CHHUNGKAW INKAIHHRUAINA ṬHA CHU

Chenna In chu kan taksa tan kan in humhimna a ni a, nun dan tur kan in zirtir ṭanna hmun pawimawh a ni bawk. Pawn lama kan va nun dan chuan in chhungkhura kan inenkawl dan a hrilh fiah fo ṭhin a ni. 

In chhung khur chu kan pianna leh kan thihna hmun, kan nuih leh kan ṭahna hmun, nu leh pa leh rual u zawkten min uapa min kaihhruaina hmun a ni. Pawn lamah aiin in chhunga kan awm a tam zawk a, kan tan khawvel pawimawh ber a lo ni. Nun dan ṭha in zirtirna hmun a ni. 

Chhungkaw in kaihhruaina leh hun tawn a inang lo. Har­satna tam tak karah pawh chhungkaw in kaihhruaina ṭhaa invawng tlat chhung­kua­ah chuan Lalpa malsawmsakna a lo thleng thuai ṭhin. Hun tam a liam hmain mite entawn an lo ni mai ṭhin. 

Chhungkaw khaipa ṭhenkhat vethung chu chenna In mut nan leh chawei nan mahni duh zawng tih nan baka hman ngaihna hre miah lo, an In aia pawn lama rilru dah tam an awm ve bawk. Chutiang ang chenna In chu a lo tlabal thuai ṭhin. 

A chhunga chengte pawhin zilhna leh kaihhruaina ṭha an dawn ngai loh avangin an duh dan chauhin an awm a. Chhungkaw ṭanrualna a awm loh avangin chhungkua in tlakchham tam tak a lo neih phah ṭhin. 

Fate ngaichang thiam lo nu leh pa, mahni thu duh dan chauh kal tlang pui tum tlat chuan chhungkaw ṭanrualna a tichhe fo. Chawei laiin chhung­kua a tih tur sawihote hi chhungkaw hma­sawnna bul inṭanna pakhat a ni. 

Kan fate thil­tihnaah phurna te, taimakna te an neih theih nana puih a, fuih fo te chu nu leh pate bat a ni. Lalpa malsawmna kan dawn te hmuh thiam a pawimawh a, kan faten lehkha zirnaah leh eizawnnaah an tuizawngte chu phurpui leh thlawp ṭhat tlat a ṭul hun a awm ṭhin.

Chhungkua a Lalpa biakho chu tihtur pawimawh a nih bakah nuihho te, infiam te, pawn lama thiltihhote chuan chhungkaw lungrualna a thlen a. Nakin hnua kan lung tileng vawng vawng­tute an lo ni ṭhin. 

Lungrual taka ei dial dial te, engkim lang tlanga thiltih te chuan chhungkaw lungrualna a thlen ṭhin. Hripui leng karah hian in kaihhruaina ṭha in bul ṭan ang u.