Halpuah khap thlawp vek ang u aw
Hman deuh khan halpuah khapna tihchhuah a hun leh tawh thu te, halpuahin nghawng ṭha a nei loh thu te, sorkarin a khap dawn a nih chuan hma taka khapna thupek chhuah ṭul nia ka hriat ve thu ka rawn tarlang a. Hei tunah sorkarin khapna thupek a chhuah ta a, a lawmawm ka ti hle.
Mi tam tak chuan Krismas dawn chauha khapna thupek chhuah loin, kum tluana khap an duh thu an puang hial hlawm a, a dik khawp mai. Ni e, halpuah hi sum holam taka dehralna, reilote nawmna thlen a, sum khawhral mai bakah hriselna tichhe thei boruak chhia tichhuaktu mai a ni. Chuvangin, hetia khap a nih takah chuan mitin ten zawm i tum ang u.
Sumdawngte pawhin hriselna tichhe thei, sum khawhralna ṭha lo a ni tih hria se la, state pawn aṭanga lakluh tum hram lo se tih hi ka ngenna a ni. Sum it vang leh duham vanga dan bawhchhiat kher hian hlawkna a thlen lo a, dan bawhchhiate hmachhawn chu rorelna court a ni tih pawh hre tlang ang u. Mimal ang pawhin mahni hal tur pawh ni sek sek, lak luh loh hram i tum teh ang u. Sorkarin khapna thupek a chhuah hma bawk a, tuman an la chhek khawl lo turah ngai i la. Mizoramah tun dinhmunah a awm lo turah ngai ta bawk i la, tun hnuah a awm a nih pawhin dan bawhchhiaa lakluh ngei a ni dawn tih hriat a ṭha.
Sorkarin khapna thupek a chhuah chu Central YMA a thlawp mai a ni lo a, Home Minister ho meuhah an sawiho hnuah khapna thupek hi chhuah a ni a; YMA meuhin thuchhuah a siam zui bawk a. Pawl ropui leh zahawm tak, min khaidingtu Central YMA meuhin Zoram mipui min ngenna hi zah vek teh ang u.
Dan bawhchhia man theitute hmuh lo-ah heng halpuah leh a kaihhnawih hi lakluh pawh nise, mahni veng leh khaw tinah a aia chak YMA a awm tih kan hriat vek a duhawm hle.
Congress sorkar tirh lam khan Home Minister hoin a halna hmun bik siamin kumhlui thlah zanah hal a ni a, kha pawh kha a dik lo a, a fuh bawk lo. Khatiang ang kha sorkar lam pawhin ti tawh miah lo se a ṭha ang. Halna hmun bik siam kha mitin ten kan hmu pha tak tak lo a, a hmu pha lo tan pawh a boruak chhia tihchhuah kha kan natpui ve tho si a nih kha. Chuvangin, sorkar lam pawh kauh se, halpuah lalut tur reng reng Vairengte-ah check ngun se, dawra zuar an awm pawhin na deuh taki hremna pe se kan zia awm ang.
Kumin aṭang phei chuan halpuah hal miah lohna state ni thei se, kan khawpuia lirthei horn pek vak vak a nih loh a, state pawna miten nuam an tih ang hian halpuah hal miah lohna hmunah kan state hi kan siam thei bawk a ni. I ṭangtlang i la, hnamdang puja hmang ṭhinte pawh an tim viau theih khawpin Krismas leh kumthar vuakvetah i'n hal miah lo tawh teng ang u aw.
- Lalkhirhvela