Written by
- Centenary C. Lalzahawma
ṬAWNGKAM HMAN CHUNGCHÂNG
Khawvêl pum hi thang chi hrang hrangin a khat a, a chhûnga chêng mihringte hi tihpalh thilthua âwk thut thei reng kan ni a, kawng engkimah kan fimkhur a ṭul hle. A bîk takin 'Ṭawngkam hman chungchângah' kan fimkhur a ngai lehzual. Silaimu leh kawlphe aia rang zâwk a ni tlat.
Chinese Philosopher ropui Confucious-a chuan, “Mi chu a ṭawngkam khat lekah finga ngaih a ni a, a ṭawngkam khat lekah fing lova ngaih a ni ṭhîn. Kan thil sawiah kan fimkhur a ngai a ni,” a sawi. Kan ṭawngkam chhuak tinrêng hian kan nihna leh kan mizia a pho lang ṭhin. Mi zahawm nih hi thil harsa lutuk a ni lo, ṭawngkam hman fimkhur a tâwk.
Thuf. 12:14-ah chuan, “Miin a ṭawngkam chhuak rah chu a seng ang a, Ama kut thiltih ngei chu a hnênah hlan a ni ang,” tih kan hmu. 1 Petera 3:10 thu-ah chuan, “Nunna hmangaih duh leh ni ṭhate hmuh duh chuan sual lakah a lei vêng ṭha sela, a hmui pawh ngamthlêmna thu sawi lo tûrin vêng ṭha rawh se,” tih ziak kan hmu bawk. Midangte sawi chhiata sawisêl nân kan lei leh kâ te kan hman fo chuan min sawi chhiata min sawisêl nân an lei leh kâ te hman an ui bîk ngai hauh lo tih hriat a ṭha!
French rama thu leh hla thiam zet mai Victor M. Hugo-a chuan, “Fimkhurna hi finna upa ber a ni,” tiin a sawi. Jean de La Fontaine-a phei chuan, “Ṭhian fimkhurna nei lo aia hlauhawm an awm chuang lo, hmêlma fimkhur tak neih pawh a thlanawm zâwk,” a ti hial! Fimkhur tluk a awm lo e.
Thuhriltu 5:2 thu-ah chuan, “I kâ chu hmanhmawh suh se; Pathian hmaa thu eng pawh chhak chhuak tûrin i thinlung pawh hmanhmawh suh se; Pathian chu vâna awm a ni a, nang chu leia awm i ni si a: chuvâng chuan i thu pawh tlem rawh se,” tih kan hmu a. Kan thusawi tûr kan sawi chhuak tak tak hmain kan ngaihtuah nawn fo a ṭulzia a sawi lang chiang hle.
Matthaia 12:34 ah, “Thinlunga khat liam chu kâin a sawi ṭhin asin,” tih kan hmu a. Chuvângin, mi tinten dawhtheihna nên kan ṭawng chhuak tûr kan thunun a ngai fo.
Engpawh ni se, ṭawngkam ṭha hi i ui lo vang u. Ṭawngkam ṭhain sial a man tia kan pi leh puten an lo sawi ṭhin kha hre reng ila, kan ṭawngkam khat avângin mite thinlung a hliam thei a, mite thinlung kan tidam thei tih i hre thar leh ang u. Sawi chhiatna hian min tichauin min tibeidawng fo va, fakna erawh chuan min tichakin beiseina thar min pe fo a ni.
Ni tin mahni inzir chunga hma kan sâwn zêl theih nân leh mi zawng zawngte nêna inremna kan neih theih nân kan ṭawngkam hmanah i fimkhur lehzual ang u.