FIVE STAR HOTEL

Five Star Hotel - Luxury Tourist Destination - Mihring hausa nuam tawl te, nuamchenna nuna khaw­sakna changkang, tiin sawi ila. Kristiante hi nuam chen tur kan lo ni reng em, "Pathian leh Kan ram tan" tih hian engnge sawi a tum? Eng atan nge Mizoram sawrkarin 5 Star Hotel chu a mamawh? North East-ah hian 5 Star Hotel khawnge a awm hlawm? State sawrkar tan engnge chhawrna leh ṭangkaina a neih? Zawhna a va tam ve le!? 

Tunkai khawvel sawr­karah ram leilung fa rethei tak, Business Hub lian em em Dubai (UAE) kan hmu. Ram leilung fa, Native Arabs chu 20% chauh, ram dang mi Multinational Companies, hnam hrang hrang mihring 80% daihin an luahlan a. An ram leilung thlenga Land Lease Act hmanga 99 yrs atana an luahlan fai deuh vek tawh an ni. 

A tirah Dubai Lal (Sheik) in ram pawn Financial Bank hrang hrang aṭangin Development na tur Loan tam tak pukin Tourist hipna tur Hotel changkang te din turin an buatsaih a. Dubai mipui leh sawrkarin leiba rulh sen loh a ngah ta em em a. Chu harsatna sukiang tur chuan mihausa leh Multinational Company te sawmin World Trade Free Zone an inpuang a, kum 1980 bawr mai kha a ni. 

Economic harsatna khura lutin, loh theih lohin ram dang mite tan ram lei theihna Land Lease Act thar an kalpui a, ram leilung fa leh sawrkarin neih a nei chau hle.  Education thlengin ram dang School, America University ta a ni ta deuh vek a, official paper communication pawh English hman a ṭul ta a ni. 

Ram leilung fa Dubai sawrkar thuneihna chu a te tulh tulh a. Leiba ngah em em chungin Luxury Tourist Destination an ni miau a, tuna Covid 19 vangin Service Sector a tlachhe ta buaih buaih mai a. India mi hnathawk mek 200000 chuangin hna an chan tawh a, Mizo 150 bawr dinhmun pawh a ngaihtuah awm mek. Mizo pawh an lo haw nual tawh, Dubai Economic tak hi a chhe hle, chutiang bawkin Singapore pawh hi a ni. 

Gurgaon (Gurugram, Haryana) Delhi khawpui chep lutuk tawh, mihring leh business pawh ṭhen nan Haryana State chhung Delhi khawpui bulah Business Hubs leh Laxury Tourist Hotel tam tak din a ni. 

Haryana State leh central sawrkar buatsaih a ni a, Real Estate - DLF-ten hna zawng zawng deuh thaw an thawk a, miretheite ram leh hnathawhna buh hmun lei khawmin World Class khawpui an din ta mup mup a. Chutah building, hotel, office tur leh chenna turte chu an han lilam ta a. Haryana state ram leilung fa ni lo, khawvel ram hrang hrang company, India ram mihausa te, Bollywood lamte sumdawnna hmunpui a ni ta thuai a. 

Haryana state sawrkar leh mipui hian engnge hlawkna an tel chhoh tak tih hi ngaihtuah tham a va ni em. Lirthei vei vak a tam a, Toll Tax lak a ni a, state sawrkar hian engzat percent nge a chan ve ang aw? 

Haryana sawrkar tak hi a hausa lo nge, tun Covid 19 lenga hri kai test na turin, Gurgoan sawrkar Hospital-ah hian Rt PCR an bun thei tlai hle. Mi chitin inpawlh an nih avangin hripui kai an pung chak em em a ni. 

Ti hian Haryana mipuite chhawr phak lohin khawpui ropui tak Business Hubs, Luxury Tourist Destination- ropui tak a ding a. A ram neitu Farmers hote kha khawiah tak awm hlawm ang maw le? Hei pawh PM Rajiv leh CM Devi Lal te hunlai mai kha a ni. 

India ramah hian central leh state sawrkar ta 5-Star Hotel ang chi a awm nual a, an kum khat thawh chhuah profit aiin lost an ni furin ka hria. Mizorama 5-Star dinna tura ADB aṭanga pawisa puk tur chu Public Debt a ni leh dawn em? MNF sawrkar hmasa khan mipui leiba Rs 3000 crore vel a tihsan belh tawh a. puk leh chawpa 5-Star Tourist mikhual sum nei hip luh turte chuan engnge an rawn tih ang, tihtur a vang ngawtin ka ring. SEDP Rs 3,00,000 sem tur atan puk tur chu nise thuhran; Election-ah puk tur khan an tlangau nasa si a. 

Tourists awmzia hi tun­laiah business nena kal rual a ni zel a. Contractor & Constructions Works ngawr ngawr duhna vanga ADB aṭanga pawisa puk tum pawh a ang deuhin ka hria. Project base a Central Ministry pawisa tam 100% Assistance kan hmuhna aṭanga kan hai chhuak thei a nih chuan thuhran. 

Tuna kan ram dinhmun thlir hian a rapthlak hial zawk alawm le!