EIZAWNNA LEH KOHHRAN

Tunlai kan Mizo society kalphungah kohhran hi kan dah pawimawh hle.

Nu leh pa mai bakah ṭhalaiten koh­hranah kan inhmang nasa hle mai. Hetih lai hian thil ṭha anga lang kan tuipui tam zawk hi kan mamawh ber leh min siam ṭhatu a ni lem lo tih erawh kan hriat a ṭul. Hmasawnna kal zelah eizawnna pawh tun hma anga tukṭhuan leh zanriah chaw ei inkara zawh fel mai chi a ni tawh lo. Hetih lai hian kohhran lamah, mi piangthar leh mi hman tlakin an daih bak, mi phur thar leh mi hman hman inhmanna kawng inhawng khawpa tam program a pung zel mai si.

YMA thiltum, ‘Hun­awl hman ṭhat’ tih pawh zawm ngaih­na awm lo khawpin, hunawl hman ṭhat tur kan nei tawh lo chu a ni ber mai.

Kohhrana nihna pawimawh tak nei si, hnathawhna hmuna inthlahdah tak kan awm ṭeuh mai. Inkhawm tlai hlau em em si, office kal tlai pawisa miah lo te hi khua leh tui ṭha an ni ngai lo. Pathian hian Biak in hung pawn lam hi chu min zui thleng lo se duh te pawh kan ṭhahnem awm mang e. Sorkar hna kan thawh leh kan awmna kohhran kan thawh kep zel a. Eizawnna ngaih pawimawh a ṭul lai pawha kohhran program chhuanlama kalsan reng lo tur leh rinawm leh taima taka mahni hna thawh inzirtir hi a ṭul tawh hle. Chhungkaw nu leh pa zantin deuh thaw kohhran thila mahni in lum chhuahsan reng mai te hi kan ṭhalaite sualna bul a ni.

Hetihlai hian kan eizawnna lam ngaih pawimawh lutuk avanga Kohhran kan thlahthlam chuan a pawi thui thei hle thung ang. ‘Eizawnna leh Kohhran’ hi thil pawimawh tak pahnih, insu buai lo leh inhne rem taka kalkawp tur a ni. Pakhat zawk dah pawimawh lutukna hian pakhat zawk a tihchhiat theih avangin fimkhur taka ngaihtuah chunga kalpui a ṭul hle.

Kan eizawnna avanga kohhran rawngbawlna tih ṭhuanawp a rem lo ang bawkin kohhran rawngbawlna hian eizawnna a tih chhiat a rem bawk hek si loh avangin chhung-kaw nu leh pa te hian hun bi mumal tak kan siam tur a ni. Kan eizawnna leh kohhran ramri hi kan kham thiam phawt chuan kan tisual ngai lo ang.

Tuna kan Kohhran program tibuai lo turin eizawnna lamah kan in control dawn nge, kan eizawnna tichhe lo turin koh­hran program te hi kan control zawk dawn? Kan eizawnna leh kohhran ramri hi engtinnge kan kham ang? Mahni inen let ṭheuh ang u.

- Chhungpuia Renthlei