A VA HLU ÊM, HRINGNUN HI (Suangtuahna vâk vêl)

Kan khûalzinna ramah hian inthlahrung ru tak chunga mikhûal ni tûra zin hi a ṭul châng a lo awm ve leh ṭhin. Chutianga mikhûal ni tura he ram thianghlima kawng thianghlim zawha insawh bawp bawp chunga kan tlân laia ka thil hmuh ṭhenkhat 

aṭanga ka suangtuahna ṭhen­khat chu ka han sawi ang e. 

Kalkawnga kan tlân laia pangpar leh ramngaw, tlâng bâwk thliah thliah leh thing ding ro te khan ka lung min lên a, ka ngaihtuahna an va chawk tho thiamin an va vahkûaltir nasa mai mai tak em. 

Kawngsira pangpâr, mawi taka lo vul chêk chûk te chuan khawlum leh kawng chhia min theihnghilhtir thei hial a. Mihlim ṭhenkhat ṭawngkam takin, chung pangpâr ka thlir reng laia ka rilrua thu lo thleng chu: anmahni awm­na hmun ṭheuhah, an nih dan tûr ang takin an pâr tih hi. Ni e, siamtu khian an pâr hun tûr leh an pâr dân tûr, an rawng awmdan tûra a tih ang takin mawi takin an pâr chhuak mai a nih kha. Nang leh kei hi khawi hmunah nge, eng hunah nge kan pâr ve le? 

Langsar tak leh a hulum lai kherah pâr i tum ṭhin em? Pangpâr ṭhenkhat chu in bulah duat taka enkawlna dawng chungin an pâr a, ṭhenkhat chu rampalailengah, tu ma enkawl leh lawm pawh hlawh loin an pâr a nih kha maw! Mizo i nihna kha khawiah nge i pârtir ṭhin? 

Tu ma hmuh lohna hmun fianrialah hian mawi takin i pâr peih tho ang em? A lêt leh beisei tûr awm hauh lohnate hnênah hian i pâr phal chiah ang maw? Tlâng pang awih khawkrawk leh dîptu ngawpui kârah pawh mawi taka pangpâr an vul chêk chûk ang mai hian, i nuna harsatna leh ṭahna, lungngaihna leh mittui kârah khan mawi takin pâr ve rawh aw. Eng changkanna leh hmasawnna sawm sarih pawh lo thleng se, i Mizona kha pâr reng rawh se. 

Kawngsira thing ding ro pakhat khan he thu hi min hrilh leh a. A tirah chuan thing hring, lian ṭha tak a ni ve ngei ang. Ngaw kârah pawh langsâr takin a ding ang a, a zârah sava leh nungchate an tualchai ve ṭhin ngêi ang. Mahse, tunah chuan a lo ro zo ta! A chhan chu a zung a chat tawh tlat alawm. Zung kai lo thing chu rei a nung ngai si lo a. Aw ṭhalai, tunah khan i lianin i langsâr a, mi dangte awh khawpin i nun i hmang a ni mai thei. Hei erawh theihnghilh ngai suh; i zung kaihna a chhiat hunah chuan i la ro dawn. Chu i zungpui chu eng nge ni? I nu leh pa te kha asin. 

I awmdân leh i nunphung, i nihna leh i thiamnaten i nu leh pa te nêna in inkâr a tihchhiat hun hun chu i khaw ro hun a ni ang. Zung nei lo an dam rei ngai lo e. Eng mi pawh ni la, eng dinhmunah pawh ding la, eng anga mi ropui pawh ni la, i pianna theihnghilh ngai suh ang che. I têt lai kha ngaihtuah teh, ni sa leh ruah sur, thosi leh vaihmite kara rual i ban loh hlaua kâwla ni chhuak chhiar ṭhintute kha tute nge, i kalsanin i theihnghilh ngam ang maw? A lo tar tâk em avanga anṭam tui hang a hawp laia a kut a khurh nasat avanga ti baw zawih zawih ṭhin i pa kha mite hmaah i zahpui ṭhin em? 

A kum a lo tam tak avanga ring taka biak ngai tawh i nu kha ninawm i ti mai ṭhin em le? Chutiang mi i lo nih hlauh chuan, i pianna, i nu leh pate hnênah kir leh ang che.

Ṭhalai duhtak, i nihna leh dinhmun ṭhatna avanga i ram i ngaihnêpa i dah hniam hi he Mizoram hian a phal lo. I pianna nu leh pa dah hniam ngai suh la, i neih chhun i ram hi hmusit ngai suh ang che. Mizo i ni a, i ni reng dawn. Ram dang mi nih châka lemchan a ṭul lo. Khawi hmunah pawh awmin vâkvêl mah la, he Mizoram tan hian 'Mizo' ni zêl ang che. 

Ngùi leh ngûai châng te lo awmin, vùi leh vaih chângte lo thleng ṭhin mah se, siktuithiang dâwna zothlifim kan dawn leh ṭhinna ram, sikni êngin thinlai mu hnu a kaih thawh ṭhinna - He ram thianghlim, Mizoram ngêiah hian - a va hlu êm, hringnun hi!