Football World Cup-ah eng ram nge i ṭan?
Football hi Mizote zingah a mikhual lo a, Mizoten infiamna kan ngainat berte zinga mi a ni bawk. Mizo mipa tam zawk chuan football khelh an tui a. Mizo hmeichhe zinga pawh football ngaina tam tak an awm a, amaherawhchu field chhunga a inkhelh tak erawh tui chilh an tlem lo hle thung niin a lang.
Engtik aṭangin nge Mizote hian football hi kan ngainat ṭan tih hi chiang taka sawi a har a, mahse Indopui 1-na emaw 2-na lai chho vel aṭang khan football hi Mizoten an hre ṭhan chho niin rual u ṭhenkhatte chuan an sawi.
Tichuan 1910s chho vel aṭang Mizote hian football hi kan ngaina chho ṭan tiin dah ila kan sawisual tam awm lo e. (a hre zawkte sawi zuiah dah ang)
Hun a lo kal zel a, Mizote zingah England, German, Argentina leh Brazil ṭan an tam a. Heng ramte hi Mizote zinga a mikhual loh chhan hi chiang taka sawi a har ang. Rinthu ṭhenkhat han tarlang leh ila.
England hi kumpinu-in India a rawn awp vanga Mizote hmelhrait a ni a, Mizoram ngei pawh an rawn awp nghe nghe tawh a nih kha. Min awp vanga sap ngaihsanna Mizoah an tuh tel bawk.
Hengte avang hian England hi Football World Cup-ah Mizote hian kan ṭan ṭhin niin a lang a, hei bakah hian an media-te an chak em avanga English Premier League lar taka England player khel an tam vangte pawh a ni ang.
German hi England tih loa Mizoten Europe ramte zinga kan hriat hmasak berte zinga mi a ni maithei. Indopui 1-naah khan khan Mizote paw'n an zu do ve nghe nghe a nih kha.
Feren anṭam kan hriatna pawh kha mi ṭuma Mizo sipai rawn hawn a nih hmel a, kha indopui khan Mizo nawlpuiten France ram kan hriat chhohna pawh a ni ngei a rinawm. Tichuan World Cup-ah Mizote chuan France kan ṭan phahna a ni tel thei bawk.
Argentina leh Brazil kan ṭan chhan pawh chiang taka sawi har. Argentina hi Mardonna vanga ṭan an tam a, Mizoten TV kan neih hnua Brazil player langsar Ronaldo, Ronaldinho te vanga ṭan an awm bawk. Kristian ram nihna avangin ṭan an hlawh tel thei bawk.
Ṭhangthar zawkte an lo puitling chho a, upate mual an liam zel a. Hengte avang hian World Cup-a kan ram ṭan te pawh a darh chho ta! Tunah chuan K-pop vanga South Korean ṭan an tam belh an ti. Nang eng ram nge kumin hian i ṭan ve?
- Puia Varte