ZONET Ṭhazual AWARD, 2022 LEH A BEHBAWM

Zoram khawvela Zofa zaithiamte tana Award sem Program/ Show lian ber leh ngaihhlut hlawh ber tih ngam, Zonet buatsaih Ṭhazual Award vawi 8-na chu tluang takin November ni 10 leh 11 zan khan sem a ni a, mit leh beng a tlai hle mai. A buatsaihtute inpekna a fakawmin thil engkim kha a tunlai em em a, ṭhalaite mit leh beng a fah takzet zet.

Zofate hi zaimi leh zai uar tak hnam kan ni kan ti fo a, Mizoram chhungah pawh zaithiam kan ngah dan aṭang hian hei hi a dik viau awm e. Tunhnai kum 10 chhung ringawt pawh hian zaithiam chhuak thar an tamin hla pawh kan phuah tam nangiang e. Hla lar lem lo leh belhchian dawl vak lo pawh a tam viau rualin hla ṭha, hlu leh nalh tak tak a piang mek zel bawk a. Hei hian nasa takin Mizo Literature a tih hausak belh a ni.

Mizorama kan zaithiamte hi pawl lian tak pahnih MZI leh MDM ah an inthen phawk kan ti thei awm e. Library hrang ve ve neiin Cable TV hran ve ve nen an inthlunzawm ṭhin bawk. Hetianga pawl pahnih a inṭhen hi a ṭhat zawkna a awmte pawh a ni ang e. Tun ṭum Ṭhazual Award-ah erawh chuan a buatsaihtu Zonet lam chuan MZI leh MDM thliar hrang lovin, Zofa zaithiam, Mizo hla sa tawh phawt chu an huap ta a, a lawmawm hle mai. Hetianga kum khat chhunga zaithiam che ṭha Award pek ṭhin hian zaithiamte mai bakah hla phuahtute, music video siamtute leh musician-te a tiṭangin phurna nasa tak a pe a, Mizo music industry-in nasa takin hma a sawn phah a ni.

Keini Mizo chauh ni lo, kan unau Zofa chi peng hrang hrang, ṭawng hran hmangte pawhin Duhlian ṭawnga phuah hla an sak phawt chuan platform kan siamsakin kan promote hreh hauh lo tih a lang a, an zaithiamna leh an hlain a zir phawt chuan Nominee-ah pawh kan telh ta zel hi a va lawmawm lehzual em. Tunhnai maiah pawh Van Hlei Sung leh Benjamin Sum te chuan Ṭhazual Award an dawn nghe nghe kha (an ni pahnih hi ka hriat chhun an ni a, midang pawhin an lo dawng tawh mai thei). Zonet hian he Award Show hmang hian Mizote min chawisang mai ni lovin Zofa zawng zawngte min kuahkhawm a ni. Zofate inpumkhatna chungchang kan tlangaupui fo pawh hi a sawi a sawi liam mai ai chuan hetianga thu leh hla hmanga a taka tihlan hian hna a thawk nasa zawkin awmzia a nei zawk ngei ang.

Kumin Ṭhazual Award Show bik han luhchilh lawk ila. Kum engemawti aṭang khan Gospel leh Lengzem hi a hrangin zan hnih lai hun hmangin an sem a, hei hi a fuh hlein ka hria. Chutihrualin sum, hun leh tha sen erawh a tam phah deuh ngei ang. He Award Show-in a ken tel lian tak pakhat chu incheina (Fashion, Hair & Make up) a ni. Kan Mizo fashion designer-te pawhin mahni infakna/ inphochhuahna hun remchang a ni tih hriain zaithiam leh model-te sponsor in an kutchhuak an haktir hlawm a, social media lamah an thlalak hmuhnawm tak takte pawh a darh leh ta chuai chuai a nih kha. Chutihrual chuan Gospel singer ṭhenkhatte pawh hian kawrfual leh kekawr hak an uar ta mah mah deuh em aw. Program buatsaihtu lamten Gospel Award sem zan bik kha chu worship service nena inkawp a nih thu an sawi chamchi bawk si a, kan inchei dan tam zawk nen kha chuan a inrem chiah lo deuh em?

Best Mizo Traditional Artiste Award dawngtu Nl. PC Lalthansangi inchei dan kha a va mawiin a va han zahawm tehlul em! Mizo puan a bih a, Sunday thawmhnaw pangngai a ha mai a, lawmthu sawi lah a thiamin Mizo nih a inchhuanzia a han sawite phei kha chu kei KTP tlangval hi ka tuiral lo chauh a ni.

Lengzem Award sem zana langsar ber fo chu kan Mizo model te an ni. Award Show an tihlu zualin hmuhnawm an tling hranpa ve hrim hrim. Chutihrualin kan kristianna leh kan Mizo society hre reng chunga kan inchei thiam a tul hle mai. Sexy taka lan tum ni awm taka taksa lang tam lutuk thawmhnaw inbel fo te hi kan society nen hian a inmil chiah em? A pumpui a thlirin kumin Ṭhazual Award Show hian nikum 2021 kha a pha/ tluk lo deuh em aw a tih theih. Camera a che nasa in Video Production lamah duhthu a samlo deuhin a lang. Tin, Award sem tur rawn keng chhuaktute leh Award dawngtu thenkhat, a bikin kawrfual ha ho in thazo lo lutuk khan mit a tikham deuh. Nikum Ṭhazual Award Show kha Mizote buatsaih Live TV Show-ah chuan a hmuhnawm ber leh ropui ber pawla ka la ngaih a ni.

Social Media-a a ṭha zawng leh ṭha vak lo zawng pawha he Award Show-in sawi zui a hlawh dan aṭang hian mipuite hian he show hi kan ngaihven takzet tih a lang chiang. A engamah hmaa thil sawisel ching ve hrim hrim hi kan tam ta viau mai. Mizo ṭhalaite hian engemaw kan han ti hlek a, patling leh nutling pui pui, lehkhathiam leh mi challang tak takten kan han sawisel nghal buan buan mai thin hi chu a zialo ngawt mai. Heng Award Show leh Entertainment dangte pawh hi kan State retheihna aṭang ringawt a thlir a, ṭul lo ti pawl an awm. Kan hausak hunah chauh em ni heng Entertainment thilte hi buaipui tur? Engtikah nge kan hausak dawn hriat pawh va ni suh. Thenkhatin rem leh rem lovin Mizo ṭhalaite IAS a kan tlin theih loh chhanah kan lo puh thul. IAS leh sawrkar hnathawh tum miah lo, Entertainment lam buaipui hrim hrim hi Mizo ṭhalai zingah an awm ve teuh ang tih ring ila. IAS leh sawrkar hna sang thawh tum tan chuan heng Entertainment lam hi buaipui loh mai zawk tur a ni.

Engpawhnise, Mizo ṭhalaite hian kawng hrang hrangin hma kan sawn ve ta viau mai. Zirna leh infiamna lamah hma kan sawn rualin kan music industry te, film industry te leh Entertainment dang dangte pawh hian hma an sawn ve zel a ngai a ni. A bik takin zai leh rimawi hi mi tam tak nun hahchawlhna leh in awm tleina a ni ve a, hmasawn zel i tum sauh sauh ang u.

Fak leh selna karah pawh zaithiamte tan platform ṭha zawk siam zel ila, Award hlu leh changtlung zawk buatsaih tum ta zel zawk ila a va lawmawm dawn em. Zofate tan Zonet Ṭhazual Award hi changtlung lehzual zawk, huap zau lehzual zawk leh ngaihven hlawh lehzual zawk turin ZONET hian buatsaih zel se.

- Lalnunmawia