum lovin kan ramchhung leh kan tualzawlah ngei hian tribal super star nih i tum tlat ang u.