FOREST PLANTATION SUASAMTUTE’N AN DFO AN PET CHHUAK EM NI?

Kumin kumtir lam khan Darlawn khawdaia Ngurawitlanga Forest Department-in Pine (far) plantation, kum 1983 vela alo siam tawh, thing puitling lian tawh tak tak ding thelh thulh tawh chu Darlawn Venghlun VC te chuan mimal inhmun atana ṭheh tumin thuneitu, abialtu DFO hnen aṭanga phalna hmu si lovin an kit chiam mai a. Kawngpui tur an lai bawk! (Heng thil thleng te hi chhiartute’n thil awmdan tlangpui kan man thiam zawk theih nan thawnthu sawi ang deuhin atlangpui chauh ka’n thailang ang).

He dan bawhchhiatna thleng hi hmeh mih tumin Darlawn DFO Pu Lalnunsanga Khawlhring, IFS chuan hma a la nghal a. Venghlun VC te hnenah he dan bawhchhiatna kal mek te tihtawp a nih theih nana thupek - STAY ORDER chu dt 8.3.22 khan a tichhuak a. Amaherawhchu, he thupek hian zawm a hlawh lo. Chuvang chuan, DFO tirhin Darlawn Forest Range Officer chuan he dan bawhchhiatna hmun hi dt 22.3.22 khan a enfiah a. A report-in a tarlan dan chuan far thing kung puitling hi kung 48 lai Venghlun VC te hian an lo kitthlu tawh a, heng hi a thingzai volume zawng chuan 674 cft. lai a ni.

Tichuan, Darlawn DFO leh Venghlun VC te inkara boruak (inepna ṭha lo) chu alh chho zelin Venghlun NGOs te chuan he Ngurawitlanga forest plantation an tihchhiat mek leh kawng an sial mek te chu eng vang maha tawp san an tum lohzia tarlangin thuchhuah an siam ve leh ta salh a. Tin, dept. in he plantation area a hmun awl laia thingṭiak an phun thar te pawh chu la bo vek (remove) turin Dept. chu thu an pe let nghal bawk. Chu mai chu duhtawk lovin dt. 5.8.2022 khan Darlawn Venghlun VC te chuan he Ngurawitlang pine plantation chhungah ngei mai hian an JCB (hired) chu khalh lutin lamlian tur an sial (lai) ta mup mup mai a ni. Dept.-in hmun awl laia thing a lo phun thar tawh te pawh chu dim baksak lovin an suasam chhe zo zui ta bawk a ni!

Heng dan bawhchhiat luihna kal mup mup te avang hian Venghlun VC te chu an dan bawhchhiat mek (illegal tree felling & encroachment) chu tawp san hmak turin dt.5.8.22 khan hriattir leh an ni a, mahse, a hmaa stay order dodala tuang tichhah lui tlattu VC te chuan DFO thupek hi an zawm duh chuang lo. Chuvangin, DFO chuan danin thuneihna a pek angin dan bawhchhiatna atana an hman JCB (property used in commission of illicit felling and road construction inside dept. plantation) ngei mai chu a hmuna man (seize) nghal turin a Range Officer chu thu a pe ta, mahse he JCB hnathawhna hmunah hian Forest staff te, Police ho leh midangte nen an inzim buai a, a tawpah Police dept. rawtna angin inrem lailawkna siamin an inman buai lo thei ta hram a ni awm e.

Hemi ṭum hian kawngpui sial avanga thingtlukar tharlam (newly uprooted trees) pawh 15 lai hmuh a ni a, chu chu a thingzai anga chhutin 54cft. vel a ni. (thil thlen dan zawng zawng hi chu sawi sen a ni lo).

Hetiang teh nuai hi thil kaldan a nih tak avangin, a kawtawpa ṭang DFO, Pu Nunsanga tan chuan duhthlan tur dang a tam tawh vak lo; sawrkar aiawh a nih ang chuan ‘thu a tawp e, lumam’ tih mai pawh a awl mai thei; mahse chutin a ti mai lo.

Kan dan dinglaiin a phuar angin (duty of any Forest officer to uphold principles of conservation of forests and wildlife) dan bawhchhetu Venghlun VC te chungah hian dan dinglai (legal force) lekkawh turin Chief Judicial Magistrate, Aizawl hnenah Criminal Complaint (FIR) chu Mizoram Forest Act, 1955 leh Indian Penal Code hnuaia section an bawhchhiat te tlawhchhanin a thehlut a, hei vang hian Venghlun VC member-te hi Court-ah an inlan zak zak a ngai ta a ni awm e.

Heng thil thleng zawng zawng duhlohna lantir nan leh thungrulh nan Venghlun VC te chuan dt.28.9.22 khan Resolution dangdai tak tak an siam leh ta rup mai. Chung resolution zinga pakhat chu “DFO Pu Lalnunsanga hian Darlawn Venghlun chhung leilung hi (thu leh awm hma chuan) a rawn dai tawh tur a ni lo” tih a ni riap mai - a Taliban ṭiah ṭiah khawp mai!

Awle, dan hremi ka ni lova, amaherawh chu mipui nawlpui hriat ve hrim hrim atan thilthleng te khi dan tarmit lam aṭanga a lan dan han tarlang ve khanglang ila (tunlaia ṭawngkam lar tak ‘mitsiai’ ni lovin):

1. Khitianga sorkar property- forest plantation chhunga dan phal loha thing te tihchhiat luih khi Indian Penal Code (IPC) section 427 (Mischief causing damage to Govt.property) bawhchhiatna a ni a, hrem theih a ni.

2. DFO-in sorkar plantation chhunga thing dinglai te kit chhe lo tur leh sorkar rama JCB hmanga an kawng laih luih lai titawp nghal vek tura thupek a chhuah te an zawm loh avang pawh hian Venghlun VC te hian IPC sec.188 an bawhchhia, (Disobedience to order promulgated by public servant) a - hrem theih.

3. Pu Lalnunsanga hnena Darlawn Venghlun VC leh NGOs te'n an veng huam chhung leilung dai thei lo tura Resolution siama khap behna thupek an chhuah khi Indian Constitution Article 19(1)(d) '...Right to move freely throught the territory of India' hnuaia mimal Fundamental Right neih lai chhuhsakna (deprived) a ni a, hei pawh hi dan bawhchhiatna theuneu lo tak a nih hmel (Tu emaw kan huat avang ngawt hian kan veng chhunga a lokal kan khapbet ngawt thiang lo tihna)

4. Venghlun VC thiltih (illegal tree felling and encroachment) te hi sorkar dan dinglai 'The Mizoram Forest Act, 1955' te, Forest Conservation Act, 1980' leh Ministry of EF & CC, Govt. of India thupek hrang hrang te bawhchhiatna a ni a, hrem theih an ni.

Awle, ka sawi tum ber ni lo mahse, heng VC te dan bawhchhiatna te leh helai DFO, ṭhahnemngai taka thawktu zawk, a tana sanctioned post pawh awm chiah lohna hmun (PCCF office) a transfer (pet chhuah) rum rum a ni ta mai hi khaidiat ang deuha thil inzawm tlat niin alang.

Thuneitu (Ministry or HoD) te chuan a hnuaia sorkar hnathawkte chu an duh duhin an transfer thei na meuh mai; mahse he transfer order kher hi chu OSD ang deuhin duh loh deuh zawngte hremna, tunlai huna dept. a thawktu indaih loh nasat em em tawh laia hnathawk thei lova insiamna, dan bawhchhetu dodal chhunzawm thei lo tura in dah bona te leh hnathawktu ṭul lova tuartirna (principle of natural justice rahbehna) a ang tlat.

Chuvangin, sorkar dan dinglai huaisen taka kengkawhtu a hna chhunzawm thei lova transfer bo a ni hian environment humhalh duhtute (Env. NGOs)te mitnaute pawh khawih ve deuh mahse a mawh lovang (amah mimal vang ni lovin, Env. humhalhna dan kengkawhtu a nih vang zawkin).

Tichuan, kan headline a tarlan ang khian he DFO transfer-ah hian tute nge a kaikuang ni ta ber ang? DFO hnuaia thawk mek F/G upa tawh tak, tunhma deuha he pine plantation pawh ama huan atana lo vat ringawt tawhtu, mahse an khapbeh tak (chumi avanga DFO chunga lungawi lem lo?) te, he F/G fapa ngei Venghlun VCP ni bawk leh an veng chhung leilung rap tawh lo tura thupetu te, thawhhona boruak tinuam lotu zawng zawng te hi ngaihruatna mitthlaah an lo langsar viau a nih pawhin tunge hnial ngawt thei ang?

Hetihlai hian, engatinge dan bawhchhetute chunga hremna lek tum si lova, dan hnuaia ṭhahnemngai taka hnathawktu DFO zawk hi thangtlawm thlak taka pet per (victimized?) a nih zawk le?

Tunah hian chhiartu ṭhenkhat chuan “Forest plantation tih vel aiin mipuite insakna tur ram kan mamawh zawk, a pawimawh zawk, Forest dept. ho hi an hnawksak hrim hrim.…” an ti mai thei. Hetiang ngaihdan buluk neitu leh tunlai 'global climate change khawvel' a thil inlumleh dan te hre phak lo hi chu sualna ang deuhin he khawvelah hian an awm kumkhua dawn tho.

Engpawh nise, ramngaw leh nungcha (biodiversity) humhalh tura khawvel leh India ram pawhin hma a lak mek laiin, EF & CC Dept. leh kan Environmental NGOs hrang hrangten theihtawp an chhuah mup mup lai leh tunhnaia NHDCL hovin Mizoram chhunga an kawngpui laihin kan ramngaw leh nungcha a tihchhiat mek titawp tura Ruatfela Nu te, Pu Vana te hovin awrphiar ṭawng ṭawng khawpa an dodal lai hian “Economic development reng reng te hi environment humhalhna nen a kal kawp reng tur a ni” tih thu hmang hian a tlang i kawm phawt ang.

- Lalrinmawia IFS (Rtd)