Sorkar hnathawk kha phun tawh suh u

Thlà hnih vêl an hlawh tam tak aṭanga tlem azawng sorkarin Covid-19 dona atan an hlawh an bat sak avangin sorkar hnathawk an phun luai luai a. Office-ah phei chuan MNF an sawisel nasa tihte an sawi a, lo phun lo phun lo mai teh u, keini mirethei hi cheng nuai 3 min bat sak ngar ngar tawha kan la phun lo. Kan phun ve meuh chuan pui tak a ni dawn.

Sorkar hnathawkte chu sorkar aṭanga hlawh la in ni a, in pute chu sorkara thuneitu apiang hi an ni mai a. Sorkarna a inthlak pawhin chu sorkar hna bawk chu in thawh zui zel a ṭul avangin sorkar hnuaia mi in ni. 

Chu sorkar chuan Covid-19 dona atan pawisa remchang a nei ta lova. SEDP lama tam em em an dah ṭhat hi chu in chan pual a ni ve lova kan chan pual liau liau a nih avangin Covid-19 dona atan a hman theih lo; sorkar hnathawk hlawh hi puk ṭhen mai tur a ni. 

Sorkar hian a pawisa puk hi a bat ral ka ring lova a hlawmin a pe ṭawk che u ang a, pawisa khawl thei lo chi tán phei chuan a ṭha ngawt ang. 

Titi dangah phei chuan sorkar hnathawk hlawh­tling (corrupt government officials) ṭhenkhat phei hi chu an hlawh tel lo pawha khawsa thei, an hlawh aia säng mobile phone chhuak thar mahni leh fate tana lei thei, Vairama fate zirna atana in luah hrang thei, SUV lirthei ṭha ber ber nei thei an nih tho avangin hlawh bat ṭhen sak tih mai mai avangin an buai lo reng reng an ti. 

Keini mirethei zawk hi chu, "Ka Pu, kan vote che anga cheng nuai 3 min pe rawh," tih nachang kan hriat miah loh lai khan, "Min vote ula, kan tlin chuan cheng nuai 3 in dawng dâwn," min ti a. Congress lama NLUP dawng tawh pawh an inthlahrun loh na turin, "NLUP dawng tawh zawng zawng pawhin nuai 3 hi in dawng tel vek dâwn," tia min hrilh tu kha tunah chuan Chief Minister a ni tawh a ni. 

Cheng nuai 3 a semna tur SEDP kha Covid-19 atan hian khawih chet lohin a maktadûai telin an la chhawl chhin hmiah a ni an tia lawm. 

Keini chu he cheng nuai 3 hi kan neih chhun a ni a, 2018 December aṭang khan kan sorkar hian min bat sak ta ngar ngar a, kan la phun ve miah lo. 

In hlawh zinga tlem te thlà 2 vel sorkarin a bat sak che u a, in phun nghal ringawt mai, sorkar hnathawk ho hi. 

Kan cheng nuai 3 min batsak chung pawhin kan la vui ve lo a nia, an bat rei viau chuan VC inthlan leh AMC inthlanah hian kan rawn lang ṭan dawn a ni.