Politics Tukverh MNF Party

Ruling an ni bawk a, Party dang ka lo thlir kual fo tawh angin thlir leh teh ang. 

Vice President thlakna

Ruling hlimchhawnah Vice President pahnih Sr. Vice President la ni chho zel tura ngaih an paihthla thut mai. An aiah Party hruaitu Senior, Vangvat kai tia sawi 

ṭhin pahnih an dah a ni. 

Paihthlak chhanah hian Sorkar tirha Congress Budget bâng a campaigner-te a vulh danah Headquarters hruaitute mit a mîm hle niin an sawi a, pakhat hian chhungte a vulhna hle niin an sawi bawk. MNF tlin chhan zinga lung pawimawh tak ve ve an ni a, pakhat zawk hian candidate pawh beisei lovin Headquarters vilin theih tawp a chhuah a, pakhat zawk hi Party pawn lam aṭanga thlira MNF ti hmel mawitu zinga mi a ni bawk. MNF sawia mi rilrua lo lang zinga mi ve ve an ni a, la na rilru viau pawh nise thil awm tak a ni. 

Hruaitu ni mekte hi...

Pu Zorama, Pu Tawna, Pu Auva, Pu Thlenga, Pu Zawma te an ni a, ṭha ṭhe ṭhaw viauin lang mahse 2023 inthlan hi thlirpui ve chhin mah teh. President hian fing takin "Ka chawlhsan tawh ang e" tih nachang hre thut ta se, Elected OB aṭang hian tu in nge thlak ta ang? Lo châwl ta lo pawh nise, sang taka vawrhtu a ni tawh dawn lo a, mipui hnawt kiangtu a ni ve ṭan tawh zawk ngei ang. Tuna Elected OB aṭanga inthlanpui hmachhawn tur chuan a mal te te a thlir hian an huphurh pui awm khawp mai. Tuna an chakna bulpui pahnih nia lang an dah pawnlang viau ta hi tunah lang lo mahse an la tuar ve maithei. 

Flagship & Vision

Sawi hi a tam khawp a, Assam Rifle sawn chhuah aṭangin thudik ziktluak lo kan puang nghal phawng mai a, "Nuai 3 aia tlem lo in dawng dawn" tih video te chu kum 2 a vei hma in lung ti leng a chang der tawh. Sum faia dawn loh dan zawngin kan kai her ti tih der a, kawng chhawng, stadium chhawng, Chakai farm, Cable car kan sawi ri a, India rama ruihhlo ngai enkawlna lian ber din leh Aizawl Traffic jam free tih hlawhtlin te chu inchibai term-ah kan khawhral dawn ti tih ta mai. 

Flagship pui ber Rua chu kan sawi tlawr hle a. State dinchhuahna tur, IAS bansan phahna tur, hel umbo na tur hiala kan sawi chu nuai 90 in kan han ṭan tek mai a, a kalkawng chho thlir phei chuan beisei a sang lo ru riau. Heng zawng zawngah hian ṭawng tam lutuk, sawitur chin thliar thiam lohna, mithiam râwn lohna a lang chhuak a. Party President hian "Ka inzir fing tawh" a tihah hian Adviser ṭha tak neih hi zir tel se, chumi tluk chiahin advise theihin awm bawk se - khap ngai khawpin mipui hi kan nui lo ngei ang mawle. 

Tin, vanduai thlak takin sum dawn tam thu kan sawi piap piap hnu lawkah hri lengin sorkar a tlakbuak a, an duh angin an che thei lo tih erawh hriat tel a ṭha. 

Pu Thangtea bik

Hri hi leng thut ta lo se a dinhmun hi a hniam viauin a rinawm. "CM nen kan boruak a ṭha" tih sawi fo hian Congress term tawp dawn lama President leh Sr. Vice President inkar a ṭha an tih fo kha min ti hre chhuak a. Hetiang sawi fo a ngaih hi chuan a lo khi thui duh viau.

