Social media-ah fimkhur a ngai ta tak zet

Tun hnaia social media-ah inhnialna leh neuh neuh a tam; a bik takin YouTube chungchangah phei chuan inhnialna a tam zual. A duh apiangin sum séng loin channel an nei thei bawk nen, an duh duh an tichhuak pawp pawp mai a, buaipui tham a ni ta tak zet.

Mizorama chan­chinbumi kan tih, mainstream media-a thawkte hi lehkha­thiam sang tak tak an awm tho rualin, zirna lama sang vak lote pawh eng emaw zat an awm. Mahse, lehkhathiam sang tak ni lote pawh hi media leh journalism lama inzirna - workshop, seminar, etc. paltlang deuh vek tawh an ni bawk a, thu leh thlalak chhuah àwm leh chhuah atana him lo an hre tlangpui.

Social media lamah erawh chuan a hranpaa insenso ngai hauh loin thu leh thlalak kan thehdarh thei vek tawh a; chutih laiin, a tam ber chu media leh journalism lama inzirna nei miah lo, journalism ethic - tih tur leh tih loh tur pawh hre map lo an ni thung. Hei tak hi kan buaina a ni.

Lehkha zir thiam­na lama sang tak, khawtlanga mi pang­ngai tak tak pawh hi, journalism lamah chuan an ngawng duh phian. Eng emaw kawng tala thu thar leh thlalakte thehdarhtu kan nih deuh vek tawh avangin mahni inzir a, tih àwm leh tih àwm lohte hre tura kan inchhiar vàr ve a ṭul ta.

Khawiah emaw thil a thleng a, Youtuber tu tute emaw chuan phone hmangin thil thleng chanchin an zawt a. Chutiangah chuan mipuia puanzar atana him leh ṭha chin an hriat lohna a lang ṭhin.

Youtuber tam tak chu phone hmanga mi an biakna an record, thup leh paih ṭhen awm tawh chuang loa a nih ang anga tichhuak mai ṭhin an ni. Hei tak hi a him lo. An va biakate khan mipui hriat atana ṭul lem lo leh ṭha lote an lo sawi tel fo a, chu'ngte nen lam chuan a nih ang angin an tel mai ṭhin.

Hetiang hi YouTube lâr hma pawh khan journalist-te hian an lo ti tawh ṭhin a; a him chin, mipui náwlpui hriat atana ṭha tâwk chin an chhuah mai ṭhin. Thil thlen dan kimchang leh ngialngan lutuk hi mipuiin hriat atana ṭha a ni vek lo a, mipui hriattir vek tum pawh a ṭul lo rêng a ni.

A tàwp nan, 'Hnam changkang zawkte pawhin an ti' tih hi ṭan chhanah hman fo a fuh lo thei. Hnam dang tih ang apiang hi kan hnam tan a ṭha vek kher lo a, kan hnam tih dan zawng zawng hi hnam dang tan a ṭha vek kher lo a, an tih ve zel pawh a ṭul hek lo.

Chuvangin, hnam dangah inteh loin, dan ngaihtuah tel chungin, kan hnam tan a ṭha em, a him em tihte ngaihtuah ila; kan ram leh hnam kalphung leh nihna pêl lutuk lo turin i fimkhur tlang teh ang u. Social media-ah kan fimkhur a ngai ta tak zet e.

- Zoramchhana