ZIRTIRTU CHU KAN MAMAWH ALAWM!

November 20, 2017-a Vanglaini Chan­chinbua Pu PL Liandinga thuchhuah ka chhanna Nov. 22, 2017-a amah Pu PLA bawkin a rawn chhanletna chungchangah hriat fuh tawk loh lai a la nei deuh fova a lan avangin tlema zawng ka’n thai lang veleh hlek teh ang. Mimal nun, a thlawna pawisa sem etc. erawh kei chuan sawi ka tum lova, kan thusawi kal lai chungchang chauh ka sawi ang. A tawi zawngin sawi dawn ta ila.

1. Sorkar hian a enkawl Department hrang hrangte hman tur Budget session-ah a pharha a pawm hnuah Department tinte’n an chanvo ṭheuh tura ruahhman Plan & Non Plan Budget-a dah felsa, sorkar ruahman bak khawi department mahin an duh zat zat an hmang thei lo tih kan hre tlang ṭheuh awm e. Pu PLA pawh hian a hriat tho a rinawm rualin a ziah dan aṭang hian School Education Department bikin a chanpual hman zawh a nih hnu pawha duh zah zah department dang budget pawt penga zirtirtu duhthusam thal (Adequate Teacher) lak nana sorkarin sum sanction zung zung theih niawm takin a tarlang a, hei hi a hre lo der nge, a hre lo tak tak ni ang aw? Pension ṭhak thlenga Head of Department meuha thawk tawh chuan hre thiam awm tak a ni si a?

A thawh lai pawh khan an Department chanpual bak kha duh duhin an hmang thei lo tih chu a hre ve tho awm si a? Chuvangin, zirtirtu mamawh zat lak theih a nih lohna chhan, ‘sum a awm loh vang’ tia ka tarlan chhan kha a ni a, Zoram mipuite’n kan hriat thiam a pawimawh hle. Amah Pu PLA dan takah sorkar hian School Education Department ringawt atan Budget sum hi ‘ekbeng’ vek bik ta se, zirtirtu chu zirlai aia tam pawh sorkar hian a la thei ngei ang. Mahse, Department dang enkawlna tur a awm ve dawn loh avangin Department dang tan tih ngaihna a awm lovang.

2. ACR; MDM; GPF; MR bill; Training leh aikal lak tih a tarlante phei hi chu Department Head-a a thawh lai khan a hriat thiam ve tho a rinawm, a hriat vek sen loh laiah khan thil dik lo leh fel hlel tam tak a awm ngei ang tih chu mi a lo tan chuan a lang chiang hle. ACR thehluh dan phung pawh a hria a, mahse, a theh luttu turin kum tin theh lut lova a dah khawl miau chuan kum kal ta, a theh luh loh zawng zawng DPC-in a phut chin chu a hlawmin a thehluh a ngai ṭhin a, chu chu Department fel loh leh mawh a ni tawh lova, mimal mawh a ni tawh zawk ang.

Chutiang zelin aikal lak pawh GAD Notification ang chuan sorkar hnathawk tu paw’n aikal lak phal a nih loh rualin Department hrang hrangah a ruka aikal la an awm ṭeuh tho ang tih chu thil chiang sa a ni. Zirtirtu natna khirhkhan tawk, nau nei, leh harsatna zual bik neite’n aikal an lak hriatthiam loh theih loh an awm tih hriat a ni. Chumite chuan aikal an la chhawng leh zel em tih erawh hriat a ni tawh lo. Zirlaite hma khua ngaihtuahin, loh theih loha zirtirtu aikal lak hi ram hmangaihna dik tak zawk a ni dawn lawm ni? Zirtirtute leh staff an thihin Death Certificate nen Controlling Officer hnenah report a ni ṭhin. Report hnua A/Roll aṭanga an paih mai lo a nih chuan Directorate-in a va hre vek tawh lova, Controlling Officer-te mawh a ni ang. Death Certificate nen an report lo a nih phei chuan Court thu takin Department-in khami kha a thi tih a la hre ve miau lo a ni mai.

3. School Educacation Department hnuaiah hian Central Govt.; State Govt.; RMSA; SSA leh Local body enkawl sikul engemawzat a awm a. Khawtlang rawih zirtirtute hlawh siamah erawh Directorate of School Education-in mawh a phur lova; State Govt. enkawl bik hnuaia mi leh hlawh a pek tih loh, local body enkawl a bikin purely private-a thawk zirtirtute hlawh hi School Education Directorate-a Pay anomaly cell hian an hlawh a siam ve ngawt thei lo tihte hi hriat thiam atan a va ṭha tehlul em!