Hri a leng a, a vanneih pui a, mipui Hero a ni ta hlauh zawk a, tun dinhmunah phet hniam leh dawn se MNF pheh hniam tluk a ni ve thei. V. President aṭanga paih thlak hnu-ah Lunglei lama hruaitu, a sangawi zawnpuite ṭhuah an nih dan te, SEDP sum pekchhuahah Health Dept.-ah a tlem bikzia te, buai lai taka audit a tawk thut mai te hi mi tuangchhah a ni a, a ngawi ngal a, a rilru ah erawh 'awm' chu a awm ve ngei ang! 

In her vut hun pawh a la thleng ve mahna. 

Pu Zorama tlak nan hian hmang se neutral tlirna aṭang chuan an kâng hlein a rinawm a, a thleng ṭeuh dawn si lo. Mi thâwm na, mi chak a ni a, dah têt zel hi Party tan pawh chhiatphah theihna tling a ni ve. Hunin a la hril ang chu. Hri leng tawrhnaBudget kan hmu ṭha thei si lo, Sorkar hnathawk hlawh batsak hial a ngai ta. Worker tam tak vuivai ri a awm tawh a, MLA Fund aṭangin nuai 25 vel an thawh tlangpui bawk nen, hah man la hmu miah lo worker phunnawi pawh hi âwm ve tak tawh a ni. Hei hian inthlan engpawh hmachhawn leh turah a pawt hnufual thei bawk. A ṭhenin an thawk awlh awlh a, a ṭhen an khawro hle thung. 

AMC, VC & 2023-

Kan hmaah inthlan a awm dawn. AMC-ah hian Ruling boruak a sân a rinawm loh a, dinhmun chhe takah pawh an awm thut thei a ni. Aizawl bikah hian ZPM nen MLA an inzat thawthang a, tuna an boruak thlir phei chuan mualpho takin an awm hial theiin ka hria. 

VC ah pawh hian inthlan danga Ruling-in an lak huk huk ang kha an pha lo mai ang em a tih theih. Step, lung rem, zun in siam a tam lo riau! Worker ṭhuthluang an tam a, thingtlang thlengin an hniam thei. Congress aṭanga MNF a lut te an chhuak leh mek a, a awm chhunte pawh rin an hlawh lova, Bialtu ten an duhsak te pawh MNF Original inti ten an thîk em em  bawk. 

2023 inthlanpui hi tun ang boruak hian hmachhawn ta se tun hnai sorkarna siam zingah Term khat bak daih lo awmchhun an ni ngei ang. Opposition lam hian chet lak an thiam ve telh telh a, an in sawh muk ṭhat viau phei chuan tam takin kum 10 zel tura kan ngaih hi record thar siam thei dinhmunah dingin ka hmu. Insiamṭhatna turMNF MLA-ah hian mithiam, viak ṭha tam tak an awm a, an par chhuah ang tura par thei lova dah pawl pawh an awm. Chutih laiin lâr khêl, CM tlawn thiam apiang an dingchang a, mipuiah erawh hnê an hlawh a, ninawm an chang zawk. Helai hi siam ṭha se, mi thiam leh fit zawk tan kawng hawng tam se ngaihzawn an hlawh leh zual ang. 

Party Elected OB hi siamṭhat burh an ngai. Mi thiam, viak ṭha, a ngaihna hria, thâwm na, strategic plan thiam tumah an awm lo. Mipui hero a ni tih an hriat ve reng, Party timawitu, hri len laia "Exer lak uar tur," Phul lem phah buaipui avanga mipui lunghnurna khuh mawi hram hramtu hi Party tan a pawimawhna hriain chhawr ṭangkai sela an ṭhatpui zawk ngei ang. 

2023 ah chuan Party President thar ṭha tak nen inthlanpui hmachhawn tawh se a zia phawt ang. MNF hi an ṭha lo a ni lo, mi tak tak an tam a, an chhawr thei lo mai zawk a ni. 

Ka sawi ang hi a thleng chho a nih chuan Head­quarters hruaitute hi ṭhuah fai hmasaka bung thar kai an ngai tawh ang.