SAP SIKUL KAN INTIHHMUH LUTUK EM?

Kum tawp a lo hnai leh ta a, kum thara fate sikul luhna tih lamin nu leh pa tam tak rilru a luah leh ṭan tawh ang. Kan ram zirna hi ka phâk tâwkin ka ngaihtuah ve ṭhin a, a ngaihna hriat loh hi ka ngah khawp a. Senso a sang telh telh, a hautak telh telh, kan thiam lo telh telh ni te hian ka hre ṭhin. Kan sikul kal ve lai khan Aizawlah hian sap sikul a tlem khawp a, mi nawlpui chu sorkar sikul-ah kan kal. Mi rethei tan ban phâk a ni chiah lo a, awm thei deuhten sap sikul chu an pan tlangpui. Sorkar sikul kha kan sit lo hrim hrim bawk. Tunah hian mi harsa zawk pawhin hautak fe-a sap sikul kan pan ta deuh vek mai hi a ngaihna ka hre lo.

Sorkar sikula zirtirtute hi chuti taka sitawm an nih vek ka ring lem lo. Sorkarin tlinga a ngaihte an ni vek a, duhsak hlawh avanga lâk an awm nual pawhin, Graduate leh Post Graduate-te an ni tho tho a, sit lutuk tur an ni lo ang. An zirtir tur chin chu an zirtir thei ngei ang. Tih tak êmah chuan tun hma pawh khan kan zirtirtu ṭhenkhat chuan knife (chemte) te pawh 'ki-ni-fe' tiin an lam ve tho an ti a, ṭhian pakhat min hrilh phei chu - jumping tih hi zùmping tiin a lam tlat mai a, in lamah a u-ten a lam dan dik an lo hrilh a, a tûkah an hotupa chu a hrilh leh a, ani chuan, 'A dik alawm. Jumping (lam dan dik) chu zuang sang tihna, zùmping chu, chu aia zuang sang tihna' a la ti hram a! Nia. Kan zirtirtu hmasa ṭhenkhat kha chu an tling lo ve tho ang.

Mahse an zirlaite zingah khan IAS officer, sipai officer, Pastor ṭha tak tak leh kan mi chhuanawm ber berte hi an lo chhuak miau mai si a, heti taka sap sikul kan ngah hnu-ah leh, kawi tinah sap sikul kan nei emaw tih theih a nih hnu-ah hian, lehkha thiam leh mi chhuanawm kan tlachham telh telh lawi si a, 'An rahah in hre mai ang' tih tehna hmanga kan teh dawn phei chuan, sap sikul aiin kan sorkar sikulte kha an chungnung fe zawk tihna a ni thei em? Kan fate zirna atana kum khata kan senso hi a sang hlawm hle mai si a, pawl 10 vela tawp leh mai mai kan ngahzia ngaihtuah hian, a rilru nat thlâk viau a ni.

Sorkar sikul, a hmunhma leh building ṭha zawk, fee chawi ngai lo, chaw chhùn dawnna zawk lehnghal, sorkar pêk zirtirtute thawhna hnualsuat a, sap sikul, hmun chêp tak taka rem leh rem lova din, fee chawi hautak zawk kan pan hum hum si hi khawiahnge kan dik loh? A pantute hi kan dik lo vek àwm si lo a, sapṭawng hi kan ngaisang hrim hrim nge, sorkar sikulah hian beisei kan nei lo nge ... engnge ni ta ber ang? Pan hum hum e ti lo hian sap sikula thawkte hian sorkar sikula thawhna remchang hmu se, insawn nghal duh tur an nih fur hmel bawk si! Sikul lùn zawk aṭanga a khawhar zawka insawn duh lawi si ... ngaihtuah tham hi a awm ve tlat. Mihlim pakhat thukhawchang ang deuhin, a ngaihna ka beidawng a ni!

- RK Lianzuala