Khehpuam star ho hi

“Saw pa saw hman ni lawka Khehpuam chungchanga case nei kha a ni a, tunah chuan zak miah loin a leng a leng leh tawh a, eng eng emaw a ti leh tawh,” tiin mi ang thawm ka hria a, an kawh pa pawh chu khehpuam thilah an man tih ka hre bawk a ni.

Hman deuhah khan Facebook-ah khan Aizawl Civil Hospital thlanga damdawi zawrhna kawtah khan kheh­puam bawm tam em em mai kha an man a, khami kaihhnnawihah khan Aizawla mi challang tak takte kha an lang nawlh nawlh a, kha kha a zuzi ral ta mai mai ni awm tak a ni.

Ṭum khat chu ṭhianho kan ti ti a, chutah chuan tunlaia Aizawla sumdawng ṭhangduang deuh deuh hming hi an sawi chhuak a, Aizawla invawrh lar leh sumdawng lian thar zinga mi paruk hming hi inti hre takin a sawi a, “Heng mite hi tun hma kum 10 velah khan tute nge an nih pawh kan hriat loh an ni a, an damdawi tawlhlai kuta man ni lo mahse an sum lakluhna kan hriat pui theih miah loh (unknown source of income) lian tak tak an neih loh chuan he sumdawnna lian hi an khawih thei lo. Bank account crore chuang neih ngai sumdawnnate an khawih thei ta a, chuvangin an kheh­puam tia an sawi ruk hi a dik a ni,” a ti phiar phiar mai.

Aizawl hmar lama mi pakhat pawh hi New Delhi-ah hun rei angreng tak mai hi a awm bova, Delhi-ah hian a hnathawh chiah sawi fak tur an ṭhenawmte chuan an hre lova, tichuan dawr lian thawkhat a din a, a aia lian a din leh a. Tunah chuan a lian em em tawh a, chu pa len chak danah chuan mi hi an ngaih a ṭha thei lova, inti hre chiang tak chuan, “Delhi Money service a zawm ve alawm” a ti mai a, Delhi vela chinchang hre taka thang bo vang vang hi an hausa hnawk zel an ti a, khehpuam hi Delhi lam nen inzawm tlat niin an sawi.

Pakhat dang han sawi leh lawk ila, tun hma deuh kha chuan Mizoram khaw chhak lamah khi chuan khehpuam hi sual a ni tih an hre mai lova, langsar tak takin an lo kheh ṭhin a ni awm e. Tichuan, a dik lohzia an hriat hnu chuan an sim phal tawh si lova, an inkheh milian ta a, chutiang hovin in an sak chu a hre chiangte chuan a hmingah ‘Damdawi In’ an tih sak a ni awm e!

Damdawi zuar zingah hian, pseu­doephedrine hi ruihhlo atan an hmang dawn tih hre reng chunga ‘Dan kan bawhchhe hleinem’ tih chang chawia an license hmanga khehpuam chah ṭeuh ṭeuha inti miliam hi an awm nual an ti bawk a, hengho pawh hi Khehpuam Star vek an ni.

Khehpuama inti milian zawngte hi ruihhloa sumdawng vek an ni tih hi keia pawm dan a ni.

- Lalramnghaka