Duhsak loh bîk versus duhsak bik

Mizoram po­litical history hi hriat ve chin chin han en hian Party hruaitu ber hian duhsak loh bîk a neih avangin party hi a tlanchhe ngai lova, mah se duhsak bîk a neih apiangin buaina hi an nei ziah ṭhin zawk a ni. 

Tichuan inthlan a lo ni chiah a, sorkar ngei pawh an tla nal nal ṭhin tih hi chiang takin a inziak a ni.

Kan sorkar kal mek hi ngun taka kan thlir chuan Hnam Run lama kum 20 chuang lo inti thu ve tawh te tán pawha hnawk turin mi thar zawk zel an langsar a. Minister thar a langsar a, läwm luh thar an Secretary nghal bawk a, Joint Secretary an ruat pawhin a awm sâ ṭhenkhat aiah a thar ṭhat hmel zawk an tlatlum daih a, hei hi party tana thil pawi thui tak thlen thei a ni dâwn, long run lamah chuan.

Mizoram poli­tical history hi chu a kal rei lova, MU, PC, Congress leh MNF in sorkarna an siam tawh a, state kan nih hnu chuan Congress leh MNF in Lal chhawk zak zak a nih avangin tuna Congress aia MLA ngah zawk ZPM hi chu pawl thar deuh chan an la chan avangin sawi tel tur an la awm ve lovah ngai ta phawt mai ila. 

Congress hian an tlak chhan hi in chhut chiang duh se chu an Party hotupa ber in duhsak bîk a neih vang tih an hria ang. 2013 ah khan President, President nau, President monu u leh monu nau kha MLA ah an tling vek a ni. Kha kha induhsakna lam angah miin ngai kher lo pawh ni se a chhungah nget a lo awm hman tawh ṭhin a ni. Chumi chu an hriat chhuan meuh chuan Vice President chu a chhuak mai a ni (chhan dang mipui hriat sâ vek kha chu awm tho mahse). 

MNF hian tunah hian thik rawn an nei tih a lang reng a. Minister dang leh MLA dang te pawhin sawi chhuak ngam lovin an vei tawhin party Secretary rual chuan chance hmasa ah sawi chhuah an tum te an ti a, tuna insiam ṭhat loh chuan duhsak loh neih vang ni lo duhsak neih vang hian Hnam Run hi a awm riai riai mek a ni thei lo maw?

Lo dâwn ve teh le ka ṭhian.