Mizoram leh development

Mizorama kan political party lian pa­hnih MNF leh Congress inbeihna news paper-ah hne hluiin kan chhiar tuk tin a nih tak hi.

MNF leh Congress hian Mizoram deve­lopment hi an ngaihsak duh lo tih chu kan hrethiam thawkhat viau tawh lawm mawni le, development-in a ken tel heng: ei leh bar zawnna kawnga hmasawnna (econo­mic growth), in kal pawhna kawngpui ṭha siam, thil siamchhuahna hmangaa eizawnnna zauhte leh thil thar siam chhuahna lam te leh nunphung changkang zawk neihnate leh thil tam tak a awm.

Kan ziahlan tak tehna (criteria) aṭang ringawt pawh hian kan hrawn tawh leh hrawn mek Mizoram political party pahnih­te hmalaknain kan ram chhunga development an kalpui tam lohzia chu kan hrethei mai awm e. Heng hmasawn­na tel lo hian chuan eng ram state mahin hma a sawn ngai lo.

NLUP leh NEDP policy tih bawr vel hian ram ropui kan nih theihna tur kawng min sial sak hmel lo viau bawk. Heng policy pawisa tlem sem a, in dinchhuah tir tumna aia thang hauhawm hi a awm chuang lo.

I tu leh fate leh nangma tana Zoram khawvel siamna tur sum tam tham tak hengah hian awmze nei lovin a maktaduaih tel a luang ral asin. Dik tak chuan NLUP sum hi khawi special package mah a ni seng lo hrim hrim, khawia mi nge ni ang heng sum zozai hi? Mi a nileng lo chuan kan hrethiam ang chu. Sum sem lama hmalakna hi kan central sorkar inrenchem tak khuan khawiah mah a hlawh­chhamzia hi hria se min pe phal lo tawp ang, kan budget pawh an tih danglam duh dawrh ang chu mawle.

I hlawhtlinna chu a thlawna pawisa i dawnah a innghat ngawt lova, ram leh hnam hmangaihtu, hruaitu ṭha leh hmui chauh ni lova nangmah leh ram ngaihsaktu leh ram tan hnathawktu tak tak mi ṭha leh rinawm i neihnaah chauh i thawhrimna chuan hlawhtlinna a thlen ang che.

Thingtlang lama thil buaithlak tak ni

ṭhin chu, kum 35 chin chung lamho mahni party vawn lama saruh ruha ruh tlat, bialtu MLA/ Minister te lo zin nikhua a chaw eikhawm lama lo phur hurh, zu pek hnih khat leina beisei a lo vir sek, contract tenau em pawh hmu pha leh chuang si lo therhlo uma lo kat ve sek kan kuh ṭul mai hi a ni. Heng avang te hian alawm kan ramin thil thar a dai theih lohva hmasawnna thar pawh kan neih theih loh ni. Kan party lian pahnih MNF leh Congress ni lo political party thar ZPM te hi kan en chhin a hun tawh tak zet a ni.

Mahse enga tinge ZPM hi? He combined political party hi a rin­tlak hmel tehlul nen engatinge an thawm a va han reh ve, a dintute leh a zawmtu party hruaitute an rintlak tih a lang reng si a. District leh thingtlang a theihna hmun apiangah campaign-in hma han la zel ru. Zoram hruaitute a beidawng tawh tam tak hian hmasawnna min rahtirtu tur kan nghakhlel tak zet e.

- Phillipa pa, E.Lungdar