Written by
- Lalzuia Colney
VAWKHNIAHZAWN THLA CHUNGCHANG
Mizo thla hming vuah chungchangah ngaihdan inang lo a awm nual a, hei hi tun hma aṭanga awm a ni a, rawm bial bik leh chi bikah pawh ngaihdan hrang a awm thei. Chuvangin, Mizoram sorkar thu angin ngaihdan inang tlang turin ruahmanna siam a ni a, chu chu han sawi ila.
Khawvelin a hman ang Gregorian Calender hming kan hmang zel ta a, chuti chung chuan Mizo thla hming vuah a bo loh nan Calender siamtute pawhin Mizo thla hming an dah hram thim. Chutah pawh chuan inang lo a la awm fo bawk. Chuvangin, Information & Public Relations Department-in fel takin Mizoram pa râwn tlak leh MUP hruaitute, MHIP hruaitute leh mi râwn tlak deuh deuhte ko khawmin September 9, 2011 khan I & PR Department Office-ah koh khawm a ni a, chuta an thu tluk dan chu hetiang hi a ni.
Mimkut leh Thitin thla pawh a ti fel a, mi ṭhenkhatin Mimkut hi mitthi puala kut a ni tih hre lo ang maiin Mimkut hmaah Thitin thla an dah lui tlat a, a dikna chu mitthi puala kut zawhah mitthi chu an ťin taa ngaih a ni si a. Chuvangin, Thitin chu mitthi puala ṭin zawhah (Mimkut zawhah) a awm a ngai a, chutih lai chuan, Mizoram hmun ṭhenkhatah August chu Thlazing tia an lo hman avangin, August chu thla zing ni sela, September chu Mimkut ni rawh se, tiin thu tlukna siam a ni ta a, Hei hi hman a ni ta a ni.
Hetiang deuh bawk hian July thla hi a hming vuah dan hrang hrang a awm a, Vawkhniakzawm thla, Vawkhniahzawn thla tihte sawiho a ni a, hei pawh hi ngun taka sawiho anih hnuah Sorkat Calender leh Synod pawhin an hman angin Vawkhniahzawn thla tih hi pass dan a ni ta a ni.
Calender siamtuten anmahni ngaihdan ang anga thla hming an vuah mai hi Mizo inpumkhatna ti ṭhentu a nih theih avangin sorkar pawhin a pawm thlap hi hman ṭheuh atan a ṭha. Hei hi zirlaite pawhin an hriat dan tur a ni.
Mizo ṭawng lam dan hi harsa tak a awm nual mai. Lumet pawh sammet ti tawk an awm; maite pawh Meite ti tawk an awm. Mizo ṭawng hi a ngial a ngana lak vek chi a mi lo va, luak chhuak te, ek chhuak te, zun chhuak te pawh a chhuah hmain chhuak kan ti vek mai. Tin, modify chi pawh tam tak a awm, modify dan pawh a inang vek hek lo. Rev. Zairema sawi dan angin "Ṭawng a ni" tih hi kan pawm thiam mai a ṭha. Chuvangin, Vawkhniahzawn thla tih pawh hi kam upa senior leh ṭawng thiamhote thu tlukna anih avangin pawm ve mai tur a ni. Common Language-ah pawm tlan mai tur a ni ang.