SUM ENKAWL THIAM

COVID-19 hian mahni in lumah min ûm lût a. Mahni kea din pawimawhzia min zirtîr hi haider chi a ni ta lo! Sum enkawl (hmuh leh hman) i thiam em le? 

Duh chawp: I ngaih­­tuah lâwk hauh loh, i hmuh ruala i duh chawp thil i lei fo em? I thil leiah chuan a man, a ṭhat dân, i mamawh dân lam i ngaihtuah hmasa ngâi lo em? 'Duh chawp lei ching hi pawisa hmang thiam an ni ngâi lo; an tâlbuai fo. 'Duh chawp' leh 'tla chawp' thila sum hman i invên a ngâi thei. 

Duan lâwk: I rin aia hmâin pawisa i hmang zo ṭhin em? I sum hman theih i ngaihtuah lo a, ruahmanna i nei lo a ni thei. 

Hausak thut: Nakina hlâwkpui tur nia i beisei avângin i insêng ṭeuhin, i pûktîr ṭeuh tawh em? A zuitu chu "chânna leh rilru hah" mai chauh a ni fo! I pawisa, ip pawpah thlâk lo tura i invên a ngâi thei, Bible-in a phal si lo. 

Fîmkhur: Midang puih duhna rilru i pû a, "loan a rulh theih loh chuan ka rulhsak ang" tiin i hming i ziah hnan mai zêl em? 'Tihsak âwm tak' i thliar thiam loh chuan, i la rûm thei! 

Sum pûk: Mi taima leh dik tâna ṭha tak - sum pûk/ loan lâk te hi, 'a pung nêna rulh leh ngâi' a nih ngaihtuah lêm lo a awm theih. Sum hrâwm i mamawh a nih ngawt loh chuan a nazawnga sumpûk laka i invên a ngâi thei.

Hun: Hun leh pawisa hi thliar hran hleih theih loh khawpa inkawp tlat an ni a, "hun hi pawisa a ni e" an lo ti ṭhin. I hun i hmang daihzâi em? I pawisa hlawh/ sên leh i thawh chhuah a inmil em? Kohhran/ sawrkâr/ i pawisa a luang ral thei.

Vênhim: I bungrua, i thil neih i duat em? A hlutna humhim a ngâi fo. Sum enkawl thiam chuan thil chhe thei a dimdâwi ṭhin. I in, i ofis, i vântlâng thil i dimdâwi chuan sum enkawl thiam tak i ni ngêi ang. 

Thil bat: A bâa thil lei i chîng em? 'Khaw khat bat huai' pawh a awm theih! Mahni pawisa neih mil zêla khawsak thiam a ṭul. A bâa thil lei theihna 'Credit Card' te hi i hman thiam loh chuan, i ṭhatpui lo thei e. 

Mi dang: A ma­mawh tân i neih i theh chhuak ṭhin em? 'Isua hminga' mi dang pui ngâite puih nân i sum i hman fo chuan sum enkawl thiam i ni ngei ang. Neih kawmpui chu tlâkranna; semzai chu pun lehzualna a ni. 

A neitu: I thawh chhuah, i sum enkawl mêk, i kuta awm, i tâ kha a neitu dik tak chu Pathian a ni. I nunna, i hna, i hun, i thiamna, i hrisêlna, i finna te kha khawi aṭanga i hmuh nge? Pathian pêk che a ni lo em ni? I deh chhuah 10-a 1 chauh a hauh a, a beitham hle (Mal 3:8). Pathian i hre reng a nih phawt chuan sum enkawl thiam i ni ngei ang. 

"I sumin Lalpa chawimawi la, i thil lo pung hmasa ber zawng zawngte nên; Tichuan i buh in chu a lo khat liam ang a, i sâwrkhur chu uain tharin a luang liam ang" (Thuf 3:9-10) a ti hial mai.