Kawngpui chhia hi sorkar mualphona

Congress kha zu zawrh vanga tla an ni an ti leh ṭhin a, kei hi chuan kawngpui chhiat vanga tla an niin ka ngai zawk.

Congress kha kum 10 chhungin eiruk vanga mualphona leh mualphona lian tham dang kha an nei mang lova, kawngpui an enkawl zo lo lutuk kha an tlak chhan a ni zawk. Kan la hre reng ang a, khaw tin kha an kawng a chhe deuh vek a, inthlan dawn khan kawng pawh siam ṭha thei lo sorkar kha kan nin avangin kan thlak ta a ni. 

MNF hi kan han thlang leh ta rawih a, anni hi chu a tir aṭanga kawngpui vei party an nih avangin an han siam nghal chur chur a, kawng awm sa siam chu sawi loh Aizawlah phei chuan kawng chhawng siam an tiam a ni. Mi ṭhenkhat an nuih tet tet laiin hetiang awih tawk hi a tam zawk kan nih bawk si avangin traffic jam awm tawh lohna khawpui siam tumtute chu kan han vote tling ta pawp mai a. Anni hian Congress hunlaia kawngpui chhe lai an han thawm tak tak mai kha chu Lok Sabha MP inthlanah pawh khan an la vanneih phah zui zel a tih loh theih loh a ni. 

Tichuan thlirna hrang hrang a lo awm chho zel a. Congress lam chuan, "NEDP-a pawisa kan dah sa cheng vaibelchhe tam tak chu MNF khan kawngpui siamna atan an hmang a, an insawi thei zui bawk a, kan pawisa khawl sa hmangin hna an thawk," te kha an han ti vel a. Pawisa khawl ringawta kawngpui chhia siam loha hnut­chhiah ai chuan pawisa awm sa hmanga kawngpui siam thei chu kan lo duh zawk ta tho tho a ni. 

Assembly House lamah pawh kawngpui ṭha min siam sak avangin lawmthu sawina an pass tawh a. Kawngpui kan nei ṭha zel dawna a lan laiin kawngpui chhiat thawm bawkin kumin fur chu min rawn nangching leh ta a ni. 

'Contractor pawh ngam lo sorkar' tiin ṭhenkhat chuan an ziak a, mipui lam chuan kan hrethiam ve tak tak lo. Kan kawngpui chhiat chhan hi contractor nge PWD nge a changtu minister nge tunge kan hriat loh avangin kan kawngpui a chhiat chhung chu sorkar hi kan mawhpuh dawn tho tho. 

Mizoram kawngpui zawng zawng siam ṭha turin kan phut lova, kan kawngpui pawimawh lai tal hi chu siam ṭha ve turin Mizoram mipui hian kan phut tlat a ni MNF sorkar hi. Kawngpui a chhiat chhung hi chuan sorkar bak mualpho an awm lo e. Chuvangin alawm, mipuiin MNF sorkar an dem leh ṭan tawh chhan chu lo ni ta zawk.