4. Educational Complex ringawt hi School Education Department hian a buaipui lova, zirtirtute quarters tur pawh a tam thei ang ber neih tuma hmalak mek a ni. Kei hi mimawl ve tak ni mah ila, haihawt fu e ti lovin, kum 1990 tawp lama Ramhlun Sport Complex-a Education Campaign neih ṭum khan Pu PLA khan, “Zirtirtute hi mimawl vek in ni...” a ti piap piap mai khan ka hria a, ka hre sual emaw, ka hre sual palh a nih chuan min lo hrethiam se. Amah paw’n a sawi dan kha a la hre chiang zawk ngei ang. Khatiang taka zirtirtute ngaisang vak lova lang si, tuna taka zirtirtute hmangaih thar ta thut nia langa an chenna tur quarters a’n ngaih pawimawhsak thar leh ta em em maite hi ‘inhlan thar lehna’ ropui tak Gospel Team Speaker-te hmaa inpuanchhuahna tham ni hialin kei chuan ka ngai.

5. Directorate of School Education Office-a cell hrang hrang hawn hi a ṭha hle a, felfai zawka office inenkawl theih nana tih a ni. Heng Cell hrang hrang felfai tak a awm avang hian Pisa hna thawh a awlsam phah hle ṭhin. Pu PLA erawh hian Pisa hnawkhnaina tur zawkah a ngai zawk hial emaw ni chu aw a tih theih. Sorkar hna a thawh lai khan a Department enkawlah pawh khan cell hrang chu a awm ve tho mahna le?

Tin, Pu PLA hian Dr. nihna lei theih a nih thute kha a hriat thu a sawi a…kei erawh chuan ka hre ve hauh lo mai! A hriat ang ka hre pha ve lo a nih hmel. Zirlaiin a phu (deserve) a nih phawt chuan zirtirtuin ‘full mark’ pawh a pe mahna…” Chutiang bawk chuan Kohhran Upa (Khawi Kohhrana mi pawh)-a thlan a nih tawh chuan miin a duh phawt chuan a hming hmaah ‘Upa’ tih a dah thiang a ni lawm ni? “Mipui an thuhmun fo thei lo” tih hla kan sak fo ṭhin hi mawle! ‘Confidential’ tih turah type mistake avanga ‘confidencial’ tia ziah palh zeuh thlengin a rawn kher a, a nawi sawt fu lo maw? Nawina ramah kan vak lut dawn ta em ni le?

6. Kei zawng mimawl tak ka ni a, Officer hrawn nuam tak ka ni mahna? Mahse, thil dik lo ti tura nawrtu erawh khawi Department-ah pawh a chhunga thawktute aiin mipuite an ni duh chawk. Office of Procedure felfai tak anga thawh tur a nih reng laiin a nihna ang thlapa thawh hleih theih loh chang leh theih loh chin a awm thei. Pu PLA pawh hian a thawh lai khan a rorel dan hre chiangtute hnenah eng angin nge in hmuh tiin zawt ta ila: Tin, anni chuan, “Baptistu Johana a ni,’ an ti chia; midangin ‘Elija a ni’ an ti chia; ṭhenkhat erawh chuan, Zawlnei tua emaw a ni’ an ti che” tiin an hrilh a. (see- Marka 8:27-28) tih thu Isuan a zirtirte hnena miin amah an hmuh dan a zawhna an chhanna ang bawk khan an chhan dan a inang lo ve nuai thovin a rinawm.

Engpawhnise, a hmaa tarlan tawh ang bawk khan kan Zoram ṭhatna tura duhtu ṭheuh kan nih avangin ṭawngkam dengkhawng leh uchuak tak taka intih leh invawm chiam chiam te, ṭawngkam thlum awmze nei (metaphor) ṭha tak tak hmang chiam chiam mah ila zirtirtu lak belhna tur sum a awm chuan si loh chuan emaw, khawpui leh thingtlanga zirtirtu nei tam fal bikte a nei tlem leh nei lote hnena semrual a nih phah chuan si loh chuan ‘dar ri mai mai emaw, darbenthek ri mai mai’ emaw a nih hmel.

Chuvangin, ram siam ṭhatu tak tak ni turin kan hma zawn ṭheuha kan tih theih chin leh tih tur chinah hian huaisen tak leh rinawm takin thawk ṭheuh ila Zoram hian dinchhuah hun a la nei ngei ang tih i beisei tlat ang u.

- Dr. C. Lalrampana