HMING THUP LEH A CHHEHVEL!

Tunlai Covid 19 hri leng buaina zam vel karah India ram mai nilo khawvel ram pum a buai a, ram hruaitu te lu a hai! Thla 5 vel lai kan in lockdown tawh hnu pawh hian hripui hian kian zai a rel hlei thei lo chu a nia! Mimal tin hian he hri lêng avanga kan hloh leh kan chân te hi a mal malin sawi dawn ta ila,  sawi tur kan ngah hlawm viau a rinawm. Mihringin kan lo ruahman lawk leh kan suangtuahna tha tak tak te kum 2020 chhung hian kan puitlin hlei thei dawn lo a nih hmel ta riau. 

He hripui leng hian mi lian ber atanga mi tê ber thlengin milâr (celebrity) leh ram hruaitu thlengin tumah a thliar hrang bik der silo! A rei deuh ta, British Prime Minister Boris Johnson leh Prince Charles te kha Covid 19 an vei thu news ah kan hmu chuai chuai a, tunah phei chuan an enkawl dam leh tawh! Chutiang zelin, ram hrang hrang hruaitu lute pawh in an vei a, news ah a darh zel, Infiam mi chi hrang hrang; Basketball player te, Footballer leh Coach te pawhin an vei, sports discipline hrang hrangte dinhmun pawh kan tarlang vek seng lo! An hming erawh news ah kan hmu chamchi a, an dam leh thute pawh kan hmu zui zel bawk a. 

Sawr zim hret ta ila. Hmanni lawkah India film star lar chhungkua Bachchan Family an positive thu kan hre leh! Chutih mek laiin Mizorama hri vei te hming tarlan loh tur, hming thup tur tih lam zela sawi a ni a,  tlema a hre deuh kan zawh ve pawhin kan chhanna dawn theih chhun chu dan siamtute siam dan a zir a ni a,  dan siamtu te thu thu tih a ni deuh mai. Covid 19 chungchang hi ka hre tam bik lo a, ka zir thui bik viau lem lo tih chu ka pha lo, mahse hri len tirh atang khan keimah leh keimah hi ka in zawt nawn ka in zawt nawn ve fo thin, keimah hi positive patient lo ni ta ila Covid 19 hri ka vei a ni tih puanchhuah kha keimahah chuan a pawina ka hrelo. Ka fimkhur theihtawpin ka fimkhur a nga, ka chenpui ka chhungte, ka laina hnai leh ka thiante lakah ka inthiarfihlim bawk ang. Taksa hrisel tha pangngai tan chuan thihpui tham natna a ni lem lo a, heti zat an enkawl dam tawh a lawm le,  awareness tha tak nei zui zel ila, hri inkaichhawn awlsam dan leh hri laka him dan te, fimkhur dan tur te in zirtir thar zel thung ila, kan tawngkam chhuak te pawh hri vei mek te tana hriat nuam ni thei se a duhawm. Hri vei te hming tar lan a remchanglo kan ti zel mai hian min tiralkhel mai mai deuh zawka hriatna ka nei. 

Hming kan inthupsakin kan inzeppui lai mek hian hre ru bik kan awm zel tho! Thenkhat phei chu thawktute atanga darh te pawh a ni mahna! Kan ram, kan khua,  kan local council huamchhung theuhah positive ni chiahlo rinhlelh thilthu-a quarantine mek te pawh an hming tarlan a rem lo ta zel! Hri an vei pawh ni lovin quarantine mek te pawh kan hriat a rem lo,  hria chu an awm, duhsak zualtu thenkhatte'n sawi darh lo ula, chumi te chhung zinga mi chu rinhlelh kai an awm a nia,  chumi khami area in kal laiin fimkhur ru.. tih vel bawr kan hre pha deuh tawk a! He hri kan hlauh dan leh kan dawnsawn dan neih nuaih hi awm dan thiam a har! Kan 'lai' ru riau. Sawi darh lo ula tih emaw hmundangah sawi chhuak chuang lo ula tih hi a darh leh nual thin lawi si!  Community spread a nih tawh chuan a hre bik te leh a hrelo te tan a hlauhawm dan a inang vek tawh si ang! 

Ka vei zawng ka ngaihdan angin ka rawn ziak chhuak a ni mai a,  tumah ka ráwn hranpa lo,  a lehlam zawnga thlirin kan society in kan la dawl zo lo ang,  kan inthinhrik nasa lutuk palh ang tih pawh a dik hmel fu! Mahse kan inzep zela hming kan inthup sak zel hian a nawlpuiin kan vei phah huk ang tih ka hlau a ni ber mai. A vei leh a vei ina a contact te tal chu hre thei ila fimkhur dan awmze neiin kan fimkhur mahna! Positive in a contact ni si, midangin an hlau anga an thinhrik ang tih hlauh vanga in report ngam lova lo ngawihpui tawp te hi thil awm ve thei tho a nia. Hriat miah loh hian hri hi kan lo kai ve thei reng tho si. Kan news thar lam hmuh leh hriat te hian min tithlamuang lo chho zel chu a nih ber hi.