Session tawp ni thlirletna

Power supply leh TV signal khaihlak zuk zuk karah November ni 16 Assembly Session tawp ni kha ka thlir ve a, thil ṭhenkhat thlirletna ka han nei lawk teh ang.

Ni dang ang bawkin zawhna leh chhanna hun hmanga bulṭan a ni a. NHM chungchang zawhna chu Health Minister-in felfai taka a chhan hnuah ni dang ang lo takin Speaker chuan zawh belhna hun a phal zau ta viau mai a. Sermon duah hmasa lova zawhna zawt mai turin a duh apiang tan hun a hawng a ni ta ber mai. Member engemaw zatin an zawt belh ta ngei a, he zawhna pakhat chhan fel nan hian darkar chanve zet hun hman a ni ta a ni. Zawhna dang NLUP chungchang lak a ni a, a changtu Minister-in felfai taka a chhan hnuah tun hnaia Sangau Biala NLUP vawkte sem, a dawngtu turten an dawn duh loh thu leh session hmasa lama vawkte mawng ping sem chungchang sawi lan te chu sawichhuah nawn leh a ni a. Minister-in a chhan fel hnu leh Speaker pawhin zawhna dang zawt tura zawhna neitu a koh hnuah leh chu a zawhna neituin a zawh mek laiin Ruling Party MLA pakhatin House chhunga dawt sawia puh a nih a lungawi loh thu a phun chhuak a.

He MLA hian dawt sawia a puh hi tu ber nge tih TV aṭang kha chuan a hriat chian mai theih lova. AIR chanchinthar puanah a chiang ta chauh zawk a ni. Hemi chungchang hian sawi zui a hlawh a. AH & Vety Minister pawhin vawkte mawng ping sem a nih loh thu a sawi chiang nawn leh a. Vawkte thla bi kim lak hran theih rual pawh natna engemaw in a tlakbuak theih thu leh mihring te ang bawka an thih thut theih ve thozia te sawiin Minister thlavang hauhna ni awm tak sawi chhuah a ni. E ṭha thei lo te chu mawngkahna hmanga kah ek mai ṭhin an nih thu leh khang vawkte te kha an mawng kah ek hman loh palh vanga thi an nih a rin thu sawiin House Leader meuh pawhin a rawn zeldin kual ta mai mai a ni. Zawhna dang zawt tura koh tawh laia sawihona ṭangkai (fruitful discussion) pawh ni lem loin hun ala hek niin a lang.

In luah chungchang leh a khuahkhirhna dan leh hrai sawiho tura put luh a ni zui a. He dan duan thar hi a awmzia leh a kalhmang tur te, in luah man bituk zat dan tur te, in luahtu leh in neitute inkar chungchang te chu sawifiahin, a changtu Minister-in House-ah a pu lut a. Pass pui tura ngenna pawh put luh a tum chu Speaker-in dang khaw tlaiin bill putluh (move) chauh a phalsak rih ta zawk a. Member engemaw zatin he bill hi an thlawp thu te, thil ṭha tak tur nia an rin thu te leh rawtna hrang hrang neiin an thlawp thu an sawi hlawm a ni. Member ṭhenkat chuan tihdik tur tlem azawng an hmuh thu leh in luah man bituk dan tur chu a san lutuk theih an rin thu te an sawi bawk.

Sawihona tlangkawmtu House Leader chuan he bill hi pass mai rih lova lo zir chiang leh chik zawka entu tur Select Committee hnena hlan a rawt chu i he lovin a pu luttu Minister pawhin a remti nghal mai a. Select Committee kutah an dah fel ta nghal a ni. Hetianga Cabinet Minister-in Bill a put luh House Leader rawtna anga rel thluk a ni ta mai hi a mak angreng khawp mai a. A chhan chu bill put luh dawn hian Cabinet-in a thlir lawk hmasa lo nge? Congress Legislature Party pawhin an kalpui dan tur ruahman lawkna an lo nei hmasa lo nge? Select Committee hnena dah hi House Leader ni lovin member dang rawtna ni zawk se a kalphung zawk em tih te chu ngaihtuah zui theih tak a ni.

Tih tur tlangpui zo fel thawkhata a lan angin Speaker chuan a thil ngaih pawimawh zawng sawina hun House Leader a pe a. House Leader leh CM ni bawk pawhin member-te inchei fai fel pawimawh thu a sawi a. Chubakah mutthluk leh inthlahdah taka awm te chu TV kaltlangin khawvelin an hmu thei tih hriat a pawimawh thu a sawi bawk. Chutiang zelin Pathian biak inkhawmnaa mutthluk, bawp khawkherh leh nghenchhan hlam po po mai chin sim a duh thu member-te a hrilh zui ta zel a ni.

Session tlangkawm tura Speaker-in ni thum chhunga an thil tih tlangpui a sawi lai mekin UD&PA Minister chuan a bill put luh zir chiangtu tur Select Committee member tur te ruat fel nghal danin a phut tih a rawn hre chhuak a. Hei hi Speaker sawi chhuah tur ni zawk awm tak a nih laiin Speaker hian a lo hre lo palh pawh a ni thei a. Assembly Officers te hian Speaker hi an hrilh hre tur ni awm tak a ni. Select Committee member ruat chungchang hian House rorel a ti khaihlak ta hlek a. Speaker rawtna angin minute 10 chhung inrawn khawm nan House chawlh lailawk a ni. Mahse Session hi adjourn pawh a ni lova an luhkhawm leh pawhin Speaker chu a lut hmasa berah ṭangin Marshall pawhin a hruai lut hranpa ta chuang lo, a buarchuar angreng khawp mai.

Speaker meuhin Assembly Secretary kum tawp maia a pension tur thu a puang kha thil ṭul lo leh chuangtlai a ni. House member pawh ni lo mimal pakhat chungchang tarlan (special mention) hi Parliament-ah pawh kan la hriat ngai loh thil a ni.

- Zothankunga