State khat sum vawn hi a namai lo

Kan Finance Minister leh kan Chief Minister ni kawp bawk Pu Zoramthanga selna hi kan hmù tam ta malh malh khawp a, he an selna tam tak hi chu sum leh pai vawn dan (Financial Management) an tih hi a ni.

'Pawisa a hmang thiam lo,' an ti a, 'Sorkar pawisa che vêl harsa tak hi a enkawl zo lo,' an ti bawk a. Puhna dang deuh te pawh a awm a, hnam dang contractor leh supplier a duhsak thu a awm tel a ni.

A hmasa berah chuan pawl tereuhte pawh hi Treasurer hna hi chelh a harsa a, a nuai hnuai lam mai mai pawh hi vawn fel a harsa tak a ni ve reng reng. Vawn fel aia harsa chu a nihna tura ṭha thei ang bera hman piah lama daih zai thei tura sem leh te a ni.

Heng aia mi tam takin an theih loh chu dik leh felfai taka bo thlau loa sum vawn hi a ni a, pawl pawisa vawmgtu nih hi chu thil tih namai a ni lo.

Kan Finance Minister tan hian tih tur ṭul a tam em em reng mai a ni a. Chief Minister a nih tel avangin Mizoram pum hi a kuta awm anga sawi ngam a ni thei ang.

Chutichuan PWD a la enkawl tel zui bawk a, kan ram kawngpui zawng zawng enkawl hian pawisa che vêl hi amah aṭanga chhuak leh sem a nih avang te, Political Party lamah contract leh supply lian tham semtu a nih loh pawhin a sem kawnga thu neitu a nih tel si avang hian a phur hi a rit ve em em a ni tih hi kan hriat pui tlang ve thiam a ngai a nia. Hei hi kan kuta tla ni se felfai taka kan tih theih loh tur thil a ni tih hi kan chhut ve ngai em le?

Mahni chhung­kaw pawisa pawh vawng fel thei lo a ka kaw naranin kan Finance Minister an han sel ve ngawt mai ṭhin hi chu a hriat zau loh thlak khawp a ni.

Covid-19 hripui avanga kan pawisa tlahniam thut kha hetiang hian sawifiah han tum ta ila - chhungkaw enkawlna atan Rs 100 min pe ṭhin a, chu tur chuan a hmanna pawh duan fel a ni. Vanduai thlak takin hriat lawk loh hripui a lo luh thut avangin Rs 100 min petu (Central Sorkar) chuan Rs 80 ah an cut ta a, chumi chunga pawisa duan lawk sâ anga enkawl leh hi thil namai lo tak a ni.

Kan Finance Minister hi hei vang hian a fakawm tih hi ka sawi duh zawk a ni. Party thila kan lâk tawh chuan eng pawh sawisel tum hrim hrim hi an awm tlat avangin thu lai lâk hi a harsa a ni.

- R Lalawmpuia