Kohhran hruaitute fimkhur deuh se

A hun tak la chiang chiah lo na a, chiang ang renga sawi theih chu nakum 2018 hian Mizoramin Assembly inthlan kan nei leh dawn tih hi a ni. Chuta tan chuan kawng hrang hrangin Political party leh pawl hrang hrang an inbuatsaih mek a, mipui hip thei ang ber tura programme an duang leh ang a. An ṭawng­kam leh che ziaah pawh an fimkhur thar ang.

A ṭhenin sem, a ṭhenin sem loh, a ṭhenin a hun lai milin remna leh muanna, a ṭhenin mahnia ro inrel, a ṭhenin power-a intotelh. An thu tiam tihlawhtlinga insawi te an in ni fur a, a taka tihlawhtling leh tihlawhtling lo pawh kan hria.

Politics hi a la tel ve ngai lo te ngaih ang em ema bawlhhlawh a ni vek lo bik lo. An tih ṭhat hmu thei hauh lo mihring kan nih chuan inenfiah kan ngai tihna a ni mai.

Tun hnaiah kohhran hruaitu, kan ram hruai­tute na taka bei ve an awm a. Kohhranah hian political party kan kim ṭhap mai. Kan ṭha tih zawng leh ṭha tih loh zawng pawh a insaikalh a, kan heti kumkhua ang. Politics hi thil dang ang lova a khelha khelh a nih avangin Political party-te pawh an inkhel a, an innawr rap rap a. He thilah hian Mizo mipuite ngei pawhin nunna tam tak kan hloh tawh. Chutianga an inbeihnaah chuan a changin an thu pawh a rum a, an kara midang an rawn tlak zeh deuh pawhin an dimdawih thiam lo.

An thiam thil tinreng hmangin mipui rilru lak nan kohhran leh tlawmngai pawlte ngei pawh an lam ṭanga siam dan an zawng ran a. Inven nachang hriat loh chuan, ṭan lam nei lo (neutral) mi hming pu reng siin an elpui party mi ai maha lo ṭan a awl. Inbeihna ṭawngkam hriam pui pui chu a hmang tur chi an awm.

Kan ram History-ah kohhran hruaituten ram tana hma an lakna te kha inremna leh boruak ṭha siamna lam hawi, mimal beihna ni lo, mi ṭha leh rintlak, hlemhle lo thlang tura fuihna te a ni tlangpui. Ram rorelnaah siam

ṭhat tur tam tak a awm ang, mahse mi satliah (layman) te thu vuak thlak ni awm tak tak, Pathian rawngbawltua kan serh hran Reverend zingah pawh ṭawngkam hmang an awm ṭhin hi kohhran nunhona atan rah ṭha lo a chhuah thei a. Mi an bula an an bawrh bawrh pawha beng dai tur, sawi tur bak thu buluk leh him lo deuh an sawi pawha ngawi maia sawi zui pui lo (moderate) ṭhin ni ṭhin te pawhin an khawp kham ta lova, mahse kha khan boruak ṭha a thlen zui leh mai ṭhin a lo ni zawk.

Pathian mi chuan khawvel thil te hi a chhuk bih a, rilru pui­tling tak leh thin nel taka thil thlirin, tu te emaw an nihna leh an thil neih avanga huatna leh itsikna rilru pu ve mai lova en dan thiamin, hmangaihna nen an ṭawngṭai pui zawk tur a ni. Tu emaw huat neia pai nei ṭeuh chunga Pathian rawngbawl chu a malsawm lovang.

Kan kohhran hruai­tuten mi satliah, phuartu leh ruaitu pawh nei chuang lo te anga an duh duh an sawi ve pawp pawp mai chuan kan ram kohhran kal zel tur hi a ngaihtuahawm dawn. Hetia an tih fo hian an beiha te bei mek Political party te an lawm hle ang a, chutiang zat emaw a aia tam mah emaw ten kohhranah politics la lutin na zetin an nawr zui palh ang tih a hlauhawm.

- C.Lalhminghlua