A hman hmanin Kawngpui dang tawh su

Hmanni lawkah Vairengte lamin kawng dan an tihtawp kha kan la hre vek ang a, khatia an tawpsan theih nan khan CYMA hruaitute'n palai hna an thawk a, vawiinah ei bar lakna harsa lo te in kan la awm thei a nia.

Chawlhkar khat em pawh a liam hman lo a, Hachhek bialin November 15 thleng Mizoram sorkar an ngaichâng a. An duh anga sorkar a chet loh avangin tunah tiam chin awm lo kawng dan an han tintiah ve leh dawn chu a ni phawt a. He article i chhiar meuh chuan kawngpui hi an dang tan tawh maithei.

Vairengte lamin kawng an dan chhan phei kha chu sorkar department lam thiam loh te pawh a tel niin a lang a. Sorkar berin kawng siam mekah zangna­dawmna lak kawngah buaina a siam emaw tih mai tur a ni a, chinfel aiin a zual zel zawk te pawh a ang, he buaina hi.

Vairengte-Kawn­pui kawnga, Land Owners' Association chuan, November 3, 2022 aṭang khan Vairengte dáia national highway kawngpui an dang kha a nia, tunah an titawp fel chauh a, tunah Hachhek bialin kawng an han dang ve leh ang a, a hman hmanin sorkar pawh zah loin kawng an dang mai zel hi chu sorkar rorel dan mumal loh rah a ni chiang mai.

Hachhek Bial buaina phei hi chu smuggling lam nena inkaihhnawih thil a ni lehnghal a, a zahthlak lam mah a ni e.

He biala Kuhva Chingtu Pawl, YMA Taitesena Group leh Langkaih Group hruaitute November 5 a Kawrthah North VC House-a ṭhukhawm chuan, Hachhek bial chhunga kuhva rah hralh a nih dan tura sorkar hmalakna November 15, 2022 thleng an ngaichâng a. Sorkarin engmah a chin fel kan hre si lo a, an beisei anga sorkar a chet loh avangin kawngpui chu an dang leh ngei dawn tih a chiang tawh.

Heti taka kan sorkar laka bial hrang hrang mipuiin buaina an siam ngam ta mai hi a pawi hle mai a, a chhan lian ber nia ka hriat chu sorkarin rorelna fel taka a kalpui loh vang chu a ni phawt mai.

Mahse eng a tinge sorkar hian huaisen taka rorelna a kalpui mai loh tih leh, thil harsa lo tak takah pawh sorkarin thu mum a nei thei ṭhin lo hi a chhan ni bera ka hriat chu sorkar ber hi felfai taka a awm theih loh vang a ni phawt mai.

A nihna takah chuan sorkar hi smuggling leh thil dangah hian dik takin kal ngam se, sum lamah pawh felfai takin sorkar hian hma la ngam se hetiang em em hian sorkar hi mipuiin an palzam ngam hauh lo ang. Mipui tan sorkar hian kalphung mumal neiin rorel ve tawh se kan va ti tak em.

- Henry Muana, Kawilam