SAWHTHING

Thingtlang pa nih chuan kan in tun nun ve-na tur a nih beiseiin thlai chi hrang hrang kan han ching a. Sawhthing, hmarcha, vaihlo, bekang leh buh te kan ching ṭhin tlangpui. A engpawh hi ching i la tam tham deuh hleka tih loh chuan awmzia a nei lo khawp mai. Chu'ng-ah chuan kan sawi leh mipui hnena kan tawktarh langsar ber chu sawhthing hi a ni awm e. 

Sawhthing hi ka ching ve zauh zauh ṭhin a, kum khat phei chu 40-50 quintals vel ka ching. Zopa sawi dan takin ṭin 4 hmun vel lai a ni ve. Sawhthing hi a hmuna kan han neih tak tak hian a tãm nasa thei viau a, kei phei chu ka chhiat phah hlauh a ni. Buh karah tlem tlema kan han chin hian a ṭha duh viau, awhawm takin an awm ṭhin. Mahse a hmun hlanga han tih tak tak rãlah chuan tihsual awlsam tak a ni. Thlai dang karah chuan a ṭha ve tho ṭhin si. Sawhthing ai chuan hmarcha, bekang, chhawhchhite hi kan sorkar hian ngai pawimawh zawk se la, a sawngbawlna ṭha leh chhenfakawm zawk a awm chuan Mizoram din­chhuah­na tur awlsam tak a ni hial zawk ang.  

Thingtlang lo ṭîn khat hmun pawh mahni puala la enkawl ngai lote'n sawhthing an han sawi mawi ringawt hi a dik lo; a tak taka tih ve phawt hnuah sawi se a ṭha awm e. 

Sawhthing hrim hrim hi a ṭha lo ka ti miah lo a, mahse tihsual awl tak niin a lang - a tãm chhe duh ém mai! 

Buh karah khãt deuh hleka dah chuan a ṭha hluah hluah a, a hmun hlang tak taka han chîn a, a hnah leh a hnah an indeh hian an inngeih lo a ni ang, an rãu ṭhut a, an tãm mai ṭhin. "Sawhthîng, aw, mi'n bumtu," tih mai a awl ṭhin! 

Sawhthing politics hi kalsan a hun. Mahni state a market ṭha hi ching ila, kan intodelh hnuah state pawna thawn chhuah tur lam chu buaipui chauh zawk chi niin ka hria. 

Mahni intodelh si loin state pawn thawn chhuah tur kan buaipui zawk tlat mai hi a fuh ber lo. Opposition party apiangin sawhthing rate ṭha deuh an hre ziah lehnghal!