3,00,000 aṭanga 2,5000 paih = 275,000 an la bâ
NLUP dawng tawh zawng zawng pawhin an dâwn tura Pu Zoramthanga min tiam kha Rs 3,00,000 a nih kha hre reng ila. Tuna an sem hi chu ama sawi dan takah "A chi tur" a niah ngai ta ila, Rs 25,000 chu basketball khel ṭhin pheikhawk man ang vêl niin an sawi a nih chu, chhungkaw din chhuahna tham a ni lo.
Mizoramah hian mistiri thiam pangngai chin hi chuan thlà khatah Rs 25,000 hi chu an hlawh vek e an ti a, Mistiri pangngai hi chu an ei ve hram hramin fate sikul kaina leh nitin mamawh an nei phak mawi tawk chauh a ni. Hausa tiin kan sawi lo a, an ding chhuak ta pawh kan ti hek lo, heng hian thlà khatah Rs 30,000 vêl bawr an hlawh tawh a.
MNF sorkar hian kum 5 chhunga a mipui din chhuahna tura pawisa a pek hi a tlem tham lulai a, a Free a nih chuan Rs 10 pawh duh loh thu a awm lo a, a Free a nih rau rau chuan Rs 1,00,000 pawh duh vek a ni ngai a, Rs 25,000 chu a tlem lulai deuh a ni.
A sem hun leh a sem chhan (spirit) han en vang vang hian din chhuahna tura duan a ang lo a ni.
Mizo chhungkaw pangngaiin bazarna tura pawisa kan mamawh hun lai ber chu Krismas dâwn hi a ni a, hei hi Mizo tam zawk kuthna thawktu tán chuan awllen lai a ni ve thung a, hma thar lâk hun lai a ni lo.
Rs 25,000 hi lo sem ta zel pawh ni se Krismas dawna kan chhungkaw mamawh huna a pawisa fai (Cash or bank transfer) min pek chuan nakkuma thlai chi leh lo neihna hmanrua leina turin ka khek thei tawh lo, ka hman chhuah ngei ngei a ngai tawh zawk dawn a ni. Chhungkuain Krismas bazar dawna kan account lama pawisa awm hi kan hman phawt a ngai.
Mizo Mize hre chiangtu politician-te hian Rs 25,000 pawh hnar phal lo tur mai ni loa it em em kan tamzia leh Krismas dâwn hnaiha kan mamawh bîkzia hre chungin an rawn sem tir ta a ni.
Intodelh a la hla a, mau leh rua chinna tur pawhin Rs 25,000 chu a la beitham lulai.
Kan hotute hi insang marin an theihna tak tak lan tir ve tawh se, mipui nawlpui tán Rs 27,5000 (SEDP Rs 3,00,000 min tiam lama kan la neih a bâng zawng) sem chhuak se. Kum 2023 ah kan inthlan dâwn avangin an sem hman lo dah ang tih riau riau kan hläu a ni.
- Rohmingthanga