KHAWNGE CENTRAL YMA HI AN AWM LE?

Tuipuiral chuan Dt 22.06.2020 zing dar 4:10 aṭang khan lirnghing vawi sawmruk chuang kan tawng ta reng mai. A nihna takah chuan he lirnghing hi hriat lawk theih loh thil a ni a, khawvel thiamna sang tawh tak vansang thengreng pawh tlawh pawh thei tawh hian lirnghin hun tur hi an sawilawk thei lo mai ni loin a nat dan tur phei chu an hre reng reng lo. 

‘Cyclone Mahasena a lo thleng dawn’ an ti a, Kristian rinna chak lo tak neite chuan ‘Lungleiah chuan a thleng mek’ an ti a, ka chhungte ka va phone a, ‘ni danga thli thaw pangngai ang nen a danglam chuang lo’ an lo ti sam et a. A hnu lawkah ‘Mamitah a na tawh khawp mai’ an ti leh a, ka ṭhianpa ka zuk zawh chuan ruahsur paha thli thaw pangngai ang lekin a sawi leh bawk si. Hetiang vel hi kan khawchin hriatlawk dan chu a ni - lirnghing erawh tuma sawilawk theih a ni lo.

Mithiamte’n lei hnuai awmdan an sawi aṭangin Mizoram chu lirnghing na takin a sawi theih reng dinhmunah kan awm tih an sawi a. Inring tur leh chhiatrupna thleng thei laka kan him theih nan Mizoram sawrkar hnuaia Disaster Management Department leh Mizoram Police te chuan lirnghing nasa tak lo thlen huna kan buai chiri lohna tura an chetlak dan tur ‘Mockdrill’ te an buatsaih chamchi chu a nih hi.

Chutihlai mekin keini Tuipuiral tlangdungah chuan thubul lama ka tarlan ang khian lirnghing chu kan tuallaiah a rawn inluling ta chhen mai a. Nunau thlabar te chu kan theih ang tawka kan sak ve In-ah pawh zan mut har kan ti ta. Kan khawtlanga mipui thlabar hnemtuten kawtlaia nunau thu ringawt chu an ngaithiam loin khawngaihna thinlung avangin kan khawtlang hmunhma rem laiah chuan zanriah mai theih nghalna tur Puan In min kaihsak ta nual mai. 

Heti khawpa Tuipuiral khuate kan thlabar lai hian fiamthu thawh nana min hmangte thu leh hla social media-ah kan lo chhiar a,kan thinlung hi a khei na vat vat khawp mai; chhuichhuah lah a har lo nasa bawk si. Kan tlangdungah hian an duh lo chung kan hruai chhoh chuan nuam an ti bik mawlh lo ang. 

Khawvel ram pumin Covid-19 an buaipui luai luai lai hian keini Tuipuiral khuate chuan lirnghing hi kan buaipui tak zet zet. Thlamuantu kan ngai a, hnemtu ngaiin kan kun tlawk tlawk a. Sawrkar chuan min ngaihtuah em em laiin Synod lam an ngawi vang vang a, kan bengchheng ta deuh nia an hriat hnuin an lokal ta hram a. Chutihlaiin kan Salvation Army te chuan kan mamawh te hriain min rawn tlawh mai ni loin thilpek hlu tak min pe a. 

Political Party ṭhenkhat chuan sum tam tak min pein kan harsatna tawh meka kan senso phuhru turin hma an rawn la bawk a ni. 

Tin, kan State khawpui inrelbawlna lama roreltu pakhat chuan kan mamawh min pe bawk. Heng min ngaituahtute hi kan thlamuanpuiin an chungah kan lawm tak zet zet a ni.

Nimahsela, retheite tana pa chanchang, mi harsate tana inhnemna, ṭanpui ngaite tana ṭanpuitu pawl lian tak Central Young Mizo Association chu a bengek a tam viau a ni ang, kan harsatna thawm ri ve hi a hre ve lo niin a lang. 

Tuipuiral Group YMA hnuaia Branch hrang hrangte hi inngaihtuah thei lo hian lirnghing tuartu branch vek kan ni. Inhnem leh inthlamuan tur bik kan  awm thei lo; mahni kan in buaipui vek a ngai, midang kan buaipui hman lo vek. Nunau thlabar eng emaw zat zanrei lirnghing vanga Puan Ina an han ṭhu nghuk mai chu a hmu ve lote chuan an khawngaihthlakzia an hrethiam pha lo; mita hmutu tan chuan lainatawm tak an ni. 

Kan chhiat ṭhata kan thamuan­na tur ber CYMA a ngawi tlat mai hi a chhan leh vang kei chuan ka hrethiam mawlh lo. Central YMA inthlan dawna min hre em emtute khan puanven sawi chhinga min rawn thlamuan thei lo a nih chuan thlamuan ngaite hi kan lo inthlamuan ve mai ang.