KHAWṬHA HNUAIAH KUM 10 CHUANG CHHUNGA KAWNG CHHIAT BER ṬUM

Congress-in kum 10 chhung ro an rel a, hemi chhung hian Mizoramah kawng tam tak an siam thar a, kawngpui chhe deuhte an thuam ṭha a, kawng ṭha taka chei hunlai an nei. 

Nimahsela kum 10 an sawrkar hun tawp kum 2017 & 2018 lamah erawh Mizoramah ruahpui vanawn a sur avangin kawng ṭha sa te pawh sabereka khuangkaihin nasa takin a tichhia a, chung kawng chhia te chu vanpui kum tluanin a buak hawk hawk ṭhin avangin siamṭhata thuamṭhat ngaihna a awm lova. Khuanu rorel avanga kawngchhia chu Mizoram mipuiin nasa takin kan tuar a, hemi kan tawrhna hi khatih hunlaia opposition party MNF te chuan hamṭhat lak tumin sawrkarna changtu Congress sawrkar chu tih hmingchhiat tumin nasa takin an chirhtheh a. Hetianga an thil tih avang hian MNF party chu an hlawh­tling reng a ni. 

Mizorama ruahsur zirchiangtu, State Metereo­logical Centre hnenah an record dil chhuah a ni a, an record-ah chuan kum 2017 khan Mizoramah thla tin ruahsur chawhrual chu 224.892 mm niin, furpui vanglai June thla phei kha chuan ruah a sur hnem hle a, ruah sur tam zawng hi 743.5 mm a tling hial a ni. 

Hemi kum hian fur a inṭan hma a, April thla aṭanga inṭanin Ocotober thla phei kha chuan ruahpui 329 mm hial a tam a la tla a ni. A kum leh 2018 khan kum hmasa a heng ruahpui in kawngpui nasa taka a tih chhiat siam-

ṭhat hna thawh hman lek lovin January thla aṭangin ruah a sur ṭan avangin kawng siam hna thawk thei lovin khawchhia chuan sawrkar kut a phuar tlat a. January aṭanga September thla thleng khan thlatin ruahsur chawhrual chu 184.11 mm niin kawng siam tura hnathawh a ṭan ve theih hun  meuh chuan MLA  inthlan avangin kawng siam hna a thawh theih ta lo a ni. 

MNF sawrkar hi kawng siam ṭha tur hian khuanu malsawmna dawngin sawrkarna an chelh ṭan tirh December thla khan ruah a tla miah lova chumi hnu thla 4, thla 5 thleng chu vanneihthlak takin Mizoramah khua a 

ṭha chho hle a, hemi avang hian kawng siam hna pawh 

ṭan theih nghal a ni. Mizoram kawng te pawhin a ziaawm phah hle a, kum 2019 phei kha chu a hma kum liam ta kum 3 chhunga ruahsur a la tlem ber ṭum niin August thla thleng khan chawhrualin ruah hi thla tin 165.84 mm a tam a tla a ni. 

Hetianga kawng siam thei turin khuanu malsawmna chu chapo nana hmangin  MNF MLA pakhat chuan Mizoram Assembly House ah June ni 21, 2019 khan  “MNF Ministry-in hun rei lote chhunga Zoram dung leh vanga kawng chhe tak a siam ṭha mai hi lawmawm kan ti hle” an ti a. Resolution chu MNF sawrkar hnenah kawng chungchangah mipui rorelna hmun Assembly House-ah lawmthu sawina a pu lut hial a nih kha. 

Amaherawchu, kawng a ṭhat avanga lawmthu sawina resolution uangthuang taka an pass hnu lawkin kawng siam hna hi ruah hmi a tla dek dek a, hnathawh an chawl nghala, kawng siam tura mawhphurhna latu PWD changtu Pu Zoramthanga hi kawng siamna pawisa dah theitu thuneihna neitu niin Finance Deptt. changtu leh Mizoram CM meuh a nih avangin tu mitmei mah ven ngai lovin khaw ṭha hnuaiah kawng ṭha kan neihna tura hma la thei a ni. 

MNF sawrkarah kawng 

ṭha nei turin mipuiin beiseina sang tak kan nei a, tun kum 10 chhungin Mizoramin kawng kan la neih chhiat ber ṭum a ni lawi si! Nikum 2019 vek khan a vawikhat nan kawng chhiat avangin tlan lo turin inkhap hial a ngai a nih kha. Mizoram chak lakna ber kan National Highway te chu dil emaw tih theih hial khawpin a lo chhe ta! 

Dik tak chuan Congress term tawp dawn kum 2 chhung chu a chunga sawi tawh ang khian kawng siam tura hma lak theih loh khawpin ruah a sur nasa a. Khita MNF-in Mizoram kawng dung leh vang an siam ṭhat avanga midang fakna pawh nghak hman lovin House chhungah hial lawmthu sawina reso­lution an sawinaah hian Congress pawisa hman bang hmangin kawng hi kan siam ṭha a ni tiin Pu Zoramthanga, House Leader chuan a sawi nghe nghe a nih kha. 

He a thusawi aṭang pawh hian Congress sawrkar khan siam an tum, an duh amah­erawhchu kawng siamna tur pawisa pawh dah mahse ruah tam lutuk vangin hna a thawh theih ngang loh a ni. Tunah hian kawng siam ngai pawimawh em emtu nia insawi MNF sawrkar hi Congresss sawrkar pawisa hman ban an hman zawh hnu hian khawiah nge anmahni pawisaa kawng an siamṭhat ve chu? 

He sawrkar hian thu ni lovin a tak zawkin kawng hi an ngaihtuah ve a ni tih lantirin PWD changtu Pu Zoramthanga hi CM leh Finance Department changtu a ni bawk a, anmahni pawisa in kawng te hi siam ṭha ve tawh rawh se. Hetiang em em hian kan kawng hi a chhe tur reng a ni lo. He Mizoram kawng chhiat chungchangah hian a mawhphurtu Pu Zoramthanga leh a kaihhruai MNF sawrkar hi tun Mizoram kawng chhiat chhan chu a ngaihna an hriat thlawt loh avang a ni tih anmahni hian pawm ngam mai rawh se